Read ngakarimojong Yer. 9 Bible Online

Yer. 9 - ngakarimojong bible

Yer. 9

¹Okoe kerae ca torae akou kaŋ eitanit a ŋakipi ka torae ŋakonyen kaŋ elelya a ŋakiyo, kapedorit ayoŋ akigworo naparan ka nakwaare aŋuna a ŋituŋa kaŋ a ŋulu aari, a ŋulu a ŋican.

²Okoe kerae ca oyakar ayoŋ naloŋisat akibois ŋina epedorya ekaloton akieŋunia toper, kalot ayoŋ aneni kec emyek ŋituŋa kaŋ, anerae erae ikes daadaŋ ŋimalaanotin, atukot a ŋikalukinok.

³Ekudito ikes ŋaŋajepa kec ikwa akau a ŋikaleŋeleŋe; apolout ikes anakwap erae ŋulu egogoŋ anakitiya ŋuna ka amodiyo, meere anakitiya ŋuna iyookino; anerae erubakinito ikes itiyaete aronis jik, ido nyakayenete ikes ayoŋ.

⁴Tocoikinito ŋikidunyet kus ka nyikinyomito idio alotooma ŋiyeneta kus, anerae erae ŋiyeneta kus daadaŋ ŋulu amodyanakinak ka irimito ŋikidunyet kus daadaŋ erae ŋikamodiyanak.

⁵Emodyanakinete ikes daadaŋ ŋiyeneta kec ka mam ituŋanan irworo ŋakiro ŋuna a kire etatama ikes ŋaŋajepa kec akirworo alyokonu, itiyaete ikes ŋuna ka asecit ka apapanut nyepedorito akiki.

⁶Elal nooi akisicanit ŋuluce, elal nooi amodiyo, awout ikes ayenun ayoŋ.

⁷“Aŋun, alimu Ekapolon ŋolo a ŋajoresyo atemar, ase tokona ayoŋ ŋituŋa kaŋ, ido ekatak ikes. Anukiro tokona ŋace emaikina ayoŋ etiya neni a ŋituŋa kaŋ a ŋulu arubakis eseceneneete?

⁸Ekudito ikes ŋaŋajepa kec ikwa akau a ŋikaleŋeleŋe, irworosi ŋaŋajepa kec alyokonu jik, irworosi ikes daadaŋ ŋakiro ŋuna ka akoneo neni a ŋikidunyet kec, nai alotai kec eyeete ikes ŋuna ka adapun ŋikidunyet kec.

⁹Nyesicani mono ayoŋ ikes aŋuna a ŋakiro a ŋun a? Nyenyaŋari mono ayoŋ aronis a ŋituŋa a akwap a ŋina itiyaete ŋituŋa keŋ ŋakiro ŋuna ikote nu a?

¹⁰“Tema Yeremia, Egworo ka ewololoe ayoŋ aŋuna a ŋimoru ka ewololoe aŋuna a ŋinya a ŋulu ka aloŋisat, anerae aruwor ŋikoŋinae, emam ibore itorenene nen, nyeriŋa epupyo ŋaatuk erwosi a nen, aekasi ŋikeny ka ŋityaŋ a nen.

¹¹Eturuwori ayoŋ Yerusalem neni etukotor ŋamoru ŋuna eritakinitae kwap, eturuwori iŋes neni eperyoto ŋikweei; ka eturuwori ŋitaunio a Yudaya ŋireŋoroto, neni emam ŋituŋa iboiyete alotooma kec.”

¹²Ŋae eyakar aosou ŋina itemokino, ikotere eyenunia ŋakiro nu? Ŋae alimoki Ekapolon ŋakiro keŋ, ikotere elimoryo? Kaanukiro enyasunor akwap ka aruworor ekasile ikwa aloŋisat, ido emam ibore itorenene nen?

¹³Irworo Ekapolon ebala, “Aŋuna emyekiniata ikes akiwuap ŋikisila kaŋ ŋulu abu ayoŋ oinak ikes ka aŋuna aŋerito ikes akiwuap ŋakiro kaŋ, kori aŋerito akiwuap ŋuna atubunit ayoŋ,

¹⁴nai anakisyaanu kec, ewuapa ikes ŋuna a ŋitai kec ka ilipete neni ata Baal, lopite ŋolo etatamitotor atapapaa kec ikes akitiya.

¹⁵Alimu tokona Ekapolon ŋolo a ŋajoresyo Akuj a ŋituŋa a Isirael atemar ainakini ayoŋ ŋituŋa lu ekurut ŋolo a ŋakito kimuja ka ainakini ikes tomata ŋakipi ŋuna eyai ibore ŋini aaran.

¹⁶Ealari ayoŋ ikes nakwapin ŋuna nyeyenete ikes, kori ŋuna pa ayenete atapapaa kec, ido eyakikini ayoŋ ikes ŋimoe ŋulu epote akitijiore ikes tari ŋina amunyarya ayoŋ ikes daadaŋ.”

¹⁷Irworo Ekapolon ŋolo a ŋajoresyo ebala, “Totamatamata ŋakiro ŋuna epote akitiyakin, tonyarata ŋaberu ŋuna epote akigworo, tonyarautu ŋaberu ŋuna eyenete akigworo potu;

¹⁸emaikina ikes potu atipei kiwololoto aŋuna yok akitodol ŋina eleleiyaryata ŋakiyo anakonyen yok, kibwaliyasi ŋakiyo ŋakonyen yok,

¹⁹anerae epupyo akiwolol a ŋituŋa alo Sion ebasi, ‘Amunyaroi iwon! Aryamun iwon ŋileec nooi, emaikina iwon emyekisi akwap yok, anerae amunaar ŋakais yok.’

²⁰Okoe ŋaberu, kiirasi ŋakiro ŋuna ke Ekapolon, topupokisi a ŋaki kus ŋakiro ŋuna elimuni Ekapolon, kitatama ŋidwe kus ŋulupesur akiwolol, kitatama ŋikidunyet kus epite ŋolo kiwololoet.

²¹Adolu atwanare lodirisae kus, aloma nakais a apukan kus, ebunit atwanare alemar ŋidwe kus alorotin ka ŋisorok analapatui a ŋuna ke etaun.

²²Irworo Ekapolon ebala, ‘Eperete anariet ikwa aoret ŋawat a ŋituŋa a ŋulu etwakito, eyakaun ikes nen ikwaan ka ŋatukon a ŋakasirim ŋuna imyekini ekaleman emanikor, ido mam ituŋanan epedori acunakin iwapei ŋawat a ŋituŋa a ŋul.’

²³“Alimu Ekapolon atemar, nyicamakis ŋikaosok iturotor aosou kec, nyicamakis ŋikagogoŋ iturotor agogoŋu kec, ka nyicamakis ŋulu ebarito iturotor abaru kec,

²⁴nai emaikina ŋulu iturosi kituros a ŋakiro a nu atemar eyenete ikes ka akayenete ikes ayoŋ atemar arae ayoŋ Ekapolon, etiyae ayoŋ ka amina a ŋina nyiryaŋiryaŋa, a akiyookino ka atubi ŋakiro anakwap anakiyookino, anerae eketalakarito ayoŋ ŋipitesyo ŋul.

²⁵Kire jik, eponito ŋirwa ŋulu esicania ayoŋ ŋituŋa ŋulu ileŋeritae lu:

²⁶Ŋituŋa a Ejipit, a Yudaya, a Edom, Ŋiamoni, ŋituŋa a Moab ka daadaŋ ŋulu iboiyete analoŋisat anakiboisyo a ŋuna alwanak, anerae mam kire jik nyileŋeritae ŋituŋa ŋul daadaŋ ka ŋituŋa a Isirael daŋ mam nyiwuapito acamunet kaŋ.”