Read ngakarimojong Aum. 1 Bible Online

Aum. 1 - ngakarimojong bible

Aum. 1

¹Kesilyor etaun lo, ŋolo paaran eleleba ŋituŋa! Ekwaanikin bareca iŋes ka apuserut, torae bo sek arae iŋes etaun ŋolo etopoloorito ŋituŋa a ŋakwapin! Etaun lo iŋes sek epol anakiboisyo a ŋunace, ekwaanikin tokona ka epito.

²Igworo iŋes akuwar kya epipilikinito ŋakiro, eleleete ŋakiyo alokelyo keŋ, mam ŋikonei keŋ ŋuluŋorok daadaŋ ŋolo ebuni akisirworiun iŋes; alukis iŋes ŋikonei keŋ daadaŋ, aruwor ŋikonei keŋ daadaŋ ŋimoe keŋ.

³Adokis ŋituŋa a Yudaya nakwapin aŋuna a ŋican ka areikinit akitiya etic, iboiyete tokona ikes anakwapin a ŋace, mam akibois ŋina ituruworito ikes ŋina kec. Adaut ŋikewuapak kec daadaŋ arukaun ikes eriŋa epapanito.

⁴Igworosi ŋirotin ŋulu elomarere Sion, anerae mam ituŋanan elosenene Sion akitiya ŋasuban ŋuna sek emaikina kitiyaeneneetei a nen; Asilut ŋipukei a Sion daadaŋ, eumenete ŋisacaradotin keŋ; iyaloloŋete ŋapesur ŋuna eya Sion, eryamunit Sion ŋican ŋulu apipilak.

⁵Aruwor ŋimoe a Sion ŋikapolok keŋ, aruwor ŋikelounak, anerae emyek Ekapolon Sion toryamu ŋican aŋuna a ŋasecisya keŋ a ŋuna alalak nooi; alot ŋituŋa a Sion nakwapin, aruwor ŋirikon a ŋimoe a kec.

⁶Adaun ailiil a ŋituŋa a Yerusalem daadaŋ. Ekwaanikin ŋikapolok a Sion ka ŋatili ŋuna alemun aŋuna ecanakinotor ŋinya; apotu ikes tonaparos epalag alokiŋaren ŋikewuapak kec.

⁷Alorwa a ŋulu a ŋican ka akirimit, apotu ŋituŋa a Yerusalem totamut ŋiboro kec daadaŋ ŋulu apol egyelit ŋulu ayakatar ikes ekiŋaren. Ani eyakaun ŋituŋa a Yerusalem napedor a ŋimoe kec, abu todaun ituŋanan iŋarakini ikes. Apotu ŋimoe a Yerusalem kitekis Yerusalem, ido ekyenatar aŋuna ka akinyasuno keŋ.

⁸Apotu ŋituŋa a Yerusalem toseca nooi, aŋun, eturuwor iŋes etaun ŋolo ejamuwaritae, ajamuwasi iŋes ŋituŋa daadaŋ ŋulu sek etopoloorito, anerae eŋolikis emam ibore eyai; eumenete ŋituŋa keŋ ka nyecamito akiŋolikin etaun kec.

⁹Ileere jik asiilyo a ŋituŋa a Yerusalem, nai apotu ikes nyitiyata ŋadi akiretakinia ŋican aneni kec. Arono nooi akinyasuno kec, mam ituŋanan epedori akisirworiun ŋituŋa a Yerusalem. Ebasi ŋituŋa keŋ, “Okoe Ekapolon, kiŋolik kareca ŋican ŋulu eryamunitae isua, anerae ikilout isua ŋimoe kosi.”

¹⁰Aŋatasi ŋimoe ebari daadaŋ alo Yerusalem. Apotu ŋituŋa a Yerusalem kiŋolikis ŋituŋa a ŋakwapin elomarete tari nakibois ŋina asegan, arae ŋituŋa ŋul ŋulu sek etaleorit Ekapolon alomar natukot a ŋituŋa a Yerusalem.

¹¹Eumenete ŋituŋa a Yerusalem daadaŋ iwarito ibore ŋininyamat; ilokonyiyanarete ebari kec nakimuj aŋuna ka arubakinia eyarete. Igworosi ŋituŋa a Yerusalem ebasi, “Okoe Ekapolon, kiŋolikinae isua, kiŋolik epite ŋolo ikiruworor isua ŋulu ikijamuwaritae.”

¹²Ebasi ŋituŋa a Yerusalem, “Erae mono ŋican lu ŋikoŋinae aneni kus iyes ŋituŋa daadaŋ ŋulu itoreneneete Yerusalem a? Kiŋolikisi mono iyes ŋakwapin ŋunace, eyakasi ŋican ŋulu eryamunito ikes ŋulu ikote ŋulu eryamunitae isua a? Eyakasi mono nakwapin ŋican ŋulu ikote ŋulu eyaunit Ekapolon neni kosi anapaki a ŋina ka aŋoit keŋ nooi a?

¹³“Abu Ekapolon kiyaku akim alokidiama, abu akim ŋin itonom isua todol tari nakoyo. Abu Ekapolon topeta atibait keŋ akikamunia ŋakejen kosi kiŋoliyarae neni sek aponere. Abu Ekapolon ikimyek isua make, eryebae apaaran jwii.

¹⁴“Abu Ekapolon kiŋolik ŋasecisya kosi daadaŋ, tocunak ŋasecisya ŋun daadaŋ iwapei, kituruwo egogos aneni kosi, apotu ŋasecisya ŋun ikinuwasi isua. Abu Ekapolon ikipotok isua napedor a ŋimoe kosi a ŋulu pa ikipedorit awoikin.”

¹⁵“Adau Ekapolon akiŋer ŋikajiok kosi daadaŋ, adau anyaraun ŋasigarya akiman isua ka amunyar ŋisorok kosi. Epudaiya Ekapolon ŋituŋa kosi ikwa ipudaere ŋaraito a epiini aneni ecuyere.

¹⁶“Ikigworo isua a ŋakiro a ŋun, eleleete ŋakiyo anakonyen kosi, anerae elwana nooi ŋini ikisirworiuni isua, emam ŋini ikisimukekini isua. Ikireut isua ŋimoe kosi, mam ibore eriŋa idoŋit neni kosi.”

¹⁷Ibaanarete ŋituŋa a Sion ŋakan kec, nai mam ituŋanan isirworiuni ikes. Adau Ekapolon alimokin ŋiletok a Yakob atemar eruwor ŋikidunyet kec ŋimoe kec. Aruwor Yerusalem etaun ŋolo esiilyana aneni kec.

¹⁸Ebasi ŋituŋa a Yerusalem, “Erae Ekapolon ŋolo iyookino, nai isua aŋeri ŋakiro keŋ. Topupokisi mono iyes ŋituŋa daadaŋ; kiŋolikisi ŋican ŋulu ikiryamunit isua. Arikor nakwapin ŋisorok ka ŋasorok kosi.

¹⁹“Aponi isua tonyarae ŋituŋa ŋulu sek ikiriit ka isua, nai apotu ikes ikilukis isua. Apotu ŋisacaradotin ka ŋikasikou kosi totwanikis lotaun eriŋa iwarito ibore ŋininyamat aŋuna ka arubakinia eyarete.

²⁰“Kiŋolik mono iyoŋ okoe Ekapolon epite ŋolo ikiryamunitor isua ŋican, ikiryebete isua ŋakiro nooi; emam akinapakina eyai lotai kosi, anerae aponi isua toruworotei ŋikaŋerok. Ani ikilomari isua kiŋa ikiari; ani ikiboi alotooma ŋakais daŋ ikiwuapunit atwanare.

²¹“Adaut ŋituŋa akiirar aumen kosi, nai mam ŋini ebuni akisirworiun isua. Adaut ŋimoe kosi daadaŋ akiirar ŋican kosi; elelyanete ikes aŋuna idau iyoŋ akitiya. Kitodolu kareca akoloŋit ŋina sek ilimunit iyoŋ, ikotere ŋimoe kosi ekwaanikinos ka isua.

²²“Kiŋolik aronis daadaŋ ŋina itiyaete ikes, kisican ikes; lopite ŋolo ikisicania iyoŋ isua aŋuna a ŋasecisya a daadaŋ a ŋuna etiyae isua. Elalak nooi ŋakiro ŋuna eumenere isua ka apapanut ŋitai kosi.”