Read ngakarimojong Esek. 12 Bible Online

Esek. 12 - ngakarimojong bible

Esek. 12

¹Abu Ekapolon kirwor neni kaŋ tema,

²“Lokoku a ituŋanan, iboiyete iyoŋ ka ŋituŋa ŋulu akaŋerito ayoŋ. Eyakatar ikes ŋakonyen akiŋolikinia, nai nyiteete, eyakatar ikes ŋaki akiirarya, nai nyepupete, anerae erae ikes ŋituŋa ŋulu nyiwuapio ŋuna abala ayoŋ.

³Aŋun, lokoku a ituŋanan, kitemonok ŋiboro kon ikwapei ituŋanan ŋini ikiritaritae iwace, ido emaikina torotok eriŋa akoloŋ nyedoiyoro ka ikiteete iyoŋ ŋituŋa. Emaikina iyoŋ torotok anakibois kon tolot nakibois ace ikoni ituŋanan ŋini iritaritae anakibois keŋ. Acepaki eyenunete ikes ŋuna ikitorotokis iyoŋ tari daŋ kerae ikes ŋituŋa ŋulu nyiwuapito ŋuna abala ayoŋ.

⁴Yau ŋiboro kon kiŋa naparan iteete ŋituŋa, ikotere kiŋolikis ikes atemar idokinit iyoŋ iwace. Ani nai edoli ŋisaae ŋulu ke eboŋ, emaikina iyoŋ torotok ikiteete ikes, towotok ikwa ituŋanan ŋini edokinit iwace.

⁵Topedok eole narwatata iteete ikes, ido kitoryo ŋiboro kon nen.

⁶Tonap ŋiboro kon aloseketa kon iteete ikes tolomarya kiŋa nakiryonut; emaikina iyoŋ torap eeret kon, ikotere nyiŋolik iyoŋ neni ipudae, anerae eketuruwo ayoŋ iyoŋ akitoodikinet ŋina einakini Ŋisirael atamatam ŋuna kitiyakina.”

⁷Aŋun, abu ayoŋ etiya ŋun lopite ŋolo ekecikitere. Abu ayoŋ oyau kiŋa ŋiboro kaŋ naparan eenen itemokino aŋuna ka arotokin. Ani edoli eboŋ, abu ayoŋ opedok a ŋakan kaŋ eole narwatata, olomarya ŋiboro kaŋ kiŋa nakiryonut anapit aloseketa kaŋ iteete ikes.

⁸Anitaparacu, abu Ekapolon kirworo neni kaŋ ekeŋit tema,

⁹“Lokoku a ituŋanan pa mono apotu Ŋisirael, ŋituŋa ŋulu nyiwuapito ŋuna abala ayoŋ ikiŋita iyoŋ ebe, ‘Nyo itiyae iyoŋ a?’

¹⁰Tolimok ikes atemar ŋakiro ŋuna irworo Ekapolon Akuj ikes nu, ‘Erae ŋakiro nu ŋuna a erwosit a ŋolo ipukat Yerusalem ka ŋuna a ŋituŋa a daadaŋ a ŋulu iboiyete alo Yerusalem,

¹¹tolimok ikes atemar itoodiunito ŋuna itiya iyoŋ ŋuna itiyakinosi neni kec, edokinete ikes nakwapin ka ikamaryo ikes.

¹²Eryoŋi aloseketa keŋ erwosit ŋolo ipukat ikes ŋiboro keŋ tolomarya nakiryonut, tosi, kitor loole ŋolo epedokinete ŋituŋa narwatata a ŋuna keŋ. Erapi iŋes ŋakonyen keŋ, ikotere nyiŋolik neni ipudae iŋes.

¹³Nai apetari ayoŋ atibait kaŋ, ikotere ekamunia iŋes, oya nai iŋes lotaun ŋolo a Babilon, nakwap ŋina a Ŋibabiloniyae, nai nyiŋolikini iŋes akwap ka etwani iŋes a ina.

¹⁴Eelari ayoŋ lowaetin daadaŋ ŋituŋa ŋulu ka atukot keŋ daadaŋ ka ŋulu iŋarakinito iŋes akipuka ejok ta ŋasigarya keŋ daadaŋ. Ainakini ayoŋ ŋituŋa kiwara ikes toara.

¹⁵Apaki ŋina eritarya ayoŋ ikes lotuŋa a ŋakwapin, eelak nakwapin ŋunagelae, eyenunete nai ikes atemar arae ayoŋ Ekapolon.

¹⁶Nai emyekini ayoŋ ŋidikudyo kec nyeari ka nyear akoro ka ŋidekesyo, ikotere nai ŋul elimokinete ŋituŋa a ŋakwapin a ŋuna iboiyoto ikes asiilyo ŋina apotu ikes kitiyata ka ecamunete atemar arae ayoŋ Ekapolon.’ ”

¹⁷Abu Ekapolon kirwor neni kaŋ tema,

¹⁸“Lokoku a ituŋanan, tonyam amugati kon imarani ka tomat ŋakipi kon ikelikeela ka ikuryana;

¹⁹ido tolimok ŋituŋa ŋulu ka akwap kon atemar ŋakiro ŋuna irworo Ekapolon Akuj aŋuna a ŋituŋa a ŋulu iboiyete alo Yerusalem anakwap a Isirael ikes nu, ‘Enyamete ikes akimuj kec ekuryanito ka emasete ŋakipi kec ekadakinit, anerae elemaryo anakwap kec ibore daadaŋ aŋuna ka aryenyeo a ŋituŋa a daadaŋ a ŋulu iboiyete anakwap a ŋin.

²⁰Eruwor ŋitaunio ŋulu tokona eyakasi ŋituŋa ŋireŋoroto koŋin ka esiluni akwap, ido iyenunete iyes atemar arae ayoŋ Ekapolon.’ ”

²¹Abu Ekapolon kirwor neni naŋ ekeŋit tema,

²²“Lokoku a ituŋanan, anikitadapet na ŋina irworosi ŋituŋa aŋuna ka akwap a Isirael ebasi, ‘Elosete ŋirwa kiŋaren, ido eruwor ŋuna itoodiunitae daadaŋ ŋakoŋinae?’

²³Tolimok tokona ikes atemar ŋakiro ŋuna irworo Ekapolon Akuj ikes nu, ‘Etasaluni ayoŋ akitadapet na, ido ejoŋoete ikes alimunun iŋes jik alo Isirael. Nai tolimok ikes atemar aapuut ŋirwa ŋulu isiyookinere ŋakiro ŋuna itoodiunetae daadaŋ.

²⁴Emamukaun nabo alotuŋa a Isirael ŋakitoodyanakineta ŋuna ka alyokonu, kori akidwar ŋuna etooliyorok.

²⁵Nai ayoŋ Ekapolon alimuni ŋuna alimuni, ido isiyookinio. Emam nabo nyitididiyo ŋun; nai alorwa kus iyes ŋituŋa a Isirael ŋulu ikiŋero ayoŋ, alimuni ayoŋ akirot ka esiyookini.’ ”

²⁶Abu Ekapolon kirwor neni kaŋ tema,

²⁷“Lokoku a ituŋanan, ebasi Ŋisirael ebe, ‘Erae akitoodikinet ŋina ite iŋes ŋina a ŋikaru a ŋulu alalak a ŋulu eponito ameun tokona, ido edwari iŋes ŋakiro ŋuna a momit.’

²⁸Aŋun, tolimok ikes atemar ŋakiro ŋuna irworo Ekapolon Akuj ikes nu, ‘Emam nabo alotooma ŋakiro ŋuna alimu ayoŋ ŋuna itididiyo, ŋakiro daadaŋ ŋuna alimu ayoŋ, isiyookinio.’ ”