Read ngakarimojong Esek. 29 Bible Online

Esek. 29 - ngakarimojong bible

Esek. 29

¹Alokaru a ŋolo a ŋitomon, elap ŋolo a ŋitomon, ŋirwa ke elap ŋitomon ka ŋiarei, abu Ekapolon kirwor neni kaŋ tema,

²“Lokoku a ituŋanan, kiŋoliya lowae ŋolo eyai Ijipit, ido todwar ŋakiro nu itoroniyarit Parao erwosit ŋolo a Ijipit ka ŋituŋa a Ijipit daadaŋ.

³Tolimok iŋes atemar, alimu Ekapolon Akuj ŋakiro nu ebe, ‘Ekemanit ayoŋ iyoŋ Parao erwosit ŋolo a Ijipit, iyoŋ epiu ŋolo iletete anakipi a ŋuna a ŋakitelesyo,’ ibala iyoŋ, ‘Aŋolol kaŋ Nile, erae ŋina kaŋ a elope; ayoŋ abu etiyau iŋes aŋuna kaŋ.’

⁴Ewuakini ayoŋ ŋikodoce loŋitiny kon, emyekini ayoŋ ŋikolya ŋulu a ŋakitelesyo ŋulu eya nakipi a ŋakitelesyo kimiidikin nakabebekwa kon, ido ekeriu ayoŋ iyoŋ anakipi a ŋuna a ŋakitelesyo kon kaapei ka ŋikolya ŋulu imiidikina nakabebekwa kon.

⁵Ekecutari ayoŋ iyoŋ naloŋisat, iyoŋ kaapei ka ŋikolya ŋulu eya nakipi ŋuna a ŋakitelesyo kon; Imasakin iyoŋ neni alapatan anariet, nyikidakunio iyoŋ a nen ikinuki. Adau ayoŋ ainakin iyoŋ ikwapei akimuj kec neni a ŋityaŋ a ŋulu ka akwap ka neni a ŋikyeny a ŋulu eporete.

⁶Ani etakanunete ŋun, eyenunete nai ŋituŋa a Ijipit daadaŋ atemar arae ayoŋ Ekapolon. Itiyakin ŋun, anerae apotu Ŋisirael toyariut neni kus Ŋijipitian, nai ipotu iyes nyijoketa aneni kec akilo asasaki ŋina ikiŋarakini kebunok daŋ.

⁷Ani ikitiŋete Ŋisirael iyes a ŋakan, ipotu iyes tobilibila ŋakan kec, kicumucuma ŋiseketa kec daadaŋ; ani egwaŋunosi ikes neni kus, ipotu iyes tobilibila ikes, kiŋwala ŋakejen keŋ nyepedosi alosit.

⁸“Aŋun, alimu Ekapolon Akuj ŋakiro nu ebe, ‘Iyoŋ akwap a Ijipit ayauni ayoŋ neni kon ŋikaarak ŋulu etiŋito ŋileŋia, earete ikes ŋituŋa kon ka ŋityaŋ ŋulu eya tooma kon;

⁹eruwor akwap a Ijipit ŋina asilon ka eruwor akoŋinait. Apaki nai ŋin eyenuniata Ŋijipitian atemar arae ayoŋ Ekapolon.’ “Aŋuna abunio Parao tolimu ebe, ‘Erae aŋolol Nile ŋina kaŋ, ayoŋ etiyauni iŋes,’

¹⁰adau ayoŋ akiman Parao a ŋakiro a ŋun, adau ayoŋ akiman ŋakitelesyo a ŋakipi kon, eturuwori ayoŋ akwap a Ijipit akoŋinait ŋina ekyenare, ŋina asilon ameun alo Migidol tari Siyene tomyaa tari lokukor keŋ ka Esiopia.

¹¹Mam ituŋanan itori nakwap a Ijipit, mam etyaŋ itori nakwap a Ijipit, eruwor iŋes ŋina emam ibore eyakaun ŋikaru ŋatomoniomwon.

¹²Eturuwori ayoŋ akwap a Ijipit ŋina asilon, apei anakwapin a ŋuna asilok, esilunete ŋitaunio keŋ ŋikaru ŋatomoniomwon, ikwaanikin ikes ka ŋitaunio ŋulu aruwor ŋireŋoroto. Eelari ayoŋ Ŋijipitian nakwapin ewuanak nakiboisyo ŋuna egelegelya.

¹³“Ŋace ŋuna irworo Ekapolon Akuj ikes nu ebe, ‘Ani elunyarosi ŋikaru ŋul ŋatomoniomwon, acununi ayoŋ Ŋijipitian alotuŋa a ŋakwapin a ŋulu aponi kielakinae ikes.

¹⁴Enyakuni ayoŋ ikes aneni aponi torikoroe, enyaka nakwap kec Pasiros, nakwap atapapaa kec, ido eruwor ikes a nen apukan ŋina epalag.

¹⁵Eruwor ikes apukan ŋina epalag akilo ŋunace mam nabo nyitopoloor iŋes bon anakwapin a ŋunace. Eturuwori ayoŋ ikes ŋulu epalag ŋulu nyepedorete nabo jik akipuka ŋakwapin ŋunace.

¹⁶Nyeruwor nabo jik Ŋijipitian ŋituŋa ŋulu epedorete Ŋisirael akikinyom, nai eruwor ibore ŋini itatamununui Ŋisirael asecit apaki ŋina elosyoto ikes akiŋarakino neni a Ŋijipitian. Apaki nai ŋin eyenuniata Ŋijipitian atemar arae ayoŋ Ekapolon.’ ”

¹⁷Alokaru a ŋolo a ŋatomoniarei ka ŋikanikaarei, elap ŋolo ke epei, ŋirwa ke elap epei, abu Ekapolon kirwor neni kaŋ tema,

¹⁸“Lokoku a ituŋanan, abu erwosit Nebukadinesar ŋolo a Babilon ya ŋasigarya keŋ akirem Tiro aŋuna acamitor nooi akikamar; abu iŋes kisiwok ka kitoryoŋ ŋasigarya keŋ daadaŋ ŋiboro ŋulu apotyok, tolemar ŋitim anakyes kec ka tobuluciar ŋiseketa. Nai mam ibore apotu iŋes ka ŋasigarya keŋ toryamut anakimanit ka anacamit nooi akikamar Tiro.

¹⁹Aŋun, alimu Ekapolon Akuj ŋakiro nu ebe, ‘Alosi ayoŋ akipotokin Ijipit neni a Nebukadinesar a erwosit a Babilon, ikotere ya ebari a Ijipit, tolema ka toŋata ŋiboro a Ijipit toruwor eropit ŋolo a ŋasigarya keŋ.

²⁰Adau ayoŋ ainakin Nebukadinesar akwap a Ijipit toruwor eropit ŋolo etiyaa iŋes, anerae abu iŋes ka ŋasigarya keŋ kitiyata aŋuna kaŋ.’

²¹“Akoloŋit ŋin, eturuwori ayoŋ Ŋisirael ŋulu egogoŋ, ido akacamakini iyoŋ Esekiel kirwor ŋakiro aneni epedoryata ŋituŋa daadaŋ akiirar iyoŋ, ikotere ikes eyenunete atemar arae ayoŋ Ekapolon.”