Read ngakarimojong Esek. 41 Bible Online

Esek. 41 - ngakarimojong bible

Esek. 41

¹Abu nai ekile ŋol okoya ayoŋ nagule ŋina a ŋaarei elomaryo Kai ka Akuj, abu iŋes kipim ŋipirin a agule a ŋin, toryamu erae aoyau kec alowaetin a agule a daadaŋ ŋimitae ŋiuni.

²Arae alolomu a epuke a agule a ŋin ŋimitae ŋikan ka arae abutur a ŋarwatatain a ŋuna aya nawaetin a epuke a ŋol ŋimitae ŋiarei ka atutubet a ŋolowae a epuke. Abu daŋ ekile ŋol kipim agule ŋin, toryamu aoyau alosepyon erae ŋimitae ŋatomoniarei ka erae anakou ka neni iteotor ŋimitae ŋitomon.

³Abu ekile ŋol torotok a nen tolot nagule ŋina alotooma jik, kipim ŋipirin a epuke a agule a ŋin, toryamu aoyau erae emita; toryamu alolomu a epuke a agule a ŋin erae ŋimitae ŋiuni torae abutur a ŋarwatatain a ŋuna aya nawaetin epuke ŋol ŋimitae ŋiuni ka atutubet.

⁴Abu iŋes kipim aoyau a agule a ŋin alosepyon, toryamu eriyan ŋiwaetin daadaŋ erae ŋimitae ŋitomon. Ayai agule ŋin yaye ŋina alokidiŋ ameun alopuke. Tema nai ekile ŋol neni kaŋ, “Erae Akibois na ŋina Asegan Nooi.”

⁵Abu nai ekile ŋol kipim arwatata ŋina ka Akai ka Akuj, toryamu abutur erae ŋimitae ŋiuni ka abu toryamu alolomu a ŋagulei a ŋuna arekina narwatata a Akai ka Akuj erae ŋimitae ŋiarei.

⁶Adukitoe ŋagulei ŋun idokitoe ameun alokwap tari kidiama; a ŋunagulei ŋatomoniuni ameun alokwap tari kidiama. Ayakasi narwatatain ŋun daadaŋ ŋiboorei ŋulu ekamanakinitere ŋarwatatain ŋuna aŋagulei togogoŋ, ikotere nyegwaŋar narwatata ŋina ka Akai ka Akuj.

⁷Ani iŋolikini ŋarwatatain ŋuna ka Akai ka Akuj, atakanete esibito eriyan abutur kec ameun alokwap tari kidiama. Agwaŋakinitae kiŋa arwatata a Akai ka Akuj ŋagulei ŋuna ayakasi ŋirotin ŋiarei ŋulu etoreneneo elosyo kidiama. Aŋun, apedoryo alosit anagule a ŋina alokwap tari ŋina alokidiŋ ka ŋuna alokidiama.

⁸Abu daŋ ayoŋ eŋolik atemar ayai Kai ka Akuj neni amukur diyete ŋarwatatain; arae aoyau aneni esyakinitere adukunio ŋarwatatain aŋagulei a ŋuna ayakasi nen ŋimitae ŋiuni.

⁹Arae abutur a ŋarwatatain a ŋuna alokiŋa, aŋuna a ŋagulei a ŋuna ayakasi narwatata a Akai ka Akuj ŋimitae ŋiuni. Ayai neni alapat kidiŋ ŋagulei ŋuna anawae Akai ka Akuj

¹⁰ka ŋagulei ŋuna a ŋisacaradotin; arae alolomu a nen ŋimitae ŋitomon, erimokinit ilapatu ŋin Akai ka Akuj daadaŋ.

¹¹Aŋaara ŋipukei a ŋagulei a ŋuna ayakasi nawaetin arwatata nilapatu ŋin. A ŋinagule ayai epuke epei lowae ŋolo alo Kuju, ŋoloce lowae ŋolo alo Kwap, arae alolomu a ilapatu a ŋin ŋimitae ŋiarei ka atutubet ameun alowae ke epei tari ŋoloce ka erimokinit ilapatu ŋin Akai ka Akuj daadaŋ.

¹²Alowae a ŋololapat alo Kuju Akai ka Akuj, ayai akai ŋina eteosi ka Akai ka Akuj, arae aoyau a akai a ŋin alosepyon ŋimitae ŋatomoniomwon ka ŋikan, torae alokiŋaren ka neni iteor ŋimitae ŋatomoniuni ka ŋikan. Arae abutur a ŋarwatatain keŋ alowaetin a daadaŋ ŋimitae ŋiarei ka atutubet.

¹³Abu ekile ŋol kipim Akai ka Akuj, toryamu aoyau alosepyon erae ŋimitae ŋatomonikan. Abu daŋ kipim ameun alokaku Akai ka Akuj kitor nenilapat alo Kai ka Akuj tomyaa To nakisalet aduketait, toryamu neni daŋ erae ŋimitae ŋatomonikan.

¹⁴Ameun alokiŋaren Akai ka Akuj, kitor nenilapat alo Kai ka Akuj, tomyaa lowae ŋoloce, arae neni daŋ ŋimitae ŋatomonikan.

¹⁵Abu daŋ ekile ŋol kipim aoyau a Akai a ŋina ayai To Akai ka Akuj, kipim kaapei ka neni etoreeneneo anawaetin a akai a ŋin, toryamu erae neni daŋ ŋimitae ŋatomonikan. Akisyakin alopuke a ŋolo elomarere nagule ŋina esyaunan alo Kai ka Akuj, tomyaa nagule ŋina Asegan (iŋes ŋina alokidiŋ) ka nagule ŋina Asegan nooi,

¹⁶apesitae nen daadaŋ ŋakito ŋuna adolito tari lodirisae a ŋagulei a ŋun. Emuleleiyaritae ŋidirisae a ŋagulei a ŋun.

¹⁷Emuleleiyaritae ŋarwatatain a Akai ka Akuj alotooma ameun alokwap tari kidiama ŋipukei,

¹⁸arae ŋitorubei a ŋiŋolya ka ŋulu a ŋisubuna a ŋulu a ŋabebenuk a ŋulu ecietae ikes emuleleiyaritere nen. Eyopoyopotoe ŋitorubei ŋul iwuanakinitae nen daadaŋ; ŋolo ke ekiŋol, min ŋolo a esubuna a ŋolo a ŋabebenuk. Ayakar ŋolotorube a esubuna a ŋolo a ŋabebenuk ŋireetin ŋiarei.

¹⁹Epei ŋolo a ituŋanan iŋoliyarit lowae ŋolo a ekiŋol a ŋolo ayai lowae epei ka ŋoloce ŋolo a eŋatuny iŋoliyarit lowae ŋolo a ekiŋol a ŋolo alowae a ŋoloce. Ecianakinitae ŋitorubei ŋul narwatatain daadaŋ ŋuna ka Akai ka Akuj kiryam cib;

²⁰ameun alokwap tari kidiama epuke iwadio anarwatata a Akai ka Akuj, ecianakinitae ŋitorubei a ŋisubuna a ŋulu a ŋabebenuk ka ŋulu a ŋiŋolya.

²¹Eriyan ŋiwaetin daadaŋ ŋulu a agolyet a epuke a ŋolo a akibois a ŋina Asegan. Ayai kiŋaren akibois ŋina Asegan nooi daŋ ibore ŋini ekwaan ka

²²namuroet ŋina itiyaunitae a ŋakito. Arae aoyau keŋ emita ka atutubet ka kiŋaren ta neni iteotor, arae ŋakito etiyaunitere ŋawaeta keŋ alokoonae ka neni awuar iŋes ta nawaetin keŋ daadaŋ. Abu ekile ŋol tema neni kaŋ, “Erae lo emesa ŋolo ewoi alokiŋaren Ekapolon.”

²³Ayakasi ŋagolyeta ŋaarei lopuke ŋolo a agule a ŋina esyaunan elomaryo Kai ka Akuj ka lopuke ŋolo a akibois a ŋina Asegan Nooi.

²⁴A ŋolopuke, ayai agolyet ŋina atubitoe alokidiŋ apei kidiama ka apei Kwap, kiwuakinitetei ŋinatubet narwatata a ŋipetae.

²⁵Ecianakinitae nagolyeta a ŋipukei a ŋul ŋitorubei a ŋisubuna a ŋulu a ŋabebenuk ka ŋulu a ŋiŋolya, ekwaan ŋitorubei ŋul ka ŋulu ayakasi narwatatain. Apesitae ŋakito kidiama arwatata ŋina ke epuke a ŋolo elomarere nagule ŋina esyaunan elomaryo Kai ka Akuj.

²⁶Ayakasi ŋidirisae narwatatain ŋuna anawae agule ŋin, esibusitae ŋarwatatain ŋun a ŋitorubei a ŋiŋolya.