Read ngakarimojong Esek. 10 Bible Online

Esek. 10 - ngakarimojong bible

Esek. 10

¹Abu nai ayoŋ eŋoliya nariwo ŋina eyai kidiama ŋakyes a ŋisubuna a ŋulu a ŋabebenuk, ayai nen ibore ŋini ekwaan ka ekicoloŋ ŋolo itiyaunitae a ŋamoru a ŋunapusiyek a ŋuna enyaritae Sapire.

²Tema Akuj neni a ekile a ŋolo anapit ŋilowi ŋulu amilimilak, “Ape toloma kidiŋ ŋiboorei ŋulu ikwaan ka ŋakejen a agaari ŋulu eyakasi kwap ŋisubuna ŋulu a ŋabebenuk kilelebik a nen alokidiŋ ŋisubuna ŋulu a ŋabebenuk, ŋatotol nakan kon, ido kielak lotaun.” Abu ayoŋ eteo ekile ŋol elosi alomar Kai ka Akuj.

³Awuasi ŋisubuna ŋulu a ŋabebenuk alowae a ŋolo alo kwap Akai ka Akuj elomari ekile ŋol Kai ka Akuj, ido abu edou kilelebun nalapatu ŋina alokidiŋ Akai ka Akuj.

⁴Abu nai akica ŋina ka Akuj tolomu aneni a ŋisubuna a ŋulu a ŋabebenuk, min lopuke ŋolo ka Akai ka Akuj; kilelebun edou Kai ka Akuj ka kilelebun akwaŋis ŋina ka akica a Ekapolon nalapatu ŋina ka Akai ka Akuj.

⁵Apaki ŋin, apedoritae akiirar eruye a ŋabebenuk a ŋisubuna ŋulu a ŋabebenuk tari iyai nalapatu ŋina alokiŋa Akai ka Akuj, ekoni eruye ŋol irworikini etoil ka Akuj a ŋina etiron.

⁶Ani elimokini Akuj ekile ŋolo anapit ŋilowi ŋulu amilimilak alemun akim alokidiŋ ŋiboorei ŋulu ikwaan ka ŋakejen a agaari ŋulu aya kidiŋ ŋisubuna ŋulu a ŋabebenuk, abu ekile ŋol toloma Kai ka Akuj; towo alodiyete epei a ŋiboorei a ŋulu ikwaan ka ŋakejen a agaari.

⁷Abu epei a ŋisubuna ŋulu a ŋabebenuk kiopeiyo akan keŋ nakim ŋina ayai nen kidiŋ kec, tolemu akim adio, kiwuak nakan a ekile a ŋolo a napit ŋilowi ŋulu amilimilak, ya ekile ŋol akim tolomarya kiŋa.

⁸Abu ayoŋ eŋolik ŋolosubuna eyakar akan ŋina ekoni ŋina a ituŋanan kwap abebenukat keŋ.

⁹Ani aŋoleŋolekini ayoŋ, abu eŋolik alodiyete ŋisubuna ŋulu a ŋabebenuk ŋiboorei ŋulu ekwaan ka ŋakejen a agaari, diyete ŋolosubuna, ayai ipei, anakinwakete ŋiboorei ŋulu ekwaan ka ŋakejen a agaari ŋul ikwa amoru ŋina enyaŋiyarit ŋina enyaritae Karisolite.

¹⁰Atakanete ŋiboorei ŋulu ekwaan ka ŋakejen a agaari ŋuluomwon ŋul ikwaan, tooma ŋiboorei ŋulu ekwaan ka ŋakejen a agaari ŋul, ayai ibore ice ŋini ekwaan ka ŋakejen a agaari.

¹¹Ani erotokinete ŋisubuna ŋulu a ŋabebenuk apedorito alosit ŋolowae ca daadaŋ emam akiŋoliyar lowae ŋolo elosete ikes. Apedorito ikes alosit kaapei lowae ŋolo elosi ibore ŋini ekwaan ka ŋakejen a agaari ŋini iŋareni, amam ŋuluce aboboŋ lowae ŋolo elosete ikes.

¹²Ayakasi ŋakonyen nawat a ŋisubuna ŋulu a ŋabebenuk tari nakausinei, nakan, nabebenuk ka loboorei ŋuluomwon ŋulu ekwaan ka ŋakejen a agaari daŋ eleleba ŋakonyen ŋiwaetin daadaŋ.

¹³Ani apupi ayoŋ, anyaritae ŋiboorei ŋulu ekwaan ka ŋakejen a agaari ŋul ebe, “Ŋiboorei ŋulu ikwaan ka ŋakejen a agaari ipiripirete elosete kaapei.”

¹⁴Ayakatar ŋisubuna ŋulu a ŋabebenuk ŋuluomwon ŋul daadaŋ ŋireetin, ekoni ereet a ŋolo ke ekiŋaren ŋolo a esubuna a ŋolo a ŋabebenuk, ŋolo a ŋiarei, ekoni ereet ŋolo a ituŋanan, ŋolo a ŋiuni, ekoni ereet ŋolo a eŋatuny ka ŋolo a ŋiomwon, ekoni ereet ŋolo a egole.

¹⁵Arae ŋul ŋisubuna ŋulu a ŋabebenuk ŋulupei sek eŋolikinit ayoŋ alodiyete aŋolol Kebar. Ani enyounete ŋisubuna ŋulu a ŋabebenuk,

¹⁶apaki ŋina arotokinioto, apotu ŋiboorei ŋulu ekwaan ka ŋakejen a agaari daŋ ŋul toloto ka ikes ibakarito kaapei. Ani epororete ŋisubuna ŋulu a ŋabebenuk alokwap, apotu ŋiboorei ŋulu ekwaan ka ŋakejen a agaari daŋ ŋul torukosi kaapei ka ikes.

¹⁷Ani ewoete ŋisubuna ŋulu a ŋabebenuk, towua ikes daŋ, ani epororete ŋisubuna ŋulu a ŋabebenuk, toporosi ikes daŋ kaapei ka ikes, anerae ayai etau a ŋisubuna ŋulu a ŋabebenuk neni a ŋiboorei a ŋulu ekwaan ka ŋakejen a agaari a ŋul.

¹⁸Abu nai akica ŋina a Ekapolon tolot alopuke a ŋolo ka Akai ka Akuj, min kidiama ŋisubuna ŋulu a ŋabebenuk.

¹⁹Apotu ŋisubuna ŋulu a ŋabebenuk kikeut ŋabebenuk kec, toporosi alokwap ete ayoŋ elosete kaapei ka ŋiboorei ŋulu ekwaan ka ŋakejen a agaari ŋul. Towua ikes alopuke a ŋolo alo Kide Akai ka Akuj, ayai kidiama kec akica ŋina ka Akuj a Ŋisirael.

²⁰Arae ŋul ŋisubuna ŋulu a ŋabebenuk ŋulu sek eŋolikinit ayoŋ alodiyete aŋolol Kebar, eyakasi kwap Akuj ŋina a Ŋisirael, ido ayeni ayoŋ atemar arae ikes ŋisubuna ŋulu a ŋabebenuk.

²¹Ayakar ŋolosubuna ŋireetin ŋiomwon ka ŋabebenuk ŋaomwon, ido kwap ŋabebenuk kec, ayakasi ŋiboorei ŋulu ekwaan ka ŋakan a ituŋanan.

²²Nai epite ŋolo atakaniata ŋireetin kec, arae ŋulu ekwaan ka ŋulu sek eŋolikinit ayoŋ alodiyete aŋolol Kebar. Abu ŋolosubuna torubak elosi kiŋaren jik emam akiri iwace.