Read ngakarimojong Bar 1 Bible Online

Bar 1 - ngakarimojong bible

Bar 1

¹Erae nu ŋakiro ŋuna abu Baruk lokoku a Neria ŋolo arae lokoku a Maseia a ŋolo arae lokoku a Sedekia a ŋolo arae lokoku a Asadia a ŋolo arae lokoku a Ilikia kigir alo Babilon.

²Kigiri Baruk ŋakiro nu ŋirwa ke elap ŋikanikaarei ekaru ŋolo a ŋikan apaki ŋina ekamaryata Ŋibabiloniyae Yerusalem kicunyasi.

³Abu Baruk tosyomak ŋakiro ŋuna igiritae lokitaabo lo neni a Yekonia alokoku a Yeoiakim a erwosit a Yudaya ka neni a ŋituŋa a daadaŋ a ŋulu aponito akiirar ŋakiro ŋuna egiritae lokitaabo lo,

⁴ta neni a ŋikapolokinitok ŋituŋa, neni a ŋirwosi, neni a ŋikasikou ka neni a ŋituŋa a daadaŋ a ŋulucaryo ka a ŋulu itopolooritae, tosyomak Baruk ŋakiro nu neni a ŋituŋa a daadaŋ a ŋulu eboiyete alo Babilon alodiyete aŋolol Sud.

⁵Apotu nai ŋituŋa kigworo, kiredanakis akiron ka kilipa alokiŋaren Akuj.

⁶Apotu ŋituŋa kiriraut ŋisiliŋa ŋulu alalak, kiriraut alotyae a ŋolo apedorit ŋinituŋanan ainakin,

⁷ido apotu kiyakiyasi ŋisiliŋa ŋul Yerusalem neni a Yeoiakim a esacaradoti a ŋolo Apolon nooi alokoku a Ilikia a ŋolo arae lokoku a Salum ka neni a ŋisacaradotin ta neni a ŋituŋa a daadaŋ a ŋulu ayakasi kaapei ka Yeoiakim Yerusalem.

⁸Apaki ŋinapei ŋin, ŋirwa ke elap ŋitomon, elap ŋolo a Sipan, abu Baruk tolemu ŋiboro ŋulu esitiyao alo Kai ke Ekapolon, ŋiboro ŋulu keponi tolemarae alo Kai ka Akuj, abu iŋes tolemu ŋiboro ŋul aŋuna ka akinyakar nakwap a Yudaya. Erae ŋiboro ŋul ŋiboro ŋulu etiyaunitae a esilipa ŋulu kebu Sedekia lokoku a Yosia a erwosit a Yudaya kitiyau

⁹ekaku keriko erwosit Nebukadinesar Babilon alo Yerusalem Yekonia, ŋirwosi, ŋimabus, ŋikapolokinitok a ŋituŋa ka ŋituŋa a akwap a Yudaya.

¹⁰Kigira nai ŋituŋa ŋul abaruwa Yerusalem temasi, “Kijaasi ŋisiliŋa lu ŋulu ikiyakikinit isua iyes, togyelutu a ŋisiliŋa a ŋul ŋainakineta ŋuna epeyo, ŋainakineta aŋuna ka asecit ka ekinyate, kitemokisi daŋ ainakinet ŋina a ŋikinyom, ido inakis ŋainakineta ŋun daadaŋ alokidiama namuroet neni ke Ekapolon Akuj yok,

¹¹tosodi kilipa aŋuna ka akiyar a erwosit Nebukadinesar a ŋolo a Babilon ka aŋuna ka akiyar alokoku keŋ Belisasar, ikotere ikwaanikin ŋirwa a akiyar kec anakwap ka ŋirwa ŋulu anakuj.

¹²Ikiinakini Ekapolon iwon agogoŋu ka akica ŋina kiteet akwap, eryamunio iwon akiuryaro aneni a erwosit Nebukadinesar a ŋolo a Babilon ka aneni alokoku keŋ Belisasar, ido ikipedori iwon akitiyanakin ikes ŋirwa ŋulu alalak ka oryamutu daŋ alakara aneni kec.

¹³Kilipa daŋ aŋuna kosi neni a Ekapolon a Akuj yok, anerae ikisec isua aneni ke Ekapolon a Akuj yok, ido akitodol nakoloŋit na eriŋa aŋoit ka anyunyura a Ekapolon eyai neni kosi.

¹⁴Emaikina iyes tosyoma ŋakiro nu ŋuna ikiyakikinit isua iyes, tosyoma ikeunito nooi aŋuna ka alimorya ŋasecisya kus alo Kai ka Akuj ŋirwa ŋulu itiyaere ŋasuban ka anapakio aŋuna etubunitoe.”

¹⁵Tolimokisi daŋ anabaruwa ŋituŋa ŋulu eboiyete alo Yerusalem ebe, “Iyookinit Ekapolon Akuj yok, nai tokona ikirumito iwon ŋileec, irumito ŋileec ŋituŋa a Yudaya ka ŋituŋa ŋulu iboiyete alo Yerusalem,

¹⁶“Kaapei ka ŋirwosi yok, ŋikepukak yok, ŋisacaradotin yok, ŋikadwarak yok ka atapapaa yok,

¹⁷anerae ikisec iwon alokiŋaren Ekapolon.

¹⁸Ikiwou iwon akiwuap ŋakiro keŋ ka ikiŋer akiirar ŋakiro a Ekapolon Akuj yok, ikiwou iwon akiwuap ŋakiro ŋuna etubunit Ekapolon ŋuna abu iŋes ikiinak iwon.

¹⁹Ameun anapaki a ŋina ayaunia Ekapolon atapapaa yok anakwap a Ijipit akitodol nakoloŋit na, ikirubak iwon ikiwounit akiwuap ŋakiro a Ekapolon Akuj yok ka nyemitakinitae iwon akiirar ŋakiro keŋ.

²⁰Aŋun, tari nakoloŋit na, arubakis ŋican ikidolokinito iwon ka apotu neni yok ŋican ŋulu abu Ekapolon tolimu aneni a Moses a eketiyan keŋ apaki ŋina ayaunia atapapaa yok anakwap a Ijipit, ikotere ikiinakinia iŋes iwon akwap ŋina eleleata ŋakile ka ao.

²¹Aponi iwon nyiirar ŋakiro a Ekapolon a Akuj yok anakiro a daadaŋ a ŋuna ikilimonokinete iwon ŋikadwarak ŋulu eyakuunitae neni yok,

²²nai aponi iwon daadaŋ kiwuapae ŋakiro ŋuna ecamito ŋitai yok ŋulu aronok aŋuna itiyanakinere ŋakujo ŋace ka anakitiya ŋuna aronok alokiŋaren Ekapolon Akuj yok.”