Read ngakarimojong Bar 3 Bible Online

Bar 3 - ngakarimojong bible

Bar 3

¹Okoe Ekapolon ŋolo etiron, Akuj a Isirael, igworosi neni kon ŋituŋa ŋulu iyaloloŋete ka ŋitai ŋulu apapanut.

²Okoe Ekapolon, kiirarae ido ikisyoni isua, anerae ikisec isua alokiŋaren kon.

³Ipukat iyoŋ ŋikaru ka ŋikaru ka amunyaroi isua jik.

⁴Okoe Ekapolon ŋolo etiron Akuj a Isirael, kiira tokona akilip a Ŋisirael, a ŋidwe a ŋulu apotu toseca alokiŋaren kon a ŋulu apotu towout akiirar ŋakiro kon a Ekapolon Akuj kec, ido arubakis ŋican eyakasi neni kosi.

⁵Nyitamu ŋasecisya atapapaa kosi, nai alocan a lu totamu apedor kon ka ekiro kon;

⁶anerae irae iyoŋ Ekapolon Akuj kosi ka erae iyoŋ okoe Ekapolon, eponio isua akipuro,

⁷anerae iwuak iyoŋ akitopoloorit iyoŋ lotai kosi, ikotere enyarao isua ekiro kon ka ikipuryo iyoŋ anakwap a ŋina ikirikoritae isua, anerae alemar isua alotai kosi ŋasecisya atapapaa kosi daadaŋ a ŋulu apotu toseca neni kon.

⁸Kiŋolik, ikiya tokona isua nakwap ŋina ikirikoryo, neni ibu iyoŋ ikeela isua, ikotere ikiyanyo, ikicenio ka ikisicanio aŋuna a ŋasecisya a daadaŋ a ŋuna atapapaa kosi a ŋulu apotu toŋero Ekapolon Akuj kosi.

⁹Okoe Ŋisirael, kiirasi ŋakiciketa ŋuna ka akiyar, topupokisi ka toyenutu aosou!

¹⁰Okoe Ŋisirael, kaanukiro iyakatar iyes nakwap a ŋimoe kus? Kaanukiro imojoŋikiniata iyes nakwap ŋinagela? Kaanukiro ikimunarere iyes a ŋawat a ŋikatwak

¹¹ka ikimaritere iyes neni a ŋulu eya nakibois ŋina a ŋikatwak?

¹²Iŋero iyes eitanit ŋolo ka aosou.

¹³Ani kerae kiwuapito iyes ŋuna ecamit Akuj, kiboiyoto iyes alotooma ekisil ŋikaru ka ŋikaru.

¹⁴Toyenutu neni eyai aosou, toyenutu neni eyai agogoŋu, toyenutu neni eyai ayenut, ikotere apaki ŋinapei iyenunete ŋuna aronok ka ŋuna ajokak, neni eya ŋirwa ŋulu alalak ka akiyar. Ikotere iyenunete neni eyai akica ŋina iŋolikinia ibore ka neni eyai ekisil.

¹⁵Ŋae aryamu neni eyai aosou? Ŋae aloma nakais ŋuna iŋadatae iŋes?

¹⁶Ai eya ŋikepukak a ŋakwapin? Ai eya ŋulu apotu kiwuakis aosou kec lotyaŋ ŋulu ka akwap?

¹⁷Ai eya ŋulu abolyasi irikaete ŋikyeny ŋulu eporete ka ŋulu edyasito esilipa ka egolid ŋiboro ŋulu ekinyomito ŋituŋa ka pa etemonokin ikes ŋiboro ŋul?

¹⁸Ai eya ŋulu ayeete epite ŋoloryamunet esilipa, ido ayakatar ikes akiitanit iŋes jik, nai nyetakani etic kec?

¹⁹Aŋopiyasi ŋul, ido aloto nakibois a ŋikatwak ka elunyokin ŋice nakiboisyo kec.

²⁰Eŋolikis ŋanyameta ŋuna esidyok akica a paaran ka eboiyoto anakwap; nai nyeyenuna ikes epite ŋolo eryamunere aosou, nyeyenuna daŋ ikes ŋirotin ŋuluryamunet aosou, kori nyimukekina ikes akikamun ŋuna ka aosou.

²¹Aoliyosi ŋiletok kec neni alwanan alorot a ŋolo ka aosou.

²²Nyiirara ŋuna ka aosou alo Kanaan, kori nyiŋolikina alo Teman.

²³Nyeyenuna ŋiletok ka Agar ŋulu iwarito ayenut anakwap erot ŋolo ka aosou, nyeyenuna ŋikecurutak a Meran ka Teman erot ŋolo ka aosou, nyeryamuna ŋikerworok ŋiemuto ka ŋikewarak ayenut erot ŋolo ka aosou, kori nyetamatamaete aryamun ŋirotin ŋulu ka aosou.

²⁴Okoe Ŋisirael, epol nooi akibois ŋina ka Akuj elal nooi akibois ŋina erae ŋina keŋ.

²⁵Elal nooi ka emam ekisal, eoya nooi nyepedoryo akipim.

²⁶Auruunio ŋituŋa ŋulu aburok tooyak aina, ŋituŋa ŋulu koloŋ arae ŋikarwok, ŋulu aburok aŋawat, ŋulu ayenete nooi ejie.

²⁷Nyeseuna Akuj ikes, kori nyeinakina Akuj ikes erot ŋolo eryamunere ayenut.

²⁸Aŋun, apotu ikes tomunyaros, anerae amamukatar aosou, apotu ikes tomunyaros aŋuna ka abaŋao kec.

²⁹Ŋae abu tolot nakuj yau aosou ka ŋae abu yau aosou totiyaunor alodowuon?

³⁰Ŋae abu tolot nanam toryamu aosou eyai nen? Ŋae epedori agyelun aosou a egolid a ŋolo emam ibore inyalakinitae?

³¹Mam ituŋanan eyeni erot ŋolo ka aosou, kori ŋini emitakinit akiwarit erot ŋolo elosi neni eyai aosou.

³²Nai ŋini eyeni ŋiboro daadaŋ iŋes eyeni aosou, abu toryamu aosou anayenut keŋ. Iŋes ŋini asubuni akwap aŋuna a ŋapakio a daadaŋ, ŋolo abu kilelebik ŋityaŋ ŋulu a ŋakejen a ŋaomwon nakwap,

³³ŋolo iyakuununui akica, tocau akwap. Abu iŋes tonyarau akica ka abu akica kiwuap ŋakiro keŋ emarani;

³⁴tocaut ŋikacer ŋisaae ŋulu emaikina ecayata ka alakara, abu iŋes tonyara ŋikacer, toboŋokis ikes temasi, “Isua lu!” Apotu ŋikacer tocaut elakara aŋuna a ŋini asubuni ikes.

³⁵Arae Akuj yok iŋes etiyae ŋun, mam ice isikwaanio ka iŋes.

³⁶Abu iŋes toyenu erot daadaŋ ŋolo ka aosou ka abu inak aosou ŋin neni a eketiyan keŋ Yakob ka neni a Ŋisirael a ŋituŋa a ŋulu amina iŋes.

³⁷Ekaku abu aosou totakanu nakwap kiboiyoto kaapei ka ŋituŋa.