Read ngakarimojong Ab.Yer 1 Bible Online

Ab.Yer 1 - ngakarimojong bible

Ab.Yer 1

¹Erae nu ŋakiro ŋuna egiritae nabaruwa ŋina abu Yeremia kiyakiya neni a ŋituŋa a ŋulu etemokinitoe aŋuna ka ayaar Babilon ikwapei ŋirikoro a erwosit a Ŋibabiloniyae; eyakiyari Yeremia abaruwa ŋin kiteyenikinia ŋituŋa ŋul ŋakiro ŋuna abu Akuj tolimok iŋes.

²Ŋakiro ŋuna egiritae nabaruwa a Yeremia ikes nu; “Aŋuna a ŋasecisya kus a ŋuna ipotu iyes toseca alokiŋaren Akuj, ikirikoryo iyes irae ŋirikoro a erwosit Nebukadinesar a erwosit a Ŋibabiloniyae.

³Aŋun, ani idolete iyes Babilon, iboiyete iyes aina ŋikaru ŋulu alalak, apaki ŋina aoyan akitodol ŋina elunyarotor ŋanyameta ŋakanikaarei. kelunyar apaki ŋin, akayauni nai ayoŋ iyes aina a ekisil.

⁴Ani iyakasi iyes Babilon, iŋolikinete iyes ŋakujo ŋuna itiyaunitae a esilipa, a egolid ka a ŋakito, ŋakujo ŋuna eryoŋito ŋituŋa, ŋuna einakinito ekabule neni a ŋituŋa a ŋulu nyenupito neni ka Akuj.

⁵Aŋun, toceito ikwaanikinosi ka ŋituŋa ŋulugelae, kori nyicamut akuryanu min neni kus aŋuna a ŋakujo a ŋun,

⁶apaki ŋina iŋolikiniata iyes ŋituŋa ŋulu alalak alokiŋaren ka alokaku a ŋakujo a ŋun ilipete neni kec. Nai temasi alotai kus ebe, ‘Okoe Ekapolon, neni kon bon emaikina isua kilipae.’

⁷Eyai emalaika kaŋ kaapei ka iyes, ido iyoki iŋes akiyar kus.”

⁸Erae ŋakujo ŋun ŋuna erae ŋikeceak ŋabaoi ikes itusulutito ŋaŋajepa kec, eburisikinitae ikes egolid ka esilipa, nai erae ikes ŋacaryo, ido nyepedorete akirworo.

⁹elemununuyete ŋituŋa egolid kitiyauniata ŋibokoto ŋulu iwuanakinio ŋakyes a ŋakujo kec, lopite ŋolo itanapyata ikes apese ŋina emina akisir akuwan keŋ.

¹⁰Ŋapakio ŋace, elemanarete ŋisacaradotin anakimunono egolid ka esilipa anakujo kec, ido kiŋarakinotor,

¹¹kori daŋ inakis ece neni a ŋamalaae. Itanapete ikes ŋakujo kec ŋilowi esibit erae ŋituŋa, torae bo ŋakujo ŋuna itiyaunitae a esilipa, egolid ka ŋakito

¹²ŋuna nyepedorete aiun make aloroiroi ka anamunaar; kedaun akitanap ŋakujo ŋun ŋikaasoi ŋulu kipura-areŋak,

¹³enanaryo aloreetin kec apuwa ŋina kebu kidyatakin loreetin kec alo kai ka akuj.

¹⁴Etiŋi apei a ŋakujo a ŋun ebela ŋolo ka apolou esibit ekatubon ŋakiro a akibois ka adio, nai nyepedori iŋes akiar ituŋanan ŋini abu kitoŋo iŋes.

¹⁵Etiŋi ace ekileŋ ka aep anakan keŋ a ŋina aloteten, nai nyepedori aiun bon alomoe ka alokokolak.

¹⁶Anakiro a ŋun, ileere atemar nyerae ikes Akuj, aŋun nyikuryaketa aŋuna kec.

¹⁷Lopite ŋolopei ebwaŋar asaani a ituŋanan toruwor acaryoit,

¹⁸ŋakiro kec daŋ erae ŋacaryo esipitoe nakais kec. Ileleba nakonyen kec apuwa ŋina edounit anakejen a ŋulu elomanarete nen ka ikwaŋina egolitere ŋipukei a akai a ŋina egolokinitoe ituŋanan ŋini itoŋoit erwosit, esibit etubokinitae atwanare, ikwaŋinapei egolete ŋisacaradotin a ŋakais a ŋakujo a ŋun ŋipukei, a ŋigolyata ka a ŋakiloris, ikotere nyelemasi ŋikokolak ŋiboro a ŋakujo a ŋun.

¹⁹Inokanakinete ŋisacaradotin ŋitaae ŋulu alalak aŋuna a ŋakujo a ŋun akilo ŋitaae ŋulu inokanakinete ikes aŋuna kec, nai nyiŋolyanakinete ŋakujo ŋun tari epei a ŋitaae a ŋul.

²⁰Ikwaan ŋakujo ŋun ka ŋipirin a akai ka akuj, nai ebookoi, irikarete ŋiboorei ŋulu elyato alokwap ŋitai kec ka ŋikaasoi kec apaki ŋina elomuniata alokwap. Nyeyenunete ikes

²¹atemar eryoketa ŋireetin kec apaki ŋina isiryonunia ikes apuru ŋina a akai ka akuj.

²²Imodiŋete ŋimenwa, ŋikaporokokoe ka ŋikyeny ŋacin ŋuna akwaŋak nawat ka ŋakyes a ŋakujo a ŋun, ŋikapae daŋ itiyaete ŋunapei.

²³Anakiro a ŋun, iyenunete iyes atemar nyerae ikes Akuj, aŋun nyikuryaketa aŋuna kec.

²⁴Ani eruwor egolid ŋolo itanapikinitae ikes aŋuna ka akibuses, nyemilimiliuni egolid ŋol mati kenanaiya ituŋanan apuwa, anerae tari apaki ŋina etiyaunere ŋakujo ŋun pa ayenete ikes atemar ikitiyao.

²⁵Egyelununuyo ikes pa etubunitoe etyae a egyelit kec, nai mam nyieŋasi ikes.

²⁶Emamukatar ŋakejen, eryoŋitae ikes aloseketa a ŋituŋa, isileereunit nen atemar erae ikes ŋacaryo, ido isirumyo ŋulu itiyanakinete ikes ŋileec,

²⁷anerae kecakakin adio a ŋakujo a ŋun kwap, emaikina ŋituŋa ŋulupei ŋul todakut ŋakujo ŋun. Ani kitowo ituŋanan idio ŋakujo ŋun, nyepedorete ikes arotokin bon, ido ani kitirii adio a ŋakujo a ŋun, nyepedori iŋes akiwo bon kitenari. Iwuanakinio ŋainakineta kiŋaren ŋakujo ŋun ikwaŋina iwuanakinere kiŋaren ituŋanan ŋini etwanit.

²⁸Egyelanarete ŋisacaradotin ŋainakineta ŋuna eyaununuyo neni a ŋakujo a ŋun, ido kisitiyata ŋisiliŋa aŋuna kec a ŋilopeyek. Ikwaŋinapei, iŋadaanarete ŋaberu a ŋisacaradotin a ŋul akiriŋ ace, iwuanakinete acumbi ikotere nyemunaar, nai nyeinanakinete adio daŋ neni a ŋulu a ŋican, kori neni a ŋikulyak.

²⁹Etapatapaete tari ŋaberu ŋuna eya lolap, kori ŋuna ariŋa idounete ŋamuronisya a ŋakujo a ŋun. Ikwapei iyeniata iyes anakiro a ŋun atemar nyerae ikes ŋakujo, nyikuryaketa aŋuna kec.

³⁰Kaanukiro nai enyaritere ikes ŋakujo? Ŋaberu ikes ekorete akimuj a ŋakujo a ŋuna itiyaunitae alosilipa, alogolid ka a ŋakito,

³¹ido iboiyete ŋisacaradotin anakais a ŋakujo a ŋun ecilicilya ŋilowi kec ka ebanyaritae ŋakyes ka ŋipeneka kec, ido nyimukito ŋakyes.

³²Iwololoete ka ecelasi ikes alokiŋaren ŋakujo kec lopite ŋolo itiyaere anasuban a ŋuna enukere ituŋanan.

³³Eyaanarete ŋisacaradotin ŋilowi a ŋakujo kec, kitanapikis ŋaberu kec ka ŋidwe kec.

³⁴Ani kitiya ituŋanan ŋuna aronok, kori ŋuna ajokak, nyisicanete, kori nyitalakarete ŋakujo ŋun ituŋanan ŋin. Nyepedorete ikes akiwuakin erwosit kipuka, kori nyelemarete erwosit anakipuka.

³⁵Ikwaŋinapei nyepedorete ikes ainakin ituŋanan ebari, kori ŋisiliŋa; ani kikoŋ ituŋanan anakiro a ŋadi neni kec, ido nyisiyook ŋuna ikoŋit, nyiitanete ikes ibore ŋin.

³⁶Nyeiunete ikes ituŋanan anatwanare, kori nyeiunete ŋulu epalag aneni a ŋulu agogoŋok.

³⁷Nyitaŋaleunete ikes ituŋanan ŋini emudukana kiŋolik akwap nabo, nyeiunete ikes ituŋanan ŋini eyai locan.

³⁸Nyisyoniyete ŋakujo ŋun apuserut, kori nyitiyaete ajokis neni a ikoki.

³⁹Ŋiboorei ŋul ŋulu itiyaunitae anakito, ido toburusikinitetei egolid ka esilipa, ikwaan ka ŋamoru ŋuna ke emoru, ido ŋulu itiyanakinete ikes, isirumyo ŋileec.

⁴⁰Kaanukiro nai emaikina ŋituŋa etamete atemar erae ikes Akuj, kori enyaritere ikes ŋakujo? Nyitopoloorito tari Ŋibabiloniyae ŋakujo ŋun, anerae ani iŋolikinete ikes ituŋanan ŋini nyepedorit akirworo, eyaunete ikes Bel ka kilipa ikotere ituŋanan ŋin epedori erwor, esibit epedori Bel ayenun ŋakiro.

⁴¹Kikote neni daŋ, nyepedorito ikes akiŋolikin ŋakiro ŋun, ido kimyekis ŋakujo ŋun, anerae nyepupete ŋakujo ŋun ŋakiro.

⁴²Iboiyonokinosi daŋ ŋaberu lorotin eenito ŋaunoi nacirin kec kicunyete ekinyate.

⁴³Ani erikori ipei a ŋulu itorete nen aberu apei akiya akiryamakin ka iŋes, ejamuwari aberu ŋin aberu ŋina eboi alodiyete keŋ, anerae pa apedorit aberu ŋin anirar ekile lopite ŋolo anirarya iŋes ka nyeŋedara auno keŋ.

⁴⁴Erae amodiyo ibore daadaŋ ŋini itiyao neni a ŋakujo a ŋun. Kaanukiro nai emaikina ŋituŋa etamete atemar erae ŋitorubei ŋul Akuj, kori enyaritere ikes ŋakujo?

⁴⁵Erae ŋikeceak ŋabaoi ka ŋulu itiyaete ŋiboro a egolid ikes itiyaununeete ŋakujo ŋun, nyepedorete ikes aruwor ibore ice, nai erae ikes ibore ŋini itiyaunito ŋulu eyenete akitiya ŋiboro.

⁴⁶Kire jik, nyeyarete ŋulu itiyaununeete ikes apaki ŋina aoyan;

⁴⁷alipite nai eruworotor ŋiboro ŋulu itiyaunete ikes Akuj? Emyekis ikes amodiyo ka aŋoikinit aneni a ŋulu epote ekaku kec;

⁴⁸anerae ani eyakaun ejie, kori epote ŋican neni kec, etukunete ŋisacaradotin kaapei neni epedoryata ikes aŋopya ka ŋakujo kec.

⁴⁹Alipite nai ipiyorya ituŋanan aanyun atemar nyerae ikes Akuj, anerae nyepedorete ikes aiun alocan, kori alojie?

⁵⁰Ikwapei itiyaununitere ikes anakito ka toburusikinitetei egolid ka esilipa, eyenunio ekaku atemar erae ikes amodiyo.

⁵¹Ileereuni aneni a ŋituŋa a ŋakwapin a daadaŋ ka aneni a ŋirwosi atemar nyerae ikes Akuj, nai erae ikes ŋiboro ŋulu erae ŋituŋa itiyaunito ka atemar emam etic ka Akuj eyai neni kec.

⁵²Ŋae nai ipiyori ayenun atemar nyerae ikes Akuj?

⁵³Nyepedorete ikes akiwuakin erwosit kipuka akwap, kori ainakin ŋituŋa akiru.

⁵⁴Nyepedorete ikes akitub ŋakiro kec a ŋilopeyek, kori alakun ituŋanan ŋini itiyatae erono neni keŋ, anerae emamukatar ikes apedor.

⁵⁵Ikwaan ikes ka ŋikurukwa ŋulu eporete alokidiŋ akwap ka nakuj. Ani kenoku akim alokai a ŋakujo a ŋuna itiyaunitae anakito, toburusikinitetei egolid ka esilipa, eemete ka esiyete ŋisacaradotin kec, nai enomiyari akim ŋakujo ŋun ikwa ŋina enomya ŋabaoi.

⁵⁶Nabo daŋ, nyepegakinete ikes erwosit, kori emoit. Kaanukiro nai ecamuniata ŋituŋa, kori etamyata atemar erae ikes Akuj?

⁵⁷Ŋakujo ŋuna itiyaunitae anakito, ido toburusikinitetei egolid ka esilipa, nyepedorete aiun make aneni a ŋikokolak ka ŋulu ebwaŋabwaŋaete ŋakais.

⁵⁸Epedori ŋinituŋanan ecamit alemar egolid ka esilipa ŋolo eburusikinitae ikes ka ŋikaasoi ŋulu itanapikinitae ikes, tolot ya ŋiboro ŋulu aŋatuni iŋes; nyepedorete ŋakujo ŋun aiun bon.

⁵⁹Aŋun, ejok araakau erwosit ŋolo emukyaana, kori iborosit a akai ŋini isitiyae elope a ŋuna ke etic keŋ, akilo araakau ŋakujo ŋun ŋuna ka amodiyo, ejok tari epuke a akai ŋolo egolit akai nyelemar ŋiboro ŋulu eya tooma akai, akilo ŋakujo ŋun ŋuna ka amodiyo, ejok araakau epir ŋolo itiyaunitae anakito ŋolo eyai kai a apukan, akilo araakau ŋakujo ŋuna ka amodiyo.

⁶⁰Ecayete elap, akoloŋ ka ŋikacer, nai iyakiyaryo ikes akitiya etic edio, itiyaete emam awoun.

⁶¹Ikwaŋinapei akimilya daŋ, ani imilyauni iŋolikinio aneni alwanan, ikote nenipei aŋuna a ekuwuam daŋ, ekusi nakwapin daadaŋ.

⁶²Ani iyakiyari Akuj ŋidouwon nakwap daadaŋ, iwuapete ikes ŋakiro keŋ.

⁶³Akim daŋ ŋina iyakuunio alokidiama anomiyar ŋimoru ka ŋakito, itiyae ŋuna elimokinitae iŋes. Nai nyepedoryo akisikwaanikin ŋiboro ŋul ka ŋakujo ŋun alopite a ŋolo etakaniata ka anapedor.

⁶⁴Aŋun, nyemaikina ituŋanan etami atemar erae ikes Akuj, kori tonyara ikes Akuj, anerae nyepedorete ikes akitub ŋakiro, kori akitiya ajokis neni a ituŋanan a idio.

⁶⁵Aŋun, ikwapei iyeniata iyes atemar nyerae ikes Akuj, nyikuryaketa aŋuna kec.

⁶⁶Nyepedorete ikes akicen, kori akiterereŋ ŋirwosi;

⁶⁷nyepedorete ikes akitatakanun ŋakitoodikineta alokidiama aŋuna a ŋakwapin, kori acaun ikwa akoloŋ, kori ainakin akica ikwa elap.

⁶⁸Ejokak ŋityaŋ ŋulu ka ariet akilo ikes, anerae epedorete ŋityaŋ ŋul akiem toŋopa ka akiŋarakin bon anakiitanit kec.

⁶⁹Aŋun, emam ŋakiro ikitoodikinete iwon atemar erae ikes Akuj, aŋun nyikuryaketa aŋuna kec.

⁷⁰Ŋakujo kec ŋuna itiyaunitae anakito toburusikinitetei egolid ka esilipa, ikwaan ka etorube a ekuruk ŋolo inenekinitoe lomanikor a ŋakolil, ido mam ibore ite.

⁷¹Ikwaŋinapei, ŋakujo kec daŋ ŋuna itiyaunitae anakito toburusikinitetei egolid ka esilipa, ikwaan ka amoni a ŋikukwa ŋina eyai lomanikor, ŋina edoeneneete ŋikyeny daadaŋ, kori akuwan a ituŋanan a ŋini etwanit a ŋini imasakinitae nakiryonut.

⁷²Iyenunete iyes atemar nyerae ikes ŋakujo alolowi kec a ŋulu kipura-areŋak ka a ŋulu amilimilak a ŋulu ebosyanakinete nawat kec, ido emunyarosi ikes daŋ ŋalopeyek, toruworos ŋajamuwara anakwap.

⁷³Aŋun, ejok ituŋanan ŋini iyookino ŋini emamukar ŋakujo, ituŋanan ŋini ikoni nen, nyepedoryo ajamuwar jik.