Read ngakarimojong Esek. 3 Bible Online

Esek. 3 - ngakarimojong bible

Esek. 3

¹Tema ŋini erworo neni kaŋ, “Okoe lokoku a ituŋanan, tonyam ibore ŋini ikiinakinitae iyoŋ; tonyam ekitaabo lo, ido tolot kisirwor Ŋisirael.

²Abu nai ayoŋ oŋaam, okoinak iŋes ayoŋ ekitaabo onyam.”

³Tema iŋes neni kaŋ, “Lokoku a ituŋanan, tonyam ekitaabo lo ŋolo akainakinit ayoŋ iyoŋ kisimwon akook kon.” Aŋun, abu ayoŋ onyam ekitaabo, oryamu ayoŋ ebob nooi anakituk kaŋ ikoni ao.

⁴Tema ŋini erworo neni kaŋ, “Lokoku a ituŋanan ape tokona neni a Ŋisirael kirwor ŋakiro kaŋ pei neni kec.

⁵Nyekeyakiyarit ayoŋ iyoŋ lotuŋa ŋulu nyileerete aneni kon ŋakiro ŋuna irworosi ikes ka ŋulu etyono a ŋajep kec, nai neni a Ŋisirael.

⁶Nyekeyakiyarit ayoŋ iyoŋ nakwapin ŋuna alalak ŋuna nyileerete aneni kon ŋakiro ŋuna irworosi ikes ka ŋulu etyono a ŋajep kec. Ani kire kekeyakiya ayoŋ iyoŋ neni kec, epupokinete ikes ŋakiro ŋuna irworo iyoŋ.

⁷Nai emam Ŋisirael ŋini ecamuni apupokin ŋakiro ŋuna irwori iyoŋ, anerae nyecamito daadaŋ akiirar ŋuna erworo ayoŋ aŋuna etogogoŋioto ŋakyes kec ka aruworotor ŋasyanisya alotai kec.

⁸Kiira, ilaerekini iyoŋ ŋakiro kec lopite ŋolo elaerekioto ikes anakiro aŋuna irworo iyoŋ.

⁹Eketuruwori ayoŋ iyoŋ ŋolo igogoŋ ikwa amoru ka ŋolo nyiryaŋiryaŋa ikwa ataaba. Nyikuryaniar aŋuna a ŋituŋa a ŋul, kori nyikitubulo ikes iyoŋ iŋolikini, tari daŋ kerae ikes ekal ŋolo aŋeron.”

¹⁰Tema ŋini erworo neni kaŋ, “Lokoku a ituŋanan, topupok mono iyoŋ icoikinit nooi ka kiwuak lotau kon ŋakiro daadaŋ ŋuna erwori ayoŋ neni kon.

¹¹Ape tokona neni a ŋituŋa a akwap kon a ŋulu erikoritae nakwapin ŋace, ido kirwor neni a ŋituŋa kon, tema neni kec, ‘Ŋakiro ŋuna irworo Ekapolon Akuj ikes nu,’ ebe, ‘Kecamito ikes akiirar ŋakiro ŋuna irworo iyoŋ, kori pa kecamito.’ ”

¹²Abu nai Etau ŋolo ka Akuj ekekyaa ayoŋ kidiama, eiira ayoŋ alokaku kaŋ eruye ŋolo acela nooi ŋolo alosi atipei ebala, “Kipuroe apolou ŋina ke Ekapolon alokidiama anakuj!”

¹³Arae eruye ŋol ŋolo aŋiŋatar ŋabebenuk a ŋisubuna a ŋulu ayarete ka ŋolo a ŋiboorei a ŋulu ekwaan ka ŋakejen a agaari a ŋulu aya diyete ŋisubuna.

¹⁴Abu nai Etau ŋolo ka Akuj ekekyaa ayoŋ kidiama okoya a nen, abu ayoŋ onyunyur ka abu etau kaŋ toŋo aŋuna eketiŋakinitor Ekapolon ayoŋ ŋuna acamit iŋes.

¹⁵Abu ayoŋ odol neni a ŋirikon a ŋulu ayakasi Tel-Abib diyete aŋolol Kebar. Abu ayoŋ eboiyoto ka ikes a nen ŋirwa ŋikanikaarei ekeilorito ŋakiro etau ŋuna abu eŋolik.

¹⁶Ani edaun ŋirwa ŋikanikaarei, abu Ekapolon kirwor neni kaŋ tema,

¹⁷“Lokoku a ituŋanan, eketuruwo ayoŋ iyoŋ ekeyokon Ŋisirael, apaki daadaŋ ŋina iirarya iyoŋ ŋakiro aneni kaŋ, emaikina iyoŋ tolimok ikes ŋuna abala ayoŋ tocoikisi.

¹⁸Ani kalimok ayoŋ ŋulu aronok ebe, ‘Itwakete iyes kire jik, ido towou iyoŋ alimokin ikes acoikin aronis kec, kori towou iyoŋ akirwor ŋakiro ŋuna iteesikinete ikes aronis kec ikotere eiunete akiyar kec, etwakete kire jik ŋikaronok ŋul aŋuna ka asecit kec, ido emarakini ayoŋ atwanare kec erae nakou kon.

¹⁹Nai ani kilimok iyoŋ ŋituŋa ŋulu aronok aesikin aronis kec, ido toŋero aesikin aronis kec, kori kitiyata ŋuna aronok, etwakete ŋituŋa ŋul aŋuna ka asecit kec; nai iuni iyoŋ akiyar kon.

²⁰Ŋace nu, ani keesikis ŋituŋa ŋulu iyookino akiyookino kec, ido kitiyata ŋuna aronok, ido ewuak ayoŋ ibore ŋini itukuruwori ikes akitiya ŋuna aronok, etwakete ŋituŋa ŋul, anerae nyelimokina iyoŋ ikes aesikin akitiya ŋuna aronok, etwakete ikes aŋuna ka asecit kec, nyetamunio nabo jik ŋuna ka akiyookino a ŋina sek etiyato ikes, nai emarakini ayoŋ atwanare kec nakou kon.

²¹Nai ani kilimok iyoŋ ŋulu iyookino akiŋer asecit, ido toŋero ikes asecit, eyarete kire jik ikes, anerae apotu kiirasi ŋuna ibala iyoŋ tocoikisi; iŋes atemar iuni iyoŋ akiyar kon.’ ”

²²Abu apedor ŋina ke Ekapolon bu neni kaŋ aneni akatyakaritae, tema Ekapolon neni kaŋ, “Tonyou, ape totiyaar nakadipaalat, ido ekesirworik ayoŋ iyoŋ a nen.”

²³Abu nai ayoŋ onyou a nen, otiyaar nakadipaalat, abu akica ŋina ke Ekapolon toyakaun nakadipaalat, ekwaan akica ŋin ka ŋina sek eŋolikinit ayoŋ anaŋolol Kebar. Abu ayoŋ oper obuburiyar.

²⁴Bu nai etau ŋolo ka Akuj tooma kaŋ, eketonyou ayoŋ, tema neni kaŋ, “Ape togolokin kai kon.

²⁵Ikienio iyoŋ lokoku a ituŋanan a ŋaunoi, nyipedo iyoŋ alosit neni eya ŋituŋa ŋuluce.

²⁶Emiidikini ayoŋ aŋajep kon nakituk kon alokidiama, ikotere iyoŋ ililiŋi todaun alimokinet ikes acoikin ŋuna aronok ŋuna itiyaete, anerae erae ikes ekal ŋolo aŋeron.

²⁷Nai ani ekesirworikini ayoŋ iyoŋ, alacakini ayoŋ aŋajep kon, ikotere iyoŋ tolimok ikes atemar ŋakiro ŋuna irworo Ekapolon Akuj ikes nu ebe, ‘Kimyekisi ŋulu iirarete kiirasi ka kimyekisi ŋulu eŋerete akiirar toŋero akiirar, anerae erae ikes ekal ŋolo aŋeron.’ ”