Read ngakarimojong Esek. 4 Bible Online

Esek. 4 - ngakarimojong bible

Esek. 4

¹Tema Akuj neni kaŋ, “Lokoku a Ituŋanan, tolemu amatapal, kiwuak kiŋaren kon toramak kidiama keŋ etorube ŋolo ke etaun a Yerusalem.

²Kisitiya ŋitorubei lu akitoodiunia akirikauno a Yerusalem: Kiwuak ibore ŋini irikaunit amatapal ŋin, kiwuak akititis ŋina edokarit narwatata ke etaun, totukono ŋiboorei ŋulu esibit ŋituŋa ŋulu eurumikinito etaun ŋol ka kiwuanak nawaetin a etaun a ŋol daadaŋ ŋiboorei ŋulubwaŋabwaŋaet arwatata keŋ.

³Tolemu asaani ŋina erae asuwat kiwuak kidiŋ kon ke etaun erae arwatata ŋina eyai kidiŋ iyoŋ ke etaun. Emaikina iyoŋ kiŋoliya lotaun, kiŋolik iŋes erae ŋolo irikaunitae, torae iyoŋ pei irikaunit iŋes. Erae ŋol epite ŋolo itoodikinitere Ŋisirael ŋakiro ŋuna itiyakin.

⁴“Ani irikakini ŋun, toper alosyep kon a ŋolo alokedyeny, kidaŋidaŋ akisicanio a Ŋisirael toruwor akisicanio ŋina kon ŋirwa daadaŋ ŋulu iperyo iyoŋ a nen.

⁵Adau ayoŋ akimarakin iyoŋ ŋirwa ŋulu iperyo alokedyeny kon, eriyan ŋirwa ŋul ka ŋikaru ŋulu isicanere Ŋisirael. Aŋun, idaŋidaŋi iyoŋ ŋuna isicanere Ŋisirael ŋirwa ŋamiae ŋauni ka ŋatomonikanikaomwon.

⁶Kidau iyoŋ akidaŋidaŋ ŋun todaun ŋirwa ŋul, emaikina iyoŋ toper nabo alosyep kon a ŋolo aloteten, kidaŋidaŋ akisicanio a ŋituŋa a Yudaya. Adau ayoŋ akimarakin iyoŋ ŋirwa ŋatomoniomwon ŋulu iperyo iyoŋ aloteten kon, a ŋolokaru akoloŋit apei bon.

⁷Emaikina iyoŋ iŋoliyarit lowae ŋolo irikaunitere Yerusalem, ido todwar itoroniyarit Yerusalem, nyiyakar ibore idio nakan irworo iniŋiniŋi akan kon.

⁸Akaroci ayoŋ iyoŋ a ŋaunoi, ikotere iyoŋ nyiboboŋiyo lowae ece akitodol ŋina edaunotor ŋirwa ŋulu ka akirikauno.

⁹“Tolemu tokona ŋaganoi, ŋikinyom ŋulu ikwaan ke erau, emaroge, ŋicok ŋulu ikulao, ŋakima ka ŋikinyom ŋulu ikwaan ka ŋaganoi ŋulu enyaritae ŋikusemae. Kinyalak ŋul daadaŋ kiturak namot ŋina iŋadao akimuj, ikotere kipou ŋamugati aŋuna kon. Emaikina iyoŋ kimuji ŋamugati ŋun ŋirwa ŋamiae ŋauni ka ŋatomonikanikaomwon ŋulu iperyo alokedyeny kon.

¹⁰Kipimu akimuj ŋina inyami iyoŋ a ŋinakoloŋit apaki ŋina itemokinitoe. Emaikina apotis a akimuj a ŋin eriyan ka ŋina a ŋicekelya a ŋatomoniarei.

¹¹Kipimu daŋ ŋakipi ŋuna imasi iyoŋ apaki ŋina itemokinitoe, emaikina ŋakipi ŋun erae ŋuna eapiyarito elita epei.

¹²Kinokak akim a ŋacin a ŋuna ewokito kipounio alokiŋaren ŋituŋa ŋamugati anakirya a ŋikinyom a ŋulu ikwaan ke erau, ido tonyam ŋamugati ŋun.”

¹³Tema Ekapolon, “Itoodiunete ŋun atemar enyamete Ŋisirael anakwapin a ŋace ŋamuja ŋuna nyecamakinit ekisil ikes akinyam. Etakanunete ŋun apaki ŋina eelarya ayoŋ ikes nakwapin ŋunagelae.”

¹⁴Abu nai ayoŋ otema, “Meere ikoŋina Ekapolon Akuj! Nyemunaara ayoŋ ŋinapei akuwan kaŋ. Ŋinapei anasoroko kaŋ akitodol tokona, nyenyama ayoŋ ibore ŋini etwani bon, kori ŋini earito ŋityaŋ ŋulu ka ariet. Nyiwuakina ayoŋ nakituk kaŋ akiriŋ ŋina eketaleo.”

¹⁵Aŋun, abu Ekapolon tema, “Ejok nooi, ekemyekini ayoŋ iyoŋ kirirau ŋaor kinokak, kipounio ŋamugati, akilo akiriraun ŋacin.”

¹⁶Torubak iŋes irworo ebala, “Lokoku a ituŋanan etoŋopiyari ayoŋ akimuj alo Yerusalem. Enyamete ŋituŋa a nen akimuj ipimanakinio kiitanito ace, emasete ŋakipi ŋuna ipimanakinio tokadakinite,

¹⁷anerae icanakinosi ikes akimuj ka ŋakipi. Iŋolyanakinosi ikes make ekadakinit, ido edaunosi ikes aŋuna a ŋasecisya kec.”