Read ngakarimojong Esek. 35 Bible Online

Esek. 35 - ngakarimojong bible

Esek. 35

¹Abu Ekapolon kirwor neni kaŋ tema,

²“Lokoku a ituŋanan, kiŋoliya lowae ŋolo a emoru Seir imanit iŋes, ido todwar itoroniyarit iŋes

³tolimok atemar, alimu Ekapolon Akuj ŋakiro nu ebe, ‘Ekemanit ayoŋ iyoŋ, iyoŋ emoru Seir, eopeuni ayoŋ akan kaŋ neni kon ekemanit, eketuruwo iyoŋ akwap ŋina asilon ka akoŋinait.

⁴Eturuwori ayoŋ ŋitaunio kon ŋulu emunaaritae; iruwor iyoŋ akwap ŋina asilon, ido iyenuni iyoŋ atemar arae ayoŋ Ekapolon.’

⁵Aŋuna ibunio iyoŋ toruwor emoit ŋolo ibu tonipo Ŋisirael a ŋinapaki, kielak ikes lokileŋ toarae apaki ŋina aponiata ŋican kec toroketa nooi adepar neni sek;

⁶aŋun, ikwapei kire ayarya ayoŋ, epotori ayoŋ ŋituŋa kon toarae, erubakinio earyo ŋituŋa kon ka aŋuna pa ibunio iyoŋ toŋer akiar ŋuluce, erubakinio earyo ŋituŋa kon.

⁷Eturuwori ayoŋ akwap ŋina a emoru a Seir ŋina asilon ŋina erae akoŋinait, aari ayoŋ alo Seir ŋituŋa daadaŋ ŋulu epote nen, kori ŋulu itorete nen.

⁸Etubutari ayoŋ ŋawat a ŋikatwak ŋikamukumukui a akwap a Seir, imasakinosi ŋulu earyo kidiama ŋikamukumukui a akwap a ŋin, tooma ŋakadipaalae a akwap a ŋin ka nayona daadaŋ ŋuna aŋakipi anakwap a ŋin.

⁹Eketuruwori ayoŋ iyoŋ neni asilon ŋikaru ka ŋikaru, mam nabo jik nyiboikinosi ŋituŋa lotaunio kon. Ŋun nai iyenuniata iyes atemar arae ayoŋ Ekapolon.

¹⁰“Ilimut iyes atemar Yudaya ka Isirael ta ŋakiboisyo kec erae ŋuna kus ka ituruworete ikes ŋuna kus tari daŋ karae ayoŋ Ekapolon arae Akuj kec;

¹¹aŋun, alimuni ayoŋ Ekapolon atemar, ikwapei kire jik ayarya ayoŋ, ekesicani ayoŋ iyes alopite a ŋolo aŋoitor ayoŋ ka alopite a ŋolo iponiata iyes kitoodiut arakao ŋina iponiata toremokinos ŋituŋa kaŋ. Akayenunete ayoŋ ŋituŋa kaŋ apaki ŋina ekesicania ayoŋ iyes.

¹²Iyenunete iyes atemar adau ayoŋ Ekapolon akiirar ŋakiro daadaŋ ŋuna iyanyata iyes imanito ŋikamukumukui a Isirael irworosi ibasi, ‘Aruwor ikes ŋulu asilok, ikiinakin iwon amunyar ŋituŋa kec atipei.’

¹³Idaut iyes erwor iturosi nooi ikimanito ayoŋ, iyatakis iyes ŋakiro kus ŋuna ikimanitotor ayoŋ, adau ayoŋ akiirar ŋun.

¹⁴Alimu Ekapolon Akuj atemar, eketuruwori ayoŋ iyoŋ neni asilon, ikotere ŋituŋa a akwap a daadaŋ elelyanete aŋuna iruworor iyoŋ akoŋinait,

¹⁵lopite ŋolopei ibunio iyoŋ tolelyan aŋuna abunio akwap a Ŋisirael toruwor akoŋinait, aŋun, etiyakini ayoŋ neni kon ŋuna ikitisilunete iyoŋ. Iruwor iyoŋ ekoŋinait, iyoŋ emoru Seir ka akwap a Edom daadaŋ. Eyenunete nai ŋituŋa daadaŋ atemar arae ayoŋ Ekapolon.”