Read ngakarimojong Aum. 4 Bible Online

Aum. 4 - ngakarimojong bible

Aum. 4

¹Ekwaanikin tokona ŋituŋa kosi ka egolid ŋolo aaŋoryan. Ekwaanikin ŋituŋa kosi ielara ka ŋamoru ŋuna ka Akai ka Akuj ŋuna tokona ielakina lorotin ŋulu ke etaun.

²Ekwaan ŋisorok a Sion ejokak aneni kosi ka egolid, nai tokona etiŋitae ikes pa itojokitae nooi, etiŋitae ikes esibit ŋamoti ŋuna epatana abwaŋa.

³Tari ŋikweei itanakete ŋitak kec, nai aryenyaaka ŋituŋa kaŋ, etiŋito ŋidwe ka aryenyeo, lopite ŋolo imyekiniata ŋakaleeso ŋitak kec analoŋisat.

⁴Emyekis ŋaberu ŋiŋwea kec eari akoro ka akure; ilipanarosi ŋidwe aŋuna ka akimuj, nai mam ituŋanan einakini ikes akimuj adio.

⁵Atwanikis lorotin ŋulu ke etaun ŋituŋa ŋulu sek imujete ŋamuja ŋuna ajokak; eperete aneni emudio ŋikurono ŋituŋa ŋulu sek ayakatar apolou.

⁶Esicani ŋituŋa kaŋ nooi, elo akisicanio kec tari ŋina a ŋituŋa a Sodoma; a etaun a ŋolo abu Akuj tomunya ŋituŋa keŋ atipei todaun ikaiunan.

⁷Ajokak nooi ŋikarikok kosi, arae ikes ŋulu amalimalak a ŋawat ka ajokak ŋawat.

⁸Nai tokona atwaka ikes, eryoketa ŋawat kec cuc ikwa etulya, mam ituŋanan epedori akiyen ikes alorotin a etaun. Aoniki amuny ŋina ka akuwan nakoyo kec; aono a nen ekwaanikin ka akitoe ŋina aonon.

⁹Apotu ŋituŋa ŋulu etwakete aŋuna ka akoro toryamut aryebo ŋina apipilan alotuŋa a ŋulu earyo alojie. Abu akoro kisirid ŋituŋa ŋul tari ŋina atwakyata aŋuna amamukar akimuj ŋina alemunito alomanikorin kec.

¹⁰Apaki ŋina aryamunitotor ŋituŋa kaŋ ŋican; apotu tari ŋaberu ŋuna sek aminasi ŋidwe kec, kipoto ŋidwe kec toruwor akimuj.

¹¹Abu Ekapolon toŋo nooi, tonyunyur eryenyaana nooi; kinokak akim Sion ŋina abu tonyamuwa etaun tari neni isyakinitotor ŋaduketa.

¹²Mam erwosit anakwap, kori ituŋanan idio anakwap ŋini anupit atemar epedorete ŋimoe alomar tooma Yerusalem kitoro lopukei.

¹³Nai apotu ŋimoe topedosi, anerae apotu ŋikadwarak keŋ ka ŋisacaradotin keŋ toseca aŋuna aaryata alotooma etaun ŋituŋa ŋulu pa asecito.

¹⁴Apotu ŋikadwarak ka ŋisacaradotin a Yerusalem kitwaŋata alorotin a ŋulu ke etaun esibit ŋimudukanotin, apotu ikes toruwor ŋulu etoroniyaritae aŋuna atapyata ŋaokot, mam ituŋanan amaikina totap ikes.

¹⁵Acelasi ŋituŋa neni kec ebasi, “Kiyotokis a ne! Irae iyes ŋulu ikitoroniyaritae! Nyikitap ayoŋ!” Aŋun, apotu ikes toruwor ŋikaŋopoŋopotok ka ŋikerimitok ŋakwapin, ido mam ituŋanan abu kijau ikes.

¹⁶Abu Ekapolon kiela ikes, nyemitak ikes nabo jik. Abu Ekapolon nyitopoloo ŋisacaradotin ka nyeminak ŋikasikou kec.

¹⁷Aponi isua kidarae ikiŋarak akwap adio, nai mam akiŋarakinet aponi toryamunae anakwap ka adio.

¹⁸Ikiwarito isua ŋimoe kosi, aŋun, nyepedoritae isua alosit alorotin a etaun. Abu adaun kosi toapu, emaruna ŋirwa kosi, anerae abu todol isua adaun.

¹⁹Apiraka nooi ŋituŋa ŋulu ikirisito isua, apiraka nooi akilo tari ŋigolei ŋulu iuwaunun alokidiama. Apotu ikes ikiritut isua alokidiama ŋikamukumukui. Apotu ikidapa isua analoŋisat.

²⁰Apotu ikes kikamasi erwosit kosi ŋolo amecitae isua neni keŋ, ŋolo arae Ekapolon abu toseu aruwor erwosit. Erwosit ŋolo sek ekinyomitae isua atemar ikiuni iŋes isua alomoe a daadaŋ.

²¹Tolelyana ka tolakaros iyes ŋituŋa ke Edom ka ŋituŋa ŋulu iboiyete alo Us. Imerakinosi iyes, ilosete ilerete iteriterosi.

²²Okoe ŋituŋa a Sion adaun akisican iyes aŋuna ka asecit kus; nyerubakini Ekapolon ikimyekinit iyes iyakasi nakwapin. Nai okoe iyes ŋituŋa ke Edom ikisicani iyes Ekapolon aŋuna a asecit kus, isileereuni Ekapolon ŋasecisya kus.