Read ngakarimojong Yer. 52 Bible Online

Yer. 52 - ngakarimojong bible

Yer. 52

¹Arae ŋikaru a Sedekia ŋatomoniarei ka epei apaki ŋina esyakinia iŋes akipuka Yudaya. Kipuka iŋes Yudaya alo Yerusalem ŋikaru ŋitomon ka epei. Arae ekiro a toto keŋ Amutal nakoku a Yeremia a ŋolo alo Libina.

²Abu Sedekia kitiya ŋakiro ŋuna aronok alokiŋaren Ekapolon, lopite jik ŋolo etiyator Yeoiakim.

³Kire, apotu ŋituŋa a Yerusalem ka ŋituŋa a akwap a Yudaya kitoŋoa nooi Ekapolon, aŋun abu Ekapolon kirita ikes alokiŋaren keŋ. Abu Sedekia toŋer akiwuap ŋakiro ŋuna ke erwosit a Babilon.

⁴Tosodi alokaru a ŋolo a ŋikanikaomwon, elap ŋolo a ŋitomon, ŋirwa ke elap ŋitomon ipukat Sedekia, abu erwosit a Babilon ŋolo anyaritae Nebukadinesar toloto ka ŋasigarya keŋ daadaŋ akirem Yerusalem kirikaut iŋes. Apotu ikes torekinos kiŋa etaun, toduko ŋadoketa kisiryama kiŋa etaun.

⁵Apotu ikes torubakis irikaunito etaun akitodol lokaru ŋolo a ŋitomon ka epei ipukat erwosit Sedekia.

⁶Ani edoli ŋirwa ke elap ŋikanikaomwon, elap ŋolo a ŋiomwon, tonyam akoro ŋituŋa nooi alotaun, todaun anakwap ibore ŋini imujete ŋituŋa.

⁷Aponi topedoi arwatata ŋina ke etaun, ido apotu ŋasigarya daadaŋ toema nakwaare alotaun, kitoro ikes lopuke ŋolo apedokinitoe kidiŋ ŋarwatatain ŋuna edunyasi ka emanikor ŋolo ke erwosit, tari daŋ ŋina erikaunitotor Ŋibabiloniyae etaun. Apotu ikes toema lowae ŋolo ka Araba.

⁸Nai apotu ŋasigarya a Ŋibabiloniyae kiwuapa erwosit Sedekia, ido toditasi anadipoe a Yeriko, apotu ŋasigarya a Sedekia daadaŋ toema kielaros aneni keŋ.

⁹Apotu ŋasigarya a Ŋibabiloniyae kikamut erwosit Sedekia, yaasi neni a erwosit a Babilon alo Ribila anakwap a ŋina ka Amas, neni abunio iŋes totubokinia Sedekia.

¹⁰Abu erwosit a Babilon toar ŋidwe a Sedekia ŋulusapa ite Sedekia ka abu daŋ toar ŋikapolok a Yudaya daadaŋ alo Ribila.

¹¹Abu daŋ togorono ŋakonyen a Sedekia, toeniu iŋes a ŋiriko, yaarae Babilon neni aponere toenere Sedekia akitodol akoloŋit ŋina atwania.

¹²Ani edoli ŋirwa ke elap ŋitomon, elap ŋolo a ŋikan, torae ekaru ŋolo a ŋitomon ka ŋikanikaomwon ipukat erwosit Nebukadinesar ŋolo a Babilon, toloma Nebusaradan ekapolokiniton a ŋasigarya a ŋuna eyokiyete erwosit a Babilon Yerusalem.

¹³Kicunyak Nebusaradan Akai ka Akuj ka akai a erwosit ta ŋakais daadaŋ ŋuna aya Yerusalem. Kicunyak iŋes ŋakais daadaŋ ŋuna a ŋikapolok.

¹⁴Apotu ŋasigarya a Ŋibabiloniyae daadaŋ ŋuna arukito kaapei ka ekapolokiniton a ŋasigarya a ŋuna eyokiyete erwosit kituwosi ŋarwatatain a Yerusalem daadaŋ.

¹⁵Abu Nebusaradan, ekapolokiniton a ŋasigarya a ŋuna eyokiyete erwosit a Babilon toriko ŋituŋa ŋice ŋulu akulyakakaka akilo ŋuluce ka ŋituŋa daadaŋ ŋulu edoŋito lotaun ta ŋulu kepotu tocamut akirii ka erwosit a Babilon kaapei ka ŋituŋa ŋulu ayenete akitiyaunun ŋiboro.

¹⁶Nai abu iŋes kimyek ŋituŋa ŋice ŋulu akulyakakaka nooi anakwap a ŋin aŋuna ka akitub ŋikito ŋulu ke epiini ka akitare ŋimanikorin.

¹⁷Apotu Ŋibabiloniyae tobwaŋabwaŋata ŋipirin ŋulu ke eburonis ŋulu alotooma Akai ka Akuj toukosi daŋ ŋawoeta ŋuna a etorube a anam ŋolo ayai Kai ka Akuj ŋolo etiyaunitae a eburonis, ido yaasi eburonis daadaŋ Babilon.

¹⁸Apotu daŋ Ŋibabiloniyae yaasi ŋamoti, ŋakitiyoi, ŋileŋia ŋulu etubere ŋausi a ŋitaae, ŋakijikoi ŋuna apolok ka ŋiboro daadaŋ ŋulu etiyaunitae a eburonis, ŋulu esitiyaeneneo alo Kai ka Akuj.

¹⁹Abu ekapolokiniton a ŋasigarya a ŋuna eyokiyete erwosit a Babilon ya ŋabakulei ŋuna cicik daŋ, kaapei ka ŋasipiryae, ŋabapwa, ŋawoeta a ŋitaae, ŋakijikoi ŋuna apolok ka ŋabakulei ŋuna awuatanakinere ŋituŋa ŋakipi, ŋiboro daadaŋ ŋulu etiyaunitae a egolid ka a esilipa.

²⁰Ani eruwor ŋipirin ŋuluarei, etorube a anam, ŋitorubei a ŋimoŋin ŋulutomon ka ŋiarei ŋulu etiyaunitae a eburonis ŋulu aya kwap etorube a anam ka ŋawoeta, ŋiboro ŋulu abu Solomon kitiyau aŋuna ka Akai ka Akuj, pa apedoritae akipimun apotis a eburonis a ŋolo etiyaunitere ŋiboro ŋul.

²¹Arae aoyau a ŋolopir ŋimitae ŋikanikauni ameun alokwap tari kidiama, torae aburis keŋ ŋimitae ŋulu aapiyarito ŋikan, aorori epir alotooma, ido arae aburis a asuwat a ŋina etiyaunitere iŋes ŋimitae ŋatomonikanikaarei ka ŋikan.

²²Ayai daŋ akou a epir a ŋol, arae aoyau a akou a epir a ŋol ŋimitae ŋiarei ka esibusitae a ŋitorubei a ŋaraito a ŋuna ikote ŋaraito a ekacikicikit a ŋuna enyaritae pomegranate. Etiyaunitae ŋitorubei a ŋaraito ŋul a eburonis ka eluluŋ. Ŋolocepir daŋ ekoni neni pei.

²³Ayakasi nawaetin a ŋipirin ŋitorubei ŋulu a ŋaraito a ŋuna ikote ŋaraito a ekacikicikit, arae ŋitorubei a ŋaraito ŋul daadaŋ ŋulu esibusitere ŋakyes a ŋipirin a ŋul, ido arae amiat.

²⁴Abu ekapolokiniton a ŋasigarya a ŋuna eyokiyete erwosit a Babilon kikama Seraia esacaradoti ŋolo apolon nooi, Sepania esacaradoti ŋolo atupit Seraia anapolou ka ŋiketeok ŋiuni ŋulu eteete ŋikekya.

²⁵tosodi alotaun, abu iŋes toriko ekile ŋolo arae ekarikiton a ŋasigarya ka ŋikilyok ŋikanikaarei ŋulu eŋarakinito erwosit akipuka ŋulu aryamunio alotaun ta ekegirigiran a ekapolokiniton a ŋasigarya ŋolo apolokinit ŋasigarya daadaŋ anakwap keŋ kaapei ka ŋikilyok ŋatomonikanikapei ŋulu aryamunio alotaun.

²⁶Abu nai Nebusaradan, ekapolokiniton a ŋasigarya a ŋuna eyokiyete erwosit a Babilon ya ikes Ribila neni a erwosit a Babilon.

²⁷Abu erwosit a Babilon toar ikes alo Ribila alotaun a ŋolo ayai nakwap ŋina enyaritae Amas. Ekoni nen arikoro a ŋituŋa a Yudaya anakwap kec.

²⁸Erae lo ekimar a ŋituŋa a ŋulu abu Nebukadinesar toriko nakwap keŋ erae ŋimabus: Alokaru a ŋolo a ŋikanikaarei aponi torikoroe Ŋiyudayan ŋalipyo ŋauni ka ŋatomoniarei ka ŋiuni,

²⁹alokaru a ŋolo a ŋitomon ka ŋikanikauni ipukat Nebukanidesar, abu iŋes toriko alo Yerusalem ŋituŋa ŋalipyo ŋakanikauni ka ŋatomoniuni ka ŋiarei,

³⁰alokaru a ŋolo a ŋatomoniarei ka ŋiuni ipukat Nebukadinesar, abu Nabusaradan ekapolokiniton a ŋasigarya a ŋuna eyokiyete erwosit a Babilon toriko Ŋiyudayan ŋalipyo ŋakanikaarei ka ŋatomoniomwon ka ŋikan, arae ekimar a ŋituŋa a daadaŋ a ŋulu aponi torikoroe ŋalipyo ŋakanikapei ka ŋamiae ŋaomwon.

³¹Alokaru a ŋolo a ŋatomoniuni ka ŋikanikaarei, ŋirwa ke elap ŋatomoniarei ka ŋikan elap ŋolo a ŋitomon ka ŋiarei, eriŋa Yeoiakin erwosit a Yudaya erae emabus alo Babilon, kisyak Ebilimerodak ŋolo alo Babilon akipuka Babilon, tolacak Ebilimerodak Yeoiakim erwosit a Yudaya alomabus.

³²Abu iŋes torimaaniar aneni a Yeoiakin kitopoloo iŋes adepar ŋirwosi ŋuluce ŋulu epukatotor iŋes alo Babilon.

³³Aŋun abu Yeoiakin tolaca tari ŋilowi keŋ ŋulu sek alomabus ka abu toruwor ŋolo emujenene alokai ke erwosit jwi jwi anakiyar keŋ a daadaŋ.

³⁴Abu erwosit a Babilon inanak Yeoiakim ŋisiliŋa ŋidi a ŋinakoloŋit, ikotere iŋarakinor ŋirwa daadaŋ ŋulu eboiyo iŋes alo Babilon akitodol akoloŋit ŋina atwania iŋes.