Read ngakarimojong Aum. 3 Bible Online

Aum. 3 - ngakarimojong bible

Aum. 3

¹Arae ayoŋ epei ŋolo adau akiŋolikin akisicanet, akisicanet ŋina ebunit ananyunyura ka Akuj.

²Abu Akuj okoya ayoŋ oloma nakiryonut neni amam akica.

³Abu Akuj ekesican ayoŋ bon, okoboŋonok akisican apaaran jwii.

⁴Eturuwo iŋes akiriŋ ka amuny a akuwan kaŋ ŋuna enyamuna ka abilibilaa ŋakoyo kaŋ.

⁵Akagoloki Akuj ayoŋ neni aryamunitor ŋican ka aryeba.

⁶Eketuruwo Akuj ayoŋ ŋolo eboi anakiryonut ikwa ŋituŋa ŋulu koloŋ aberakin atwakare.

⁷Akagoloki Akuj ayoŋ nen, adaun epite ŋolo asiya a nen; akaen iŋes ayoŋ a ŋiriko a ŋulu agogoŋok.

⁸Tari kanyaraanar ka kegworo aŋuna ka akiŋarakino, eŋerit Akuj akilip kaŋ;

⁹Agoloki Akuj ŋamoru ŋuna aburok lorot kaŋ eketoŋopik ayoŋ neni kitoro.

¹⁰Akadapunit Akuj ayoŋ lopite ŋolo edapunia etyaŋ ŋolo adedeŋan ibore; lopite ŋolo eŋopya eŋatuny edapunit ibore.

¹¹Abu Akuj ekesimyek ayoŋ erot kaŋ, eketapapanu ayoŋ, ido ekemyek a nen.

¹²Abu iŋes kiketak akau a ŋikaleŋeleŋe keŋ, toruwor ayoŋ ekepimit.

¹³Abu iŋes togumak ŋikaleŋeleŋe a atoros keŋ daadaŋ nakuwan kaŋ.

¹⁴Aruwor ayoŋ ŋolo akakyenatar ŋituŋa kaŋ daadaŋ, ekerworotor ikes ayoŋ ka akakyenatar apaaran jwii.

¹⁵Eketeryamu Akuj ayoŋ ŋican ŋulu apolok nooi, eketeryamu Akuj ayoŋ ŋican ŋulu nyapedorit akidaŋidaŋ.

¹⁶Eketeryamu Akuj ayoŋ ŋican ŋulu atyonok nooi, ekesican iŋes ayoŋ nooi; eketuruwo iŋes ayoŋ ekeboiyon alokuron.

¹⁷Alemar ekisil aneni kaŋ; ekemuryak ayoŋ ibore ŋini erae alakara.

¹⁸Aŋun, abala ayoŋ, “Adaun apolou kaŋ, adaun daadaŋ ŋuna sek egeno ayoŋ aryamun aneni a Ekapolon.”

¹⁹Ani ŋina atamunia ayoŋ ŋican kaŋ ka amamukau neni eboiyo, erae ŋican ŋulu apipilak ka ŋulu adwarak tel.

²⁰Erubakini etau kaŋ etamununui jik, ido tosiliyo otakin cek.

²¹Nai atamununui ayoŋ nu, aŋun, ayakar ayoŋ akigeno:

²²Nyedaun amina ke Ekapolon ŋina nyiryaŋiryaŋa, nyedaun akisyon keŋ;

²³Ikiteteununui Ekapolon ŋun a ŋinataparacu, epol nooi akikinyoma ŋina a Ekapolon.

²⁴Abala ayoŋ erworo neni kaŋ bon, “Ekapolon bon ikiyakar ayoŋ, aŋun, iŋes bon ekinyomit ayoŋ.”

²⁵Erimaanikinit Ekapolon ŋituŋa daadaŋ ŋulu ikinyomito iŋes, erimaanikinit daadaŋ ŋulu iwarito iŋes.

²⁶Ejok ŋinituŋanan torubak idarit Ekapolon anatitinyu; ejok ŋinituŋanan torubak idarit Ekapolon toiu iŋes.

²⁷Ejok nooi ŋinituŋanan akidaŋidaŋ ŋatyokisyo keŋ alorwa a ŋulu ka asoroko keŋ.

²⁸Ani apaki ŋina eryamunia ituŋanan ŋican, emaikina kiboikin neni keŋ bon ekililiŋat, anerae Ekapolon eyaunit ŋican ŋul.

²⁹Emaikina ŋinituŋanan kitiditeun bon, acepaki eyakaun akigeno neni a ituŋanan a ŋin.

³⁰Tari daŋ kikibuŋao ka kikiyanyo iwon, emaikina iwon edaŋidaŋa ŋun daadaŋ.

³¹Erae Ekapolon ŋolo isyoniono, nyerubakini iŋes ikiŋerit iwon ŋikaru ka ŋikaru.

³²Epedori Ekapolon ayaun aryeba neni yok, nai ikisyoni iŋes iwon anamina keŋ a ŋina nyiryaŋiryaŋa.

³³Nyelakara Ekapolon ikisicani iwon, kori ikiinakini aryeba.

³⁴Ani mono apaki ŋina isicanere ŋituŋa alojera,

³⁵apaki ŋina etubere ŋakiro a ŋituŋa, emam akiyookino alokiŋaren Ekapolon ŋolo alokidiama nooi,

³⁶apaki ŋina ilocere ŋuna a kire aloikiikoe nyite mono Ekapolon ŋun a?

³⁷Ŋae elimuni ŋakiro kitiyakinae erae pa ketubunit Ekapolon ŋun?

³⁸Meere mono neni a Ekapolon a ŋolo eyai kidiama nooi eponeniata ŋuna ajokak ka ŋuna aronok a?

³⁹Kaanukiro ikiŋuruŋurar iwon, iwon ŋituŋa apaki ŋina ikisicanere aŋuna ka asecit yok?

⁴⁰Emaikina iwon eŋolikisi make ŋipitesyo yok, ido oboŋosi akiwuap ŋuna ke Ekapolon.

⁴¹Elipa a ŋitai yok a daadaŋ neni ka Akuj a ŋina eyai nakuj, ikikyaarit ŋakan ikibala,

⁴²“Ikisec isua ka adaun isua akiŋer iyoŋ, ido nyisyonio iyoŋ isua.

⁴³“Ikiŋoik iyoŋ isua daadaŋ ka irubak ikiwuapit isua ikiari emam akisyon.

⁴⁴Aŋuna iŋoitor, ieka iyoŋ aneni kosi, ikotere nai nyikiira iyoŋ isua ikilipi neni kon.

⁴⁵Ikituruwo iyoŋ isua ŋulu ikisiilyaka ka ŋikoŋinae ikiteete ŋituŋa a ŋakwapin.

⁴⁶“Ikiyanyete ka ikijamuwarito isua ŋimoe kosi daadaŋ.

⁴⁷Adaut ŋimoe kosi akitubul isua ka alokit isua, adaut akinyasun ka amunaar isua.

⁴⁸Eleleete ŋakiyo anakonyen kaŋ aŋuna amunyarere ŋituŋa kaŋ.

⁴⁹“Erubakinete ŋakiyo eleleete anakonyen kaŋ, mam nyejoŋoete alel,

⁵⁰akitodol ŋina iŋoliunia Ekapolon anakuj kwap kiŋolik epite ŋolo eryamunitotor ŋituŋa keŋ ŋican.

⁵¹Iyaloloŋi etau kaŋ nooi eŋolikini ŋuna etiyakin neni a ŋituŋa a daadaŋ a ŋulu a etaun kaŋ.

⁵²“Apotu ŋimoe kaŋ ekekamasi ayoŋ ikwa ikeny, tomam bo aronis etiyat ayoŋ neni kec.

⁵³Apotu ekemasakis ayoŋ nakipany ayari, ido togolo akipany a amoru.

⁵⁴Apotu ŋakipi toburusiyasi akou kaŋ anakipany a ŋin; abu ayoŋ otema, ‘Adau ayoŋ acakar.’

⁵⁵“Okoe Ekapolon, abu ayoŋ ekalou neni kon apaki ŋina asiporitor kwap akipany;

⁵⁶ibu iyoŋ kiira adyekitoi kaŋ ŋina abaakar, ‘Nyiwou akiirar ŋakiro kaŋ ŋuna ekegworonokinio iyoŋ ikiŋarak ayoŋ.’

⁵⁷Ibu iyoŋ bu neni kaŋ, apaki ŋina akanyaritor ayoŋ iyoŋ, Itolimok ayoŋ ebe, ‘Nyikuryaniar.’

⁵⁸“Okoe Ekapolon, ibu iyoŋ towo aŋuna kaŋ, ibu iyoŋ tolaku akiyar kaŋ.

⁵⁹Okoe Ekapolon, iŋolik iyoŋ ŋuna aronok ŋuna itiyato ŋimoe kaŋ neni kaŋ, kitiya ŋuna iyookino aŋuna kaŋ.

⁶⁰Iyeni iyoŋ epite ŋolo ekemanitotor ayoŋ ŋimoe kaŋ ka daadaŋ ŋuna eyeete ikes ekemanito ayoŋ.

⁶¹“Okoe Ekapolon, iira iyoŋ ikes ekeyanyete ayoŋ, iyeni iyoŋ daadaŋ ŋuna eyeete ikes akitiya ekemanito ayoŋ.

⁶²Ekeŋaiŋaatar ka ekerworotor ikes ayoŋ apaaran jwii.

⁶³Kiira iyoŋ Ekapolon, ekerworotor ikes ayoŋ ŋinapaki daadaŋ akajamuwarito.

⁶⁴“Okoe Ekapolon, aŋuna a ŋiticisyo kec, kisican ikes lopite ŋolo emaikina kisicanere ikes.

⁶⁵Kituruwo ikes ŋulu iyaloloŋete, kimyek ŋilam kon pena neni kec.

⁶⁶Tonyunyurikin ikes tomunya, todaunos anakwap.”