Read ngakarimojong Bar 2 Bible Online

Bar 2 - ngakarimojong bible

Bar 2

¹Aŋun, abu Ekapolon kisiyook ŋakiro keŋ ŋuna sek alimunit, etiya iŋes ŋun itoroniyarit ŋikatubok yok ŋulu epukato akwap a Isirael ka ŋirwosi yok, ŋikepukak yok ka ŋituŋa a Isirael ka Yudaya.

²Nyitiyakina a iwace anakwap a daadaŋ ŋakiro ŋuna ikote ŋuna etiyak Ekapolon Yerusalem, lopite ŋolo elimunitere anakiro a ŋuna abookoi toceito, a ŋuna aponi kigirae lokisila a Moses.

³Aŋuna aditiya akimuj, apotu iwon ŋice tonyama ŋidwe kec ŋulusapa ka tonyama ŋice ŋidwe kec ŋulupesur.

⁴Abu Ekapolon kituruwo ŋikapolok ŋul ŋicaryo aneni a ŋapukasinei a daadaŋ a ŋuna ikirimokinito iwon kidiŋ, abu kituruwo ikes ŋulu ejamuwaritae ka ŋituŋa ŋulu iboiyete alokasile, alotuŋa a daadaŋ a ŋulu eboiyete anawaetin kec aneni abu Ekapolon kiela ikes.

⁵Aponi kituruworoe ikes ŋicaryo meere ŋulu itopolooritae, anerae apotu ŋituŋa a akwap yok toseca aneni ke Ekapolon Akuj yok, aŋuna aponiata towout akiirar ŋakiro keŋ.

⁶Iyookinit Ekapolon Akuj yok, nai tokona, ikirumito iwon ŋileec kaapei ka atapapaa yok nakoloŋit na.

⁷Ŋican daadaŋ ŋulu alimunit Ekapolon atemar toceito, apotu tokona neni yok.

⁸Kikote neni daŋ, nyedyekuna iwon akiŋarakino aneni ke Ekapolon aŋuna ikimyekinia iŋes iwon, nyekiwa iwon anakitam ŋakiro ŋuna aronok.

⁹Aŋun, etemok Ekapolon ŋican, ido ayau ŋican ŋul neni yok, anerae iyookino Ekapolon aloticisyo a daadaŋ a ŋulu abu iŋes itolimok iwon akitiya.

¹⁰Kikote neni daŋ, nyiwuapa iwon ŋakiro keŋ, ikiwou iwon akiwuap ŋakiro ŋuna etubunit Ekapolon, ŋuna abu iŋes ikiinak iwon.

¹¹Tokona, okoe Ekapolon Akuj a Isirael, Akuj ŋina iyauni ŋituŋa kon anakwap a Ijipit ka apedor a ŋina etiron ka a ŋakitoodyanakineta ka ŋaumonokineta ta apedor ŋina apolon akiuryarit isua alowaetin a daadaŋ, toruunio ekiro kon tari nakoloŋit na,

¹²ikisec isua, ikipotu isua oruworos ŋulu nyikinupit, okoe Ekapolon Akuj kosi, etiyae isua ŋuna nyiyookino, abili isua ŋikisila kon daadaŋ.

¹³Tojoŋo aŋoikinit isua, anerae edoŋi isua ikikudyoko alotuŋa a ŋakwapin a daadaŋ a ŋuna ibu iyoŋ ikiela isua.

¹⁴Okoe Ekapolon, kiira akilip kosi ka adyekitoi kosi ka aŋuna kon a elope tolakunae isua ka kitoodikinae isua ajokis kon alokiŋaren ŋituŋa ŋulu apotu ikirikosi isua nakwapin kec;

¹⁵ikotere eyenunete ŋituŋa daadaŋ atemar irae iyoŋ Ekapolon Akuj kosi, anerae enyaritae Isirael ka ŋiletok keŋ a ekiro kon.

¹⁶Okoe Ekapolon, kiŋoliu kwap anakibois kon a ŋina asegan ka totamunae isua. Okoe Ekapolon, topupok ka kiirarae isua;

¹⁷okoe Ekapolon, toŋaa ŋakonyen kon ikiŋolik, anerae nyepedorete ŋikatwak ŋulu alemar etau anawat kec ainakin akitopoloorit, kori akiyookino neni ke Ekapolon,

¹⁸nai tari kiyaloloŋi ituŋanan kelosi ijuuri ka kepalag, ido tonyamite toyari ca iŋes, epedori alimor apolou ka akiyookino kon, okoe Ekapolon.

¹⁹Okoe Ekapolon Akuj kosi, nyikilipi isua neni kon edyekunitae akisyonio aŋuna a ŋiticisyo atapapaa kosi, kori aŋuna a ŋiticisyo a ŋirwosi kosi;

²⁰ikilipi isua, anerae iyau iyoŋ aŋoit kon ka anyunyura kon neni kosi lopite ŋolo ilimunitor iyoŋ aneni a ŋiketiyak kon a ŋikadwarak ibala,

²¹“Irworo Ekapolon ebe, ‘Kitiditeunos kitiyanakis erwosit a Babilon, ido irubakinete iyes iboiyete anakwap aŋina abu ayoŋ oinak atapapaa kus.

²²Nai ani pa kiwuapa iyes ŋakiro a Ekapolon ka pa kitiyanakis erwosit a Babilon,

²³alemari ayoŋ alotaunio a Yudaya ka anakiboisyo a ŋuna idunyito Yerusalem ecelet ŋolo ka alelyanu ka ecelet ŋolo ka alakara, ecelet ŋolo a ŋasuban a ekeitan ka ŋolo a ŋasuban a ateran, ido eruwor akwap daadaŋ ekasile neni emam ŋituŋa iboiyoto.’ ”

²⁴Nai nyiwuapa isua ŋakiro kon ŋuna ilimunit iyoŋ atemar kitiyanakisi erwosit a Babilon, ido isiyook iyoŋ ŋakiro ŋuna ikilimokinit isua acoikinit ŋuna sek ilimunit aneni a ŋiketiyak kon a ŋikadwarak atemar elemunio ŋakoyo a ŋirwosi kosi ka ŋuna atapapaa kosi, anakiboisyo a ŋuna sek anukakinitae,

²⁵kire emasun ikes kiŋa namwanis a akoloŋ ka nalilimu a akuwar. Apotu ikes totwaka eryamunito ŋican ŋulu alalak, apotu totwaka aŋuna ka akoro, aŋuna aarere ka aŋuna a ŋidekesyo.

²⁶Iinak iyoŋ Akai ŋina enyaritae a ekiro kon toyakaun lopite ŋolo eyakar tokona aŋuna ka aronis a ŋituŋa a Isirael ka ŋituŋa a Yudaya.

²⁷Okoe Ekapolon Akuj kosi, kikote neni daŋ, itiya iyoŋ neni kosi anarimaanut kon a daadaŋ ka anakisyon kon a daadaŋ a ŋina apolon,

²⁸lopite ŋolo ilimunitor iyoŋ aneni a eketiyan kon Moses akoloŋit ŋina ilimokinia iyoŋ iŋes akigir ŋikisila kon alokiŋaren ŋituŋa kon Ŋisirael ibala,

²⁹“Ani pa kiwuapa iyes ŋakiro kaŋ, ekudyokunete ŋituŋa ŋulu alalak lu alotuŋa a ŋakwapin a ŋuna eelari ayoŋ ikes;

³⁰anerae ayeni ayoŋ atemar nyiwuapete ikes ŋakiro kaŋ, anerae erae ikes ŋituŋa ŋulu egogoŋ ŋakyes. Nai epote ikes ayenun ŋakiro apaki ŋina eyakaunotor ikes nakwap ŋina erikoritae ikes.

³¹Eyenunete nai ikes atemar arae ayoŋ Ekapolon Akuj kec. Ainakini ayoŋ ikes ŋitai ŋulu iwuapyata ŋakiro kaŋ ka ŋaki ŋuna iiraryata ŋakiro kaŋ,

³²ekepurete ikes ayoŋ anakwap a ŋina erikoritae ikes ka akatamunete ikes ayoŋ,

³³ido kilocokinos anakisyaanu kec ka aloticisyo kec a ŋulu aronok, anerae etamunete ikes ŋiticisyo atapapaa kec a ŋulu apotu toseca alokiŋaren Ekapolon.

³⁴Ayauni nai ayoŋ ikes nabo nakwap ŋina abu ayoŋ ekoŋ ainakin neni atapapaa kec Aburaam, Isaka ka Yakob, ido ipukaete ikes akwap ŋin ka eyatakini ayoŋ ikes, nyitukudyokuunio ikes nabo.

³⁵Ewuakini ayoŋ acamunet ŋina a ŋikaru ka ŋikaru ka ikes, oruwor ayoŋ Akuj kec ka eruworosi ikes ŋituŋa kaŋ, ido mam nabo jik nyalemari ayoŋ ŋituŋa kaŋ Ŋisirael anakwap a ŋina abu ayoŋ oinak ikes.”