Read ngakarimojong Sus 1 Bible Online

Sus 1 - ngakarimojong bible

Sus 1

¹Ayai koloŋ ekile ŋolo eboi alo Babilon arae ekiro keŋ Yoakim.

²Abu Yoakim kiit nakoku a Ilikia ŋina anyaritae Susana. Arae Susana aberu ŋina ebusan nooi ka etopoloorit Ekapolon.

³Arae ŋikauruunak keŋ ŋituŋa ŋulu eyookino ka apotu ikes kitatama nakoku kec akiwuap ŋakiro lopite ŋolo ayakatar ŋikisila a Moses.

⁴Abarit Yoakim nooi, ido ayakar emanikor ŋolo ajokan diyete akai keŋ. Aponeneete Ŋiyudayan neni keŋ, anerae arae iŋes ituŋanan ŋini etopolooritae akilo ŋituŋa kec daadaŋ.

⁵Alokaru a ŋol aponi toseunae ŋikasikou ŋiarei alotuŋa aruwor ŋikatubok ŋakiro. Kebu sek Ekapolon tolimu aŋuna kec ebe, “Abu aronis bu Babilon aneni a ŋikasikou a ŋulu arae ŋikatubok ŋakiro, a ŋulu amaikina kipukata ŋituŋa.”

⁶Aminasi a ŋinapaki ŋikasikou ŋul alosenen kai a Yoakim, ido ŋituŋa daadaŋ ŋulu ayakatar ŋakiro ŋuna amaikina totuboe aponeneete neni a ŋikilyok a ŋul atubokino ŋakiro kec alo kai a Yoakim.

⁷Apaki ŋina erotokinioto ŋituŋa edoli kidiŋ apaaran, amina Susana alosenen lomanikor alokile keŋ akipasat.

⁸Aŋinakoloŋit eŋolyaanakinete ŋikasikou ŋuluarei ŋul Susana elomari lomanikor ka ipasae alomanikor. Apotu nai ikes toyakaunotor ekibure aŋuna a Susana.

⁹Toŋero ikes ŋuna sek eyenete alotai kec atemar nyiyookino ka toŋero akiwuap ŋakiro ŋuna ecamit Akuj aneni kec ka atamunit etic kec ŋolo ka akitub ŋakiro anakiyookino.

¹⁰Abu ekibure aŋuna a Susana kilopiya ŋatameta kec a ŋuluarei, nai abu ipei kec nyelimok ŋinice ŋakiro ŋuna aryebete iŋes alotau keŋ,

¹¹anerae erumito ikes ŋileec akisileereun ekibure kec ŋolokisuparet Susana.

¹²Aŋinakoloŋit ewuarito ikes nooi apaki ŋina kiŋolikinet Susana.

¹³Akoloŋit apei, kirworikinos ikes make tolimok ŋinice ŋinice tema, “Oloto lore, anerae adol apaki ŋina ka akimuj a ŋina ka apaaran.” Aŋun apotu ikes ŋiarei torotokis ka totyakas.

¹⁴Nai ani eboŋori ŋinituŋanan kiryama nabo ikes make lorot, ani iŋisi ŋinice ŋinice ŋakiro ŋuna keboŋunio iŋes, tolimosi daadaŋ ŋuna a ekibure kec. Apotu nai ikes kaapei toyeut aryamun apaki ŋina eryamuniata ikes Susana iboi bon.

¹⁵Akoloŋit apei, apaki ŋina ewaritotor ŋikasikou ŋul epite ŋolo epedoryata akitiya ŋuna ayeunito ikes, toloma Susana lomanikor erukito ka ŋaketiyak ŋaarei make, ido acamit iŋes akiloŋar alomanikor, anerae amwana akwap akoloŋit ŋin.

¹⁶Mam ituŋanan ice ayai nen mati ŋikasikou ŋuluarei ŋul make ŋulu aŋopito ka eteete Susana elosi akiloŋa.

¹⁷Tolimok Susana ŋaketiyak keŋ ŋunaarei tema, “Yautu neni kaŋ akimyet ŋina ka Olipa ka ŋamyeta ŋuna iosae, ido togolokis ŋipukei ŋulu ke emanikor, ikotere apedori ayoŋ akiloŋar.”

¹⁸Apotu ŋaketiyak ŋun kitiyata lopite ŋolo alimokinitor Susana ikes, apotu togolokis ŋipukei a emanikor, ido kitoro lopukei ŋulu anawaetin ayaun ibore ŋinisek alimokinitae ikes; nyiŋolikina ŋaketiyak ŋun ŋikasikou, anerae aŋopito ŋikasikou.

¹⁹Ani elomarete ŋaketiyak alomanikor, tonyout ŋikasikou aneni adukitotor toema neni a Susana.

²⁰Temasi, “Kiŋolik, egolol ŋipukei a emanikor ka mam ituŋanan epedori akiŋolikin iwon. Aŋun, tolimu ŋuna itami iyoŋ, ido opero ka isua.

²¹Ani kiwou iyoŋ, ikisitakini isua iyoŋ, olimokisi ŋituŋa atemar, ayai esorokit ŋolo irukito ka iyoŋ, ŋakiro ŋun iŋes iyakiyarya iyoŋ ŋaketiyak alosit kiŋa.”

²²Toumenik Susana tema, “Adau ayoŋ jik alomar naloc, anerae kacamu ayoŋ akitiya ŋakiro nu, eruwor ŋun atwanare aneni kaŋ, ani kawou ayoŋ akitiya nu, nyapedori ayoŋ akipiyor ikes.

²³Aseu ayoŋ awoun akitiya ŋun, atwanikini ayoŋ nakan kus akilo ayoŋ akisec alokiŋaren Ekapolon.”

²⁴Abu nai Susana kirwor ecela nooi, ido apotu ŋikasikou ŋuluarei kiŋenyakis iŋes;

²⁵Abu epei a ŋikasikou toem aŋaar ŋipukei a emanikor.

²⁶Ani iirarete ŋituŋa ŋulu aya kai ecelet alomanikor, tomotunos kitorut lopuke ŋolo anawae aanyun ŋakiro ŋuna etiyakin neni a Susana.

²⁷Ani elimunete ŋikasikou ŋakiro kec, kiruma ŋaketiyak ŋileec nooi, anerae emam ŋakiro ŋuna ekote ŋun ŋuna alimitere Susana ŋinapei.

²⁸Akoloŋit ŋina atupakini ŋin, apaki ŋina acununotor ŋituŋa kai a Yoakim alokile keŋ a Susana, potu ŋikasikou ŋuluarei, ileleba lotai kec ŋakiro ŋuna aronok ŋuna atukunito ikes atemar emaikina toarae Susana. Tolimut ikes alokiŋaren ŋituŋa temasi;

²⁹“Kiyakiyasi ŋituŋa yaut Susana nakoku a Ilikia, aberu a Yoakim.”

³⁰Aŋun, apotu ikes kiyakiyasi ŋituŋa ayaun Susana. Abu Susana potu ka ŋikauruunak keŋ, ŋidwe keŋ ka ŋiyeneta keŋ.

³¹Arae Susana aberu ŋina amam neni arono anakuwan keŋ, ido ebus iŋes etakani,

³²ikwapei emukitere ereet a Susana, apotu ŋikesyaak ŋul tolimut atemar kiwoloroe akitambara ŋina emukitere ereet a Susana, ikotere ikes iŋolikinete akibuses keŋ aloreet.

³³Egworosi ŋituŋa daadaŋ ŋulu arukito ka eteete Susana.

³⁴Apotu nai ŋikasikou ŋuluarei towua alokiŋaren ŋituŋa, ido kidokokis ŋakan kec nakou a Susana.

³⁵kireo Susana kidiama ileleba ŋakiyo nakonyen keŋ, anerae ekinyomit etau keŋ Ekapolon.

³⁶Tolimokis ŋikasikou ŋituŋa temasi, “Apaki ŋina alosere isua make alomanikor, abu aberu na potu ka ŋaketiyak ŋaarei, togolok ŋipukei a emanikor, ido tolimok ŋaketiyak alosit aneni keŋ.

³⁷Abu nai esorokit, ŋolo aŋopit a nen, tolot neni keŋ, ido kiryamakin ka iŋes.

³⁸Ayakae isua lokoona a emanikor apaki ŋin, ani iŋolikinio isua ŋakiro ŋuna aronok ŋun, aponi isua toemae neni kec.

³⁹Tari ŋina eŋolikinere isua ikes etunasi, aponi isua nyikamun ekile, anerae agogoŋ iŋes akilo isua, ido abu ekile ŋol toŋaa ŋipukei toem.

⁴⁰Nai aponi isua kikamunae aberu na kiŋitae atemar arae ŋae esorokit ŋol,

⁴¹nai abu iŋes nyikilimok isua. Isuudatae isua ŋakiro ŋun.” Aŋuna araakatar ŋikilyok ŋul ŋikasikou a ŋituŋa ka ŋikatubok ŋakiro, abu atukot tonup ŋakiro kec, ido totubokis Susana atwanare.

⁴²Kikalou nai Susana ecela nooi tema, “Okoe Akuj ŋina a ŋikaru ka ŋikaru, iyeni iyoŋ ŋakiro ŋuna imunono, iyeni daŋ ŋakiro daadaŋ eriŋa nyitiyakina;

⁴³iyeni iyoŋ atemar erworo ŋikilyok lu alyokonu aŋuna kaŋ, ido akaaryo tokona ayoŋ, tari pa ketiyat ayoŋ adio a ŋakiro a ŋuna aronok a ŋuna ekisitakinitotor ikes ayoŋ!”

⁴⁴Abu Ekapolon kiira akigworo a Susana.

⁴⁵Apaki ŋinapei arikorere Susana akiar, abu Ekapolon inak etau ŋolo asegan alimun ŋakiro aneni ke esorokit a ŋolo anyaritae Daniel.

⁴⁶Tocelu Daniel nooi tema, “Acamit ayoŋ opakar anakiro a ŋuna ebukorere ŋaokot a aberu a na!”

⁴⁷Kiteosi ŋituŋa daadaŋ neni a Daniel kiŋita iŋes temasi, “Anukiro nu ŋuna irworo iyoŋ?”

⁴⁸Alotooma amamu akuryanu, kirworik Daniel alokidiŋ kec tema, “Okoe Ŋisirael, ibaŋaaka mono tokona iyes, a ŋina itubokiniata nakoku a Isirael atwanare nyeripiripa ŋakiro ka nyeyenuna ŋuna a kire a?

⁴⁹Oboŋosi loikiiko, anerae erworo ŋikilyok lu ŋakiro ŋuna ka alyokonu aŋuna aberu a na.”

⁵⁰Aŋun, apotu ŋituŋa daadaŋ kiwonyakis toboŋosi. Tolimokis nai ŋikasikou ŋuluce Daniel temasi, “Bua, kiboikin kaapei ka isua, ido itolimok ŋakiro a ŋikasikou, anerae ikiinak iyoŋ Akuj akirworo ikwa ŋikasikou.”

⁵¹Tema Daniel neni kec, “Totyaka ŋikasikou ŋuluarei ŋul, towoiya ipei neni keŋ bon aneni a ŋinice, ido eŋitiŋit ayoŋ ikes ŋakiro.”

⁵²Kedaun akityak ŋikasikou ŋul, tonyarau Daniel epei tolimok iŋes tema, “Iyoŋ lo ŋolo irae akitoodikinet ŋina a ŋirwa a ŋulu aronok, eleereut tokona ŋasecisya kon, ŋuna ibu iyoŋ tosec anapakio a ŋuna alunyar,

⁵³Eleereut ŋakiro ŋuna itubonokinia iyoŋ ŋituŋa emam akiyookino aneni kon, ŋakiro ŋuna itubonokinia iyoŋ ŋulu nyesecito, ido tolacak ŋulu esecito. Tari ŋina alimunitor Ekapolon ebe, ‘Nyemaikina iyes toara ituŋanan ŋini emam aronis itiyat, ido torae ŋini iyookino.’

⁵⁴Tokona nai, ani kire kiŋolikinit iyoŋ aberu na tolimokinae ayoŋ ŋakiro nu, ‘Kwap ekitoe ali iŋolikinia iyoŋ ikes iryamakinosi?’ Toboŋok ekasikout tema, ‘Arae kwap ebobore.’ ”

⁵⁵Tema nai Daniel, “Ejok nooi! Aŋuna ka alyokonu a ŋin etuboryo akou kon, anerae ainakin emalaika ŋolo ka Akuj atubokinet kon aneni ka Akuj, ikitubio iyoŋ atipei ŋarwa ŋaarei.”

⁵⁶Kitowo Daniel ekile anawae, ido tolimok ŋituŋa yaunae ŋoloce daŋ, Tolimok Daniel iŋes tema, “Iyoŋ ŋolo irae eletonit a Kanaan meere ŋolo a Yudaya, adau akibuses akidupor iyoŋ ka adau ekibure a ekibure akibatar etau kon.

⁵⁷Epite lo iŋes itiyaenenea iyoŋ neni a ŋidwe a Isirael a ŋulupesur, ido apotu anakuryanu kiryamakinos ka iyoŋ, nai abu nakoku a Yudaya nyecamu aronis kon.

⁵⁸Tokona nai tolimokinae ayoŋ, kwap ekitoe ali ikamunia iyoŋ ikes iryamakinosi?” Toboŋok ekasikout ŋol tema, “Kwap ekuyon ŋolo elibak ŋakuii keŋ jik.”

⁵⁹Tolimok Daniel iŋes tema, “Ejok nooi! Aŋuna ka alyokonu a ŋin, etoburyo akou kon, anerae ikidarit iyoŋ emalaika a Ekapolon, etiŋit iŋes ekileŋ ŋolotubet iyoŋ ŋaarei, ikotere ikimunyarya iyes ŋuluarei daadaŋ.”

⁶⁰Tocelut nai ŋituŋa daadaŋ nooi, kipuro Akuj ŋina eiununui ŋulu igenosi iŋes.

⁶¹Totiŋa ŋituŋa ŋikasikou ŋuluarei ŋul neni aronon, anerae anakiro a ŋuna erworosi ikes ŋikulepek, abu Daniel toryamu atemar erworosi ikes ŋakiro ŋuna ka alyokonu. Apotu ŋituŋa kitiyata neni a ŋikasikou a ŋul ŋuna aronok ŋuna sek ayeunito ikes akitiya neni a ikidunyet kec.

⁶²Apotu ŋituŋa toara ikes iwuapito ŋuna elimunitoe alokisila a Moses. Aŋun, aponi akoloŋit ŋin nyebukor ŋaokot a ituŋanan a ŋini pa etiyat aronis adio.

⁶³Kipuro Ilikia ka naberu keŋ Akuj aŋuna anakoku kec Susana, kitiya Yoakim lokile a Susana daŋ ŋunapei kaapei ka ŋiyeneta a Susana daadaŋ, anerae aponi toyenunae atemar nyitiyat iŋes ŋakiro ŋuna a ŋileec.

⁶⁴Tosodi ameun akoloŋit ŋin, apotu ŋituŋa kitopoloosi Daniel alotuŋa a daadaŋ.