Read ngakarimojong Eete. ŋi. a Ŋiu. 1 Bible Online

Eete. ŋi. a Ŋiu. 1 - ngakarimojong bible

Eete. ŋi. a Ŋiu. 1

¹Apaki ŋin alosete Sadirak, Mesak, Asaria ka Abedinego alokidiŋ arira a akim, eeosi ŋieosyo neni ka Akuj ka kipurosi Ekapolon.

²Towo nai Asaria kitiira anarira a akim kilip ecela tema,

³Okoe Ekapolon, Akuj atapapaa kosi, irereŋ iyoŋ ka itemokino ikipuroe iyoŋ ka itopolooritae ekiro kon ŋikaru ka ŋikaru;

⁴anerae iyookino iyoŋ anakiro a daadaŋ a ŋuna itiyat iyookino ŋiticisyo kon daadaŋ ka iyookino ŋirotin kon, iyookino ŋakiro ŋuna itubi iyoŋ daadaŋ.

⁵Itub iyoŋ ŋakiro anakiyookino alotooma ŋakiro daadaŋ ŋuna imyek iyoŋ ikidolikinete isua ka Yerusalem etaun ŋolo asegan ŋolo atapapaa kosi; anakiro kon a ŋuna iyookino, iyau iyoŋ ŋakiro nu daadaŋ neni kosi aŋuna a ŋasecisya kosi,

⁶anerae ikisec isua ka ikiwou akiwuap ŋikisila kon aŋuna ikiŋeryo isua iyoŋ alotooma ŋuna aronok nooi daadaŋ ŋuna etiyae isua.

⁷Nyiwuapa isua ŋakiciketa kon, nyiwuapa isua ikes, kori nyitiya isua ŋuna ibu iyoŋ ikilimok isua akitiya aŋuna ka ajokis kosi.

⁸Aŋun, ŋakiro daadaŋ ŋuna imyek iyoŋ epote neni kosi ka daadaŋ ŋuna itiya iyoŋ neni kosi, itiya iyoŋ itubunit anakiyookino.

⁹Ikipotok iyoŋ isua neni a ŋimoe kosi, a ŋulu erae ŋikaŋerok ŋulu nyiwuapito ŋikisila ka ŋulu adiŋak ikipotok daŋ iyoŋ isua neni a erwosit a ŋolo nyitiyae ŋuna iyookino, erwosit ŋolo aronon nooi akilo daadaŋ anakwap.

¹⁰Nyikipedori tokona isua alimun ŋakiro ŋadi, aruworoi isua ŋulu ikirae ŋiketiyak kon, ŋulu ikirumito ŋileec ka ŋulu ikijamuwaritae.

¹¹Aŋuna a ekiro kon, nyikipoto isua ŋikaru ka ŋikaru, ido nyikisa acamunet kon.

¹²Nyinyaka akisyon kon aneni kosi aŋuna ka Aburaam a eminat kon ka aŋuna a Isirael a eketiyan kon a ŋolo asegan.

¹³Ŋiketiyak kon ŋulu ibu iyoŋ kiik akitipitun ŋiletok kec tolalata ikwa ŋikacer ŋulu alokidiama ka tolalata ikwa asinyon ŋina alodiyete anam.

¹⁴Okoe Ekapolon, akudyokun isua akilo ŋituŋa ka akwap ka adio, ido akudyokun isua akoloŋit na anakwap a daadaŋ aŋuna a ŋasecisya kosi.

¹⁵Alorwa kosi, emamukare isua ekepukan, kori ekadwaran, kori ekarikon, emam isua ainakinet ŋina epeyo, kori amuronot, kori etic ŋolo emaikina kitiyae, kori ekinyate, emam neni einakinere isua ainakinet alokiŋaren kon aŋuna ka aryamunia akisyon.

¹⁶Kikote neni daŋ, ikilipi isua tocamu iyoŋ ŋitai kosi ŋulu ekiito ka ŋulu itiditeuna

¹⁷esibit ikiinakinit isua iyoŋ ŋainakineta ŋuna epeyo ŋuna a ŋimesekin ka ŋimoŋin, kori ŋalipyo ŋatomotomoe ŋuna a ŋikaalei a ŋulumesekin a ŋulu atumak, ikilipi kikwaanikin amuronot kosi na alokiŋaren kon ka ŋainakineta ŋun nakoloŋit na. Ikilipi daŋ ewuapa isua ŋakiro kon a ŋitai kosi a daadaŋ, anerae emam ŋileec ŋituŋa ŋulu ikikinyomito iyoŋ.

¹⁸Tokona ikiwuapi isua ŋakiro kon a ŋitai kosi a daadaŋ ikitopoloorit isua iyoŋ ka ikiitanit ayakau kon neni kosi.

¹⁹Nyikisirum isua ŋileec, nai kitiya neni kosi anakidaŋidaŋ, anarimao kon ŋakiro kosi ka anakisyon kon a ŋina alalan.

²⁰Tolakunae isua alopite a ŋolo a ŋiticisyo kon a ŋulu ka aumokin, ido okoe Ekapolon kiwuak neni kosi akitopoloor ekiro kon.

²¹Elipi kisurumae ŋileec daadaŋ ŋulu itiyaete erono neni a ŋiketiyak kon, emaikina ikes tojamuwarae ka todemarae apedor daadaŋ; emaikina agogoŋ kec todaun.

²²Elipi toyenut ikes atemar iyoŋ bon irae Ekapolon Akuj, Ekapolon ŋolo eyakar apolou anakwap a daadaŋ.

²³Apotu ŋiketiyak a erwosit ŋulu emasakinitae nakim lu: Mesak, Sadirak ka Asaria torubakis iyasete akimyet, ŋatotol, ŋausi ka ŋakito nakim.

²⁴Tolalaar arira kileŋ ekitet todol ŋamitae ŋuna eapikinito ŋaarei ikiara alokitet,

²⁵kielun akim alokitet tonomiya Ŋibabiloniyae ŋulu aapiyete alokitet.

²⁶Nai abu emalaika ka Akuj bu kwap lokitet toyakaun kaapei ka Asaria ka ŋirukitos keŋ, kisiyoto emalaika arira a akim alokitet,

²⁷kitusub kidiŋ ekitet eyai ekuwuam ŋolo epapal ŋolo ekusi alotooma. Pa adolit akim neni aya Mesak, Sadirak ka Abedinego ka abu akim nyenom ikes tari iwadio pa daŋ anomit ikes, kori pa eyaloloŋete ikes aŋuna ka arira a akim.

²⁸Apotu nai Ŋiyudayan ŋuluuni ŋul kaapei kipuro, kiterereŋo ka kitopoloosi Akuj eyakasi kidiŋ arira a akim ebasi,

²⁹“Okoe Ekapolon, Akuj atapapaa kosi irereŋ iyoŋ, emaikina ikipuroi iyoŋ ka ikitopolooritae iyoŋ nooi ŋikaru ka ŋikaru.

³⁰Kipuroe ekiro kon ŋolo itopolooritae ka ŋolo asegan emaikina kipuroe nooi ka kitopolooroe ŋikaru ka ŋikaru.

³¹Irereŋ iyoŋ alo Kai kon a ŋina ka apolou kon a ŋina asegan emaikina ikipuroe iyoŋ nooi ka ikitopoloor nooi ŋikaru ka ŋikaru.

³²Irereŋ iyoŋ Ekapolon ŋolo iŋoliunit kwap alokicoloŋ kon a ŋolo ipukator alokidiama ŋisubuna ŋulu a ŋabebenuk ka emaikina ikipuroe ka ikitopoloor nooi ŋikaru ka ŋikaru.

³³Irereŋ iyoŋ alokicoloŋ kon a ŋolo ka apukan kon ka emaikina ikipuroe iyoŋ nooi ka ikitopoloor ŋikaru ka ŋikaru.

³⁴Irereŋ iyoŋ anariwo a ŋina alokidiama ka emaikina eeoi ŋuna kon ka ikitopoloor ŋikaru ka ŋikaru.

³⁵“Iyes ŋisubuna a Ekapolon daadaŋ kipuro Ekapolon toeoto ipurosi iŋes ka kitopoloosi iŋes ŋikaru ka ŋikaru.

³⁶Iyes ŋisubuna ŋulu alokidiama kipuro Ekapolon, toeoto ipurosi iŋes ka kitopoloosi iŋes ŋikaru ka ŋikaru.

³⁷Iyes ŋimalaikan a Ekapolon kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

³⁸Iyes ŋakipi ŋuna alokidiama kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

³⁹Iyes ŋapedorosyo a Ekapolon kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴⁰Iyes akoloŋ ka elap kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴¹Iyes ŋikacer ŋulu alokidiama kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴²Iyes akiru ka ŋakopi kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴³Iyes ŋikuwamin kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴⁴Iyes akim ka amwanis kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴⁵Iyes alilimu ŋina ka akiporo ka amwanis ŋina ka akamu kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴⁶Iyes ŋakopi ka ŋakako ŋuna irae ekwok, kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴⁷Iyes ŋakuwarisinei ka ŋapaarasya kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴⁸Iyes akica ka kiryonut kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁴⁹Iyes ŋakako ka alilimu kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁵⁰Iyes ŋikunoi ka ŋakako ŋuna irae ekwok kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁵¹Iyes akimilya ka ŋidouwon kipuro Ekapolon, toeoto ipurosi iŋes ka kitopoloosi iŋes ŋikaru ka ŋikaru.

⁵²Emaikina akwap kipur Ekapolon, emaikina iŋes toeo ipuro iŋes ka kitopoloo iŋes nooi ŋikaru ka ŋikaru.

⁵³Iyes ŋimoru ka ŋikamukumukui kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁵⁴Iyes ŋiboorei daadaŋ ŋulu irupete alokwap kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁵⁵Iyes ŋanamyo ka ŋaŋololin kipuro Ekapolon, toeoto ipurosi iŋes ka kitopoloosi iŋes ŋikaru ka ŋikaru.

⁵⁶Iyes ŋilelyan kipuro Ekapolon, toeoto ipurosi iŋes ka kitopoloosi iŋes ŋikaru ka ŋikaru.

⁵⁷Iyes ŋikolya ŋulu aburok ka ŋiboorei daadaŋ ŋulu iyarete anakipi kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁵⁸Iyes ŋikyeny daadaŋ ŋulu iporete kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁵⁹Iyes ŋityaŋ ŋulu ka ariet daadaŋ ka ŋaatuk kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru

⁶⁰“Iyes ŋituŋa daadaŋ anakwap kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁶¹Okoe Ŋisirael kipuro Ekapolon, toeoto ipurosi iŋes ka kitopoloosi iŋes ŋikaru ka ŋikaru.

⁶²Iyes ŋisacaradotin a Ekapolon kipuro Ekapolon, toeoto ipurosi iŋes ka kitopoloosi iŋes ŋikaru ka ŋikaru.

⁶³Iyes ŋiketiyak a Ekapolon kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁶⁴Iyes ŋitai ka kiyar a ŋulu iyookino kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁶⁵Iyes ŋulu asegak ka ŋulu itiditeuna make alotai kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru.

⁶⁶“Okoe Anania, Asaria ka Misael kipuro Ekapolon, toeoto ipurosi iŋes ka kitopoloosi iŋes nooi ŋikaru ka ŋikaru; anerae ikiu iŋes iwon anakibois a ŋikatwak ka anapedor a ŋina ka atwanare, ikilaku iŋes iwon alokidiŋ akim ŋina a ekitet ŋina arirae, ikilaku iŋes iwon alokidiŋ akim.

⁶⁷Tolakaros neni ke Ekapolon, anerae ejok iŋes erubakini akisyon keŋ ŋikaru ka ŋikaru

⁶⁸Iyes daadaŋ ŋulu ilipete neni ke Ekapolon kipuro Akuj a ŋakujo, toeoto ipurosi iŋes ka tolakar neni keŋ, anerae erubakini akisyon keŋ ŋikaru ka ŋikaru.”