Read ngakarimojong Esek. 37 Bible Online

Esek. 37 - ngakarimojong bible

Esek. 37

¹Abu apedor ŋina ke Ekapolon bu neni kaŋ, abu etau a Ekapolon okoya ayoŋ ekewuak kidiŋ akadipaalat; eleleba ŋakoyo nakadipaalat ŋin.

²Abu etau a Ekapolon ekesirimo ayoŋ nen daadaŋ, alalak nooi ŋakoyo ŋuna aperete anakadipaalat a ŋin ka aokito deu.

³Ekeŋit etau a Ekapolon ayoŋ tema, “Lokoku a ituŋanan, epedorete mono ŋakoyo nu ayarun a?” Abu ayoŋ oboŋok otema, “Okoe Ekapolon Akuj, iyoŋ iyeni.”

⁴Tema nai iŋes neni kaŋ, “Todwar aŋuna a ŋakoyo anu, tolimok ikes atemar, okoe iyes ŋakoyo ŋuna aonok deu nu, kiirasi ŋakiro a Ekapolon.

⁵Alimu Ekapolon Akuj ŋakiro aŋuna a ŋakoyo a nu atemar, emyekini ayoŋ ekieŋanu toloma neni kus, ido toyarut iyes.

⁶Ewuanakini ayoŋ ŋamori neni kus ka emyekini ayoŋ akiriŋ itarapuwa iyes, tosodi nai okarapuwa ayoŋ iyes a amuny a ŋina ka akuwan; ewuakini ayoŋ ekieŋanu neni kus toruwor iyes ŋulu iyarete, ido iyenunete iyes atemar arae ayoŋ Ekapolon.”

⁷Aŋun, abu ayoŋ odwar lopite ŋolo ekicikitere; ani eriŋa ayoŋ adwari, bu eruye atipei ŋolo abala bo-bo-bo, tocunakinos ŋakoyo iwapei tocunakinos ŋakoyo a ŋinituŋanan a kec.

⁸Abu ayoŋ eŋolik ŋakoyo ŋun, oanyuwa ŋamori kepena nakoyo ka kemin akiriŋ ka kerapakin amuny ŋina ka akuwan; nai amam ekieŋanu ayakatar.

⁹Abu nai Ekapolon okolimok ayoŋ tema, “Lokoku a ituŋanan, todwar aŋuna eakieŋanu, tolimok ekieŋanu atemar ikilimok iyoŋ Ekapolon Akuj abunore alotooma ŋolowae daadaŋ, toloma nakoyo ŋunaatwak nu, ikotere kituruwo ikes nabo ŋuna eyarete.”

¹⁰Abu ayoŋ odwar lopite ŋolo ekecikitor ayoŋ Ekapolon ido abu ekieŋanu toloma nakoyo, toyarut, towua a ŋakejen erae ŋituŋa ŋulu alalak nooi.

¹¹Tema nai Ekapolon neni kaŋ, “Lokoku a ituŋanan, isikwaanitae ŋakoyo nu ka Ŋisirael daadaŋ. Ebasi Ŋisirael, ‘Aoko ŋakoyo kosi deu ka adaun akigeno aneni kosi, nyeriŋa ikimisitae isua.’

¹²Aŋun, todwar, tolimok ikes atemar, alimu Ekapolon Akuj ŋakiro nu ebe, ‘Okoe ŋituŋa kaŋ! Alosi ayoŋ aŋaar ŋalyalin kus, ekepudu iyes analyalin kus, okoyau iyes nakwap a Isirael nabo.

¹³Iyenunete nai iyes ŋituŋa kaŋ atemar arae ayoŋ Ekapolon apaki ŋina aŋaarya ayoŋ ŋalyalin kus, ekepudu iyes analyalin kus.

¹⁴Ewuakini ayoŋ etau kaŋ neni kus ka iyarunete iyes. Ekesiboikini ayoŋ iyes nakwap kus ka iyenunete nai iyes atemar ayoŋ Ekapolon adau alimun ŋun, ido etiyakini ŋun.’ ”

¹⁵Abu Ekapolon kirwor neni kaŋ tema,

¹⁶“Lokoku a ituŋanan, tolemu ebela kigir ŋakiro nu lobela, ‘Erae ŋolo a Yuda ka ecamuna Isirael daŋ ka iŋes;’ Tolemu nabo ebela ece kigir ŋakiro nu lobela ŋol, ‘Erae ŋolo a Yosepu (ebela a Epuraim) ka ecamuna Ŋisirael daadaŋ ka iŋes.’

¹⁷Kimorik ŋibelae ŋul ŋiarei toruwor epei anakan kon.

¹⁸Ani ikiŋisete iyoŋ ŋituŋa kon ebe, ‘Nyikilimokini iyoŋ isua apolou a ŋakiro a ŋuna itiyae iyoŋ aŋun a?’

¹⁹Tolimok ikes atemar, alimu Ekapolon Akuj ŋakiro nu ebe, ‘Eapi ayoŋ alemar ebela a Yosepu (ŋolo eyai nakan a Epuraim) ka ŋikabilae a Ŋisirael ŋulu ecamuna ka iŋes, ido emorik ebala ŋol ka ŋolo a Yuda eturuwo ikes ebela epei, ikotere ikes eruwor anakan kaŋ ebela epei.’

²⁰Totiŋ anakan kon alokiŋaren kec ŋibelae ŋulu idau iyoŋ akigir ŋakiro ŋul,

²¹ido tolimok ŋituŋa atemar, alimu Ekapolon Akuj ŋakiro nu ebe, ‘Enyakuni ayoŋ Ŋisirael anakwapin aŋuna apotu ikes toloto, acununi ayoŋ ikes anakiboisyo a daadaŋ aŋuna apotu ikes toloto, enyaku ikes nakwap kec.

²²Eturuwori ayoŋ ikes apukan apei anakwap alokidiama ŋikamukumukui ŋulu a Isirael. Ipukae ikes daadaŋ erwosit epei bon, mam nabo nyetyakasi ikes toruwor ŋakwapin ŋaarei, kori ŋapukasinei ŋaarei.

²³Nyemunaarete nabo ikes ŋawat kec a ŋakujo kec ka anamuja aŋuna nyenyamio, kori anasecit kec ka adio. Aiuni ayoŋ ikes anasecit a daadaŋ a ŋina emyekiniata ikes akitiya ŋuna alimokinitae, etaleuni ayoŋ ikes. Eruwor nai ikes ŋituŋa kaŋ ka aruwor ayoŋ Akuj kec.

²⁴“‘Eketiyan kaŋ Daudi iŋes eruwor erwosit kec, iyoki ikes ekeyokon epei bon. Iwuapete ikes ŋikisila kaŋ ka iwuapete ŋuna atubunit ayoŋ ecoikinito nooi.

²⁵Iboiyete ikes anakwap a ŋina abu ayoŋ oinak Yakob eketiyan kaŋ, anakwap a ŋina apotu atapapaa kec kiboiyoto. Iboiyete ikes a nen ka ŋidwe kec ta ŋipapae kec ŋikaru ka ŋikaru. Daudi eketiyan kaŋ iŋes eruwor ekepukan kec ŋikaru ka ŋikaru.

²⁶Ewuakini ayoŋ acamunet kaŋ ka ikes ŋina a ekisil, eruwor acamunet kaŋ ŋin ka ikes ŋina a ŋikaru ka ŋikaru, eterereŋi ayoŋ ikes ka etipituni, ido ewuakini ayoŋ akibois kaŋ ŋina asegan neni kec ŋikaru ka ŋikaru.

²⁷“‘Eyakaun akibois kaŋ ŋina eboiyo ayoŋ neni eyakasi ikes, aruwor ayoŋ Akuj kec ka eruwor ikes ŋituŋa kaŋ.

²⁸Eyenunete nai ŋituŋa a ŋakwapin atemar ayoŋ Ekapolon etaleu Ŋisirael, eyenunete ikes ŋun apaki ŋina ewuakinia ayoŋ akibois kaŋ ŋina asegan neni a Ŋisirael ŋikaru ka ŋikaru.’ ”