Read ngakarimojong Esek. 2 Bible Online

Esek. 2 - ngakarimojong bible

Esek. 2

¹Tema, “Okoe, lokoku a ituŋanan, tonyou towo, ikotere okolimok iyoŋ ŋakiro.”

²Ani irworikini iŋes, abu etau bu neni kaŋ, eketonyou ayoŋ owo, eira ayoŋ iŋes irworo neni kaŋ,

³ebala, “Lokoku a ituŋanan, ekeyakiyari ayoŋ iyoŋ neni a Ŋisirael, lotuŋa ŋulu aruwor ŋikaŋerok, ŋulu akaŋero ayoŋ; ŋinapei akitodol tokona, lopite ŋolo aponiata atapapaa kec okoŋeryoto ayoŋ.

⁴Erae ŋituŋa ŋulu ekeyakiyari ayoŋ iyoŋ neni kec ŋulu nyeketopoloorito ayoŋ ka erae ŋulu egogoŋ ŋakyes. Tolimok ikes ebe,

⁵“Ŋakiro ŋuna irworo Ekapolon Akuj ikes nu, ‘Kecamito ikes akiirar ŋakiro ŋuna irworo iyoŋ, kori pa kecamito (anerae erae ikes ekal ŋolo aŋeron), eyenunete atemar arukito ikes ka ekadwaran.’

⁶Nai iyoŋ lokoku a ituŋanan, nyikuryaniar aŋuna kec, kori nyiker ŋakiro kec tari kiyai iyoŋ nakitukuruworeta ka kepipil ŋakiro kec ikwa ŋikukwa, kori kiboi iyoŋ alokidiŋ ŋituŋa ŋulu ikote ŋitwania. Nai nyikuryaniar aŋuna a ŋakiro kec ka nyikitubulo ikes iyoŋ iŋolikini, anerae erae ikes ekal ŋolo aŋeron.

⁷Emaikina iyoŋ kirwor ŋakiro kaŋ neni kec, kecamito akiirar, kori pa kecamito akiirar; anerae erae ikes ekal ŋolo aŋeron.

⁸“Nai iyoŋ lokoku a ituŋanan, kiira ŋakiro ŋuna erworo ayoŋ neni kon, nyiŋer ŋakiro kaŋ ikwa ekal ŋolo a ŋeron ŋol. Toŋaam kimuj ibore ŋini akainakini ayoŋ iyoŋ.”

⁹Abu nai ayoŋ oŋoleŋolek, eŋolik akan iopeunitoe neni kaŋ, ayai nakan ŋin ekitaabo ŋolo egiritae ŋakiro.

¹⁰Abu ŋini erworo neni kaŋ toŋaa ekitaabo ŋol alokiŋaren kaŋ, eŋolik ayoŋ igiritae ŋakiro kaku ka kiŋaren a ekitaabo a ŋol. Arae ŋakiro ŋuna egiritae nen ŋuna ka akiolol ka akigworo ta ŋuna abasi ekaŋ iyes.