Read ngakarimojong Esek. 1 Bible Online

Esek. 1 - ngakarimojong bible

Esek. 1

¹Alokaru a ŋolo a ŋatomoniuni, elap ŋolo a ŋiomwon, ŋirwa ke elap ŋikan, eriŋa ayoŋ ikiya ka ŋirikon ŋuluce diyete aŋolol Kebar neni aponi itorikor, abu kidiama toŋaar, eŋolik ayoŋ ŋatakanikineta ŋuna aponito aneni ka Akuj.

²Ani erae ŋirwa ke elap ŋikan, (alokaru a ŋolo a ŋikan akisyakin apaki ŋina arikorere Yeoiakin erwosit anakwap keŋ,)

³abu akirot ke Ekapolon bu neni kaŋ a Esekiel a esacaradoti a ŋolo arae lokoku a Busi, eriŋa ayoŋ ayai Babilon diyete aŋolol Kebar. Abu ayoŋ oryamu apedor ŋina ka Akuj a nen.

⁴Abu ayoŋ eŋoliya Kuju, eŋolik ekuwuam ŋolo apolon ebunit, toyai edou ŋolo apolon nooi ŋolo emilyaa jik pa ajoŋoenene, kidiŋ neni anoki ikwa akim ayai ibore ŋini amilimilan ikwa eburonis.

⁵Kidiŋ neni anoki ikwa akim, ayakasi ŋitorubei ŋiomwon ŋulu asibito ŋulu a ŋisubuna a ŋulu eyarete. Atakanete ikes ikote ne: Ekwaan ka ŋituŋa,

⁶ayakar ŋolotorube ŋireetin ŋiomwon ka ayakar ŋolotorube ŋabebenuk ŋaomwon.

⁷Acorot ŋakejen kec ka arae ŋimolokony aya neni sek dapal a akeju, amilimilete ŋitorubei ŋul nooi ikwa eburonis ŋolo epwasitae.

⁸Kwap apei bebenukat a ŋolotorube, ayai akan ŋina ekoni ŋina a ituŋanan. Ayakatar ŋitorubei ŋuluomwon ŋul ŋireetin ka ŋabebenuk,

⁹ido atapanakina ŋabebenuk kec. Abu ŋolotorube torubak jik elosi kiŋaren, ibakarito erae ibore ipei, mam ŋolo abu toboŋo.

¹⁰Atakanete ŋireetin kec ikote ne: Ayakar ŋolotorube ŋace ereet ŋolo ekwaan ka ŋolo a ituŋanan, ido teten a ŋolotorube, ayai ereet ŋolo ekwaan ka ŋolo ke eŋatuny, kedyeny a ŋolotorube ayai ereet ŋolo ke emoŋ, ayakar daŋ ŋolotorube ereet ŋolo ke egole;

¹¹ekote nen ŋireetin kec. Apetarito ŋitorubei ŋul ŋabebenuk kec kidiama; ayakar ŋolotorube ŋabebenuk ŋaarei, atapakina akisalet a abebenukat a epei nakisalet a abebenukat a ŋoloce, kimukito ŋabebenuk ŋace ŋaarei ŋawat kec.

¹²Arubakinit ŋolotorube elosi kiŋaren jik; neni daadaŋ acamito ikes alosit, apotu ikes toloto inaa emam aboŋor.

¹³Kidiŋ ŋisubuna ŋul ŋulu ayarete, ayai ibore ŋini anoki ikwa ŋatotol, kori ŋatocyo. Alosi akica ŋin kaku ka kiŋaren alokidiŋ ŋisubuna ŋul; akwaŋ akica ŋin kya ka atakanunui akimilyaa anakica a ŋin.

¹⁴Atakanunuyete ŋisubuna ŋul atipei elosete kaku ka kiŋaren ikwa akimilyaunet.

¹⁵Ani eŋolikini ayoŋ ŋisubuna ŋulu ayarete ŋul, abu ayoŋ eŋolik ibore ŋini ekoni ŋakejen a agaari eyai kwap diyete ŋolosubuna, a ŋolosubuna ayakar apei.

¹⁶Atakanete ŋiboorei ŋul ikote ŋakejen a agaari ka etiyaunitae ikote ne: Anwakinwakete ikwa amoru ŋina aliban nooi ŋina enyaritae Karisolite ka ekwaan ŋunaomwon ŋun daadaŋ. Etiyaunitae ikes daadaŋ ikwaan ka ibore ŋini ikoni ŋakejen ŋuna ka agaari ka ayakasi tooma ŋakejen ŋun ŋakejen ŋace ŋuna ekote ŋunapei ŋun.

¹⁷Ani elosete ikes, apedorete alosit ŋolowae daadaŋ alotooma ŋiwaetin ŋuluomwon ŋulu eŋoliyarito ikes; pa aboboŋeneete ŋiboorei ŋulu ekwaan ka ŋakejen ŋuna a agaari ŋun elosete ŋisubuna.

¹⁸Aoyak ŋikelyo a ŋiboorei a ŋulu ekwaan ka ŋakejen a agaari ŋul, arae ŋulu ikitubulete, eleleba ŋakonyen ŋiwaetin daadaŋ a ŋiboorei a ŋulu ekwaan ka ŋakejen a agaari a ŋul.

¹⁹Ani erotokinete ŋisubuna ŋulu ayarete ŋul, arotonokinete daŋ ŋiboorei ŋulu ekwaan ka ŋakejen a agaari, ŋulu aya nawaetin kec; ani enyounete alokwap, anyoununeete ŋiboorei ŋul daŋ alokwap.

²⁰Apedorito ŋisubuna ŋul alosit neni daadaŋ acamito ikes, ido ŋiboorei ŋulu ekwaan ka ŋakejen a agaari daŋ, aloseneneete neni elosete ŋisubuna anerae ayai acamit a ŋisubuna neni a ŋiboorei a ŋulu ekwaan ka ŋakejen a agaari.

²¹Ani erotokinete ŋisubuna, torotokis ŋiboorei ŋulu ekwaan ka ŋakejen a agaari daŋ, ani ewoete, towua ikes daŋ, ani enyounete ŋisubuna alokwap, tonyout ŋiboorei ŋul daŋ alokwap, anerae ayai acamit ŋina a ŋisubuna neni a ŋiboorei a ŋulu ekwaan ka ŋakejen a agaari a ŋul.

²²Kidiama ŋakyes a ŋisubuna a ŋul, apetakina ibore ŋini ekwaan ka ariwo ŋina alokidiama ka anwakinwaki ekoni amoru ŋina aliban nooi ŋina enyaritae Karisolite, arae ŋini ikitubuli.

²³Apetara ŋabebenuk a ŋisubuna a ŋul alokwap ariwo ŋin, kiteos ŋina ke epei ka ŋina a ŋoloce ka ayakar ŋolosubuna ŋabebenuk ŋaarei ŋuna arapito akuwan keŋ.

²⁴Ani erotokinete ŋisubuna ŋul, abu ayoŋ eira eruye a ŋabebenuk kec ŋolo arwo ikwa ŋakipi ŋuna ipumasi, kori ikwa etoil ŋolo ka Akuj a ŋina Etiron, kori ikwa ŋitoilon a ŋasigarya a ŋuna alalak nooi a ŋuna esurur. Ani ewoete ikes, totiyaut ŋabebenuk kwap.

²⁵Bu nai etoil alokidiama ayaye ariwo ŋina ayai kidiama ŋakyes kec apaki ŋina awuatar ikes etiyaunito ŋabebenuk kec kwap.

²⁶Yaye ariwo ŋina ayai kidiama ŋakyes kec, ayai ibore ŋini ekwaan ka ekicoloŋ ŋolo ka apolou, atakani itiyaunitae a amoru a ŋinapus a ŋina enyaritae Sapire. Eboi alokicoloŋ a ŋol etorube ŋolo ekwaan ka ŋolo a ituŋanan.

²⁷Abu ayoŋ eŋolek ibore ŋini asibit acir keŋ alokidiama anakuwan a etorube a ŋol, atakani ikwaan ka asuwat ŋina enepi ŋina eyai nakim; ameun a nen tari kwap keŋ, atakani esibit akim. Ayai etorube ŋol kidiŋ akica ŋina akwaŋan kya.

²⁸Ekoni akica ŋin ileere neni ileereo alokakinet apaki ŋina eyakar akiru tocai akoloŋ. Ayai etorube ŋol kidiŋ akica ŋin. Arae ŋol etakane ŋolo ka apolou a ŋina ke Ekapolon. Ani eŋolikini ayoŋ akica ŋin, abu omin kwap, oper obuburiyar, eiira etoil a ice irworo neni kaŋ.