Read ngakarimojong Esek. 24 Bible Online

Esek. 24 - ngakarimojong bible

Esek. 24

¹Alokaru a ŋolo a ŋikanikaomwon, elap ŋolo a ŋitomon, ŋirwa ke elap ŋitomon, abu Ekapolon kirwor neni kaŋ tema,

²“Lokoku a ituŋanan, kigir nakoloŋit na ŋirwa a akoloŋit ana, anerae adau erwosit a Babilon akirikaun Yerusalem akoloŋit na.

³Tolimok ŋituŋa a Yerusalem ŋulu erae ŋikaŋerok akitadapet na ebe, ‘Alimu Ekapolon Akuj atemar, kidorokisi amot ŋina kipoet; kidorokisi iŋes nakim, ido kiwuakis ŋakipi tooma keŋ;

⁴kiwuakisi tooma keŋ akiriŋ ŋina etubutubutoe, kiwuakisi tooma keŋ akiriŋ ŋina ajokan daadaŋ ŋina etubutubutoe, ŋina aŋamuroi ka ŋina a ŋiseketa; kilelebikisi ŋakoyo ŋuna edekitoe tooma keŋ.

⁵Toseutu anamesekin ibarasit ŋini ajokan nooi, kirepakisi ŋakito kwap amot, kidorokisi akiriŋ a ibarasit a ŋin a nen etubutubutoe, kidorokisi ŋakoyo a ibarasit a ŋin a amot a ŋin.

⁶“‘Alimu Ekapolon Akuj atemar, Ekaŋ iyoŋ etaun ŋolo earete ŋituŋa kon ŋuluce, ŋolo ikwaan ka amot ŋina iroiroit tooma, ŋolo ikwaan ka amot ŋina nyelemanar eroiroi alotooma keŋ! Kisunyutu akiriŋ ŋin alotooma keŋ a ŋatubutubuyet emam asere ŋina erae tolemunae ka toesikinae.

⁷Eyakasi tooma Yerusalem ŋituŋa ŋulu apotu ŋituŋa a Yerusalem toara; apotu ŋituŋa a Yerusalem kiperyonokis ŋawat a ŋul natabab nenilapat, apotu nyiperyonokis nalup, neni epedoryata ŋawat make arapuwar a ŋalup.

⁸Aŋuna ka ainakin ayoŋ onyunyurikin nooi enyaŋa ŋituŋa ŋulu apotu ikes toara, eperikini ayoŋ ŋawat a ŋituŋa a Yerusalem natabab nenilapat, ikotere ŋalup nyerapuwasi ŋawat ŋun.

⁹Aŋun, alimu tokona Ekapolon Akuj atemar, ekaŋ iyoŋ etaun ŋolo earete ŋituŋa kon ŋuluce! Ayoŋ daŋ, atukokini ŋakiro ŋuna alalak.

¹⁰Aŋun, torubakisi itukete ŋakito ka kinokakisi akim; kipoto akiriŋ ejok nooi, kinyalakisi ka ŋikito ŋulu itoboboete akimuj ka emaikina kicunyarae ŋakoyo.

¹¹Kikacakisi amot ŋin eorori kidiama ŋatotol, ikotere emwanuni, ido toreŋu elupe keŋ puu, nen nai etalarya ibore ŋini abosan alotooma keŋ, todaun eroiroi alotooma keŋ.

¹²Akaup ayoŋ erwori aŋuna a Yerusalem tomam ibore etiyakin; awou eroiroi keŋ ŋolobutur ŋol alemar aneni keŋ. Emaikina iŋes min nakim kaapei ka eroiroi keŋ!

¹³Ani eketaleuni ayoŋ iyoŋ analeeco kon a ŋina abosan, ibu iyoŋ nyitaleun anabosis kon a ŋin; mam nabo nyikitaleunio iyoŋ jik akitodol ŋina etemokinio ayoŋ ŋuna akaŋoikinitor iyoŋ.

¹⁴Ayoŋ Ekapolon adau alimun ŋun; ebunit apaki ka etiyakini ayoŋ ŋun. Nyemyekini ayoŋ akitiya ŋun, nyesyoni ayoŋ ituŋanan kon idio, mam tari nyeeŋuni ayoŋ aŋuna kon. Akatubokini ayoŋ iyoŋ aŋuna ŋipitesyo kon ka ŋakiro ŋuna itiyae iyoŋ.’”

¹⁵Abu Ekapolon kirwor neni kaŋ tema,

¹⁶“Lokoku a ituŋanan, eapi ayoŋ akinaŋ iyoŋ anaŋet apei bon tojoŋo akitere; nai nyigwori, kori nyikalouni, kori nyeleleunete ŋakiyo anakonyen kon.

¹⁷Igeuni iyoŋ akisuta, nai meere ŋina epupo; nyigwor aŋuna a ŋikatwak. Kimyek akopiya kon eenikina nakou ka ŋamuk kon eenikina nakejen; nyirap kwap ereet kon, kori nyinyam akimuj ŋina enyamete ŋikegworok.

¹⁸Aŋun, abu ayoŋ erwor neni aŋituŋa taparacu, ani edoli eboŋ, abu aberu kaŋ totwan. Ataparacu ŋinace, abu ayoŋ etiya ikwapei ekecikitere.”

¹⁹Apotu nai ŋituŋa ekeŋita ayoŋ temasi, “Nyicamit iyoŋ alimokin isua ŋuna itiyakin neni kosi anakiro a ŋuna itiyae iyoŋ a?”

²⁰Abu nai ayoŋ olimok ikes atemar abu Ekapolon kirwor neni kaŋ tema,

²¹“Tolimok Ŋisirael atemar ebala Ekapolon Akuj ebe, ‘Eapi ayoŋ amunaar akibois kaŋ ŋina asegan, ŋina erae iŋes iryamunitotor iyes agogoŋu ŋina iturotor, akibois ŋina ikibobokinit iyes akitere ka ŋina iburit ŋitai kus. Earyo a ekileŋ ŋidwe kus ŋulusapa ka ŋulupesur ŋulu ipotu iyes kimyekis alo Yerusalem.

²²Itiyaete nai iyes lopite ŋolo adaunia Esekiel akitiyaa. Nyirapete iyes kwap ŋireetin kus, kori nyinyamete iyes akimuj ŋina enyamete ŋikegworok.

²³Imyekinete iyes ŋakopiyae kus eenikina nakyes kus ka ŋamuk eenikina nakejen kus; nyigworete, kori nyikalounete iyes aŋuna a ŋasecisya kus, nai iyaloloŋiyorete iyes aŋuna a ŋasecisya kus ka igworete iyes aŋuna a ŋinice.

²⁴Eruwor Esekiel akitoodikinet aneni kus; itiyaete iyes lopite ŋolo etiyaa iŋes. Ani itiyakin ŋakiro ŋun, iyenunete iyes atemar arae ayoŋ Ekapolon Akuj.’

²⁵“Nai iyoŋ lokoku a ituŋanan, akoloŋit ŋina alemarya ayoŋ akibois kec ŋina eryamunitotor ikes agogoŋu, alelyanu kec ka apedor kec, akibois ŋina ebobokinit ikes akitere, ŋina iburit ŋitai kec; akoloŋit ŋina aarya ayoŋ ŋidwe kec ŋulusapa ka ŋulupesur,

²⁶akoloŋit ŋin, ebuni neni kon ituŋanan ŋini sek aris kebucar, ebuni iŋes alimokin iyoŋ ŋakiro ŋuna etiyakin.

²⁷Akoloŋit ŋin, eŋaar etoil kon ka irworikini iyoŋ nabo, irworikinete iyoŋ ka ituŋanan ŋini abucun ŋin, irworikini iyoŋ, nyirubakini iyoŋ ililiŋi. Aŋun, iruwor iyoŋ akitoodikinet neni kec ka eyenunete ikes atemar arae ayoŋ Ekapolon.”