Read ngakarimojong Esek. 13 Bible Online

Esek. 13 - ngakarimojong bible

Esek. 13

¹Abu Ekapolon kirwor neni kaŋ tema,

²“Lokoku a ituŋanan, todwar itoroniyarit ŋikadwarak a Isirael ŋulu tokona edwarete. Tolimok ŋikadwarak ŋulu edwarete ŋuna etamununeete ikes ŋikulepek ebe, ‘Kiirasi akirot ŋina a Ekapolon,’

³irworo Ekapolon Akuj atemar, okoe iyes ŋikadwarak ŋulu irae ŋibaŋaanotin, ŋulu iwuapito ŋuna a ŋitai kus a ŋikulepek ka emam ŋuna iŋolikis!

⁴Okoe Ŋisirael, erae ŋikadwarak kus ŋikoŋinae ikwaan ka ŋikweei ŋulu eyakasi loreŋoroto.

⁵Nyitipeiyoro iyes neni eukonoro anarwatata alotaun kus, kori nyedukokina iyes nabo neni eukoro anarwatata aŋuna a Ŋisirael, ikotere arwatata ŋin eiuni Ŋisirael apaki ŋina ke ejie a ŋolo ebuni akoloŋit ŋina ke Ekapolon.

⁶Erae ŋakitoodyanakineta kec ŋuna ka alyokonu ka erae ŋuna edwarete ikes amodiyo. Ebasi ikes, ‘Alimu Ekapolon ŋakiro nu,’ nai nyiyakiyara Ekapolon ikes, ido idarito ikes kisiyookinoe ŋakiro kec.

⁷Nyiŋolikina mono iyes ŋakitoodyanakineta ŋuna erae alyokonu ka akidwar ŋina erae amodiyo anakirworo ebe, ‘Alimu Ekapolon ŋakiro nu,’ tari daŋ pakalimunit ayoŋ a?

⁸“Aŋun, ŋakiro ŋuna irworo Ekapolon Akuj ikes nu, ‘Aŋuna irworyata iyes alyokonu ka itiyaata ŋakitoodyanakineta ŋuna ka amodiyo, ekeman ayoŋ iyes.’

⁹Esicani ayoŋ ŋikadwarak ŋulu iŋolyanakinete ŋuna ka alyokonu, ido edwarete amodiyo. Nyeruwor ikes ŋituŋa ŋulu ka atukot kaŋ, kori nyigiryo ŋirorwa kec neni igiritae Ŋisirael, kori nyelomarete ikes nakwap a Isirael. Ŋun nai iyenuniata iyes atemar arae ayoŋ Ekapolon Akuj.

¹⁰Adaut ŋikadwarak ŋulu alyokonok ŋul akitooliyor ŋituŋa kaŋ ebasi neni kec, ‘Kiryama ka ekisil, nai tomam bo ekisil’. Ani edukokinete ŋituŋa kaŋ a ŋamoru arwatata ŋina epatana akielar, epote ŋikadwarak ŋul kirworo ŋuna a ŋisoswae aŋuna ka arwatata a ŋin.

¹¹Tolimok ŋikadwarak ŋul atemar eritakin arwatata ŋin, eyakuuni ayoŋ akiru ŋina alalan, aritauni ayoŋ ŋakako ka ekuwuam ŋolo ekusi nooi.

¹²Ani mono ŋina eritakinor arwatata ŋin, nyikiŋisyo mono iyes ŋikadwarak ebe, ‘Irworosi paaran iyes atemar egogoŋ arwatata na, nyobo aritakinor?’

¹³Aŋun, irworo Ekapolon Akuj ebe, ‘Ananyunyura kaŋ etukutuni ayoŋ ekuwuam ka anaŋoit kaŋ, eyakaun akiru ŋina alalan ka ŋakako ŋuna eritakinete arwatata ŋin.

¹⁴Aritakini ayoŋ arwatata ŋina ibasi iyes egogoŋ ŋin, eperikini kwap, todaun ibore ewoi anakisyakinet keŋ apaki ŋina eritaror iŋes, itwanikinete iyes tooma keŋ, ido iyenunete atemar arae ayoŋ Ekapolon.

¹⁵Ewuakini ayoŋ anyunyura kaŋ narwatata ka neni a ŋulu apotu kirworo ŋisosowae. Akalimokini ayoŋ iyes atemar adaun arwatata ka adaun ŋulu apotu kiosakis eraŋgi ŋolo akwaŋan ka adaun ŋulu apotu kirworo ŋisoswae

¹⁶adaunosi ŋikadwarak a Isirael ŋulu apotu todwara ŋakiro a Yerusalem ka kiŋolyanakis ŋakitoodyanakineta ŋuna a ekisil aŋuna a Yerusalem, nai tomam bo ekisil.’

¹⁷“Nai iyoŋ lokoku a ituŋanan, kitoronia ŋaberu ŋuna erae ŋidwe a ŋituŋa kon, ŋaberu ŋuna edwarete ŋakiro ŋuna etamete ikes ŋakulepek. Todwar ŋakiro ŋuna itoroniaritor iyoŋ ikes.

¹⁸Tolimok ikes atemar ŋakiro ŋuna irworo Ekapolon Akuj ikes nu, ‘Ekaŋ iyes ŋaberu ŋuna idonyete ŋakujo naraco ŋuna inapito anakan kus a daadaŋ ka ŋuna idonyete ŋakitambarae ŋuna a ŋakyes ŋuna apolok ka ŋuna cicik tonapa anakyes kus, ikotere ibatarete ŋituŋa kaŋ. Ibatarete mono iyes akiyar a ŋituŋa kaŋ nai kidarito ŋina kus a?

¹⁹Idaut iyes akiyany ayoŋ alotuŋa kaŋ aŋuna ca ka aryamunia ŋikinyom ŋulu ikote erau ŋidi ka ŋanyile a ŋamugati ŋadi. Idaut iyes anamodyanakin ŋituŋa kaŋ ŋulu eminasi akipup ŋakiro ŋuna erae amodiyo, akiar ŋituŋa ŋulu pa amaikina toarae ka akimyekin ŋulu pa amaikina kimyekinae eyarete.’

²⁰“Aŋun, ŋakiro ŋuna irworo Ekapolon Akuj ikes nu, ‘Etoroniyarit ayoŋ ŋikito ŋulu ikukujaata iyes ŋituŋa toara ikwa ŋikyeny, acilari ayoŋ ŋikito ŋul anaraco a ŋuna inapito iyes anakan, alacakini ayoŋ ŋituŋa ŋulu ienito iyes ikwa ŋikeny.

²¹Aciliciliyari ayoŋ ŋakitambarae a ŋakyes kus, oiu ŋituŋa kaŋ anapedor kus, ido nyikyenatar nabo jik iyes ikes anapedor kus, iyenunete nai iyes atemar arae ayoŋ Ekapolon.

²²Aŋuna abunio alyokonu kus kiwuak ajamao lotuŋa ŋulu sek ajokak, tari daŋ pa esicanit ayoŋ ikes ka aŋuna iponiata iyes kisimukekis ŋulu aronok arubakin itiyaete aronis akilo aiun akiyar kec;

²³eketuruwori ayoŋ iyes ŋulu nyiŋolikinete nabo ŋakitoodyanakineta ŋuna ka alyokonu kus, kori ŋulu nyidwarete ŋakiro ŋadi. Aiuni ayoŋ ŋituŋa kaŋ anapedor kus, toyenut nai iyes atemar arae ayoŋ Ekapolon.’ ”