Read ngakarimojong Esek. 44 Bible Online

Esek. 44 - ngakarimojong bible

Esek. 44

¹Abu ekile ŋol ekenyaka ayoŋ, okoya lopuke ŋolo alokiŋa akibois ŋina asegan, ŋolo eŋoliyarit lowae ŋolo alo Kide Akai ka Akuj, agolokino epuke ŋol.

²Abu Ekapolon tema neni kaŋ, “Emaikina epuke lo torubak egolokino, nyemaikina toŋaarae, mam ituŋanan ecamakinitae kitor nen. Emaikina iŋes torubak egolokino, anerae alomu alopuke a ŋol Ekapolon Akuj a Isirael.

³Ekepukan bon ŋolo eyai lokicoloŋ emaikina tolot kiboikin kidiŋ epuke ŋol kimuj alokiŋaren Ekapolon. Emaikina iŋes toloma nen ka tolomu a nen isitiyae epuke ŋolo ka agule a ŋina ke epuke a ŋologolol a ŋol.”

⁴Abu ekile ŋol okoya ayoŋ eketoryo lopuke ŋolo eŋoliyarit lowae ŋolo alo Kuju, okoya kiŋaren Akai ka Akuj. Ani aŋoleŋolekini ayoŋ a nen, eŋolik akica ŋina ke Ekapolon ileleba Kai a Ekapolon, abu ayoŋ oramakin kwap obuburiyar.

⁵Tema Ekapolon neni kaŋ, “Lokoku a ituŋanan, kiŋolik ejok ibore daadaŋ ŋini ite iyoŋ a ne ka topupok ejok ŋakiro daadaŋ ŋuna ipupi iyoŋ a ne. Alosi tokona ayoŋ alimokin iyoŋ ŋakiro daadaŋ ŋuna etubunitoe akitiya a ne alo Kai a Ekapolon ka ŋikisila daadaŋ ŋulu iwuapitae a ne alo Kai a Ekapolon. Emaikina iyoŋ toyeni ŋituŋa ŋulu ecamakinitae tolomasi Kai ka Akuj ka ŋulu nyecamakinitae tolomasi nakibois ŋina asegan.

⁶Tolimok Ŋisirael, ŋituŋa ŋulu erae ŋikaŋerok ŋul atemar, alimu Ekapolon Akuj ŋakiro nu ebe, ‘Okoe Ŋisirael! Tojoŋoto akitiya ŋakiro daadaŋ ŋuna ka asiilyo a ŋina itiyaete iyes.

⁷Ŋace ŋuna iatakis iyes nasiilyo kus ikes nu, iyaut iyes nakibois kaŋ ŋina asegan ŋituŋa ŋulugelaanotin ŋulu nyileŋeritae, ŋituŋa ŋulu nyekewuapito ayoŋ, elomete ŋituŋa ŋul akiyany Akai ka Akuj eriŋa iyes iyaunito neni kaŋ akimuj kaŋ, asepwae ka ŋaokot a ŋainakineta. Iŋero iyes acamunet kaŋ ka iyes anakitiya asiilyo kus ŋin daadaŋ.

⁸Akilo iyes akitiya ŋiticisyo kus ŋulu a ŋitalyo kaŋ alo Kai kaŋ, iwuakis iyes ŋituŋa ŋulugelaanotin apolokin Akai kaŋ.

⁹“‘Alimu ayoŋ Ekapolon Akuj atemar mam ituŋanan ŋinigelaanot ŋini nyileŋeritae, ŋini emaikina toloma nakibois kaŋ ŋina asegan, tari ituŋanan daadaŋ ŋinigelaanot ŋini iboiyete ka Ŋisirael, nyecamakinitae elomari nakibois kaŋ ŋina asegan.

¹⁰Nai esicani ŋilepi ŋulu apotu kaapei ka ŋituŋa kec Ŋisirael ekemyekis ayoŋ, kilipa neni a ŋakujo.

¹¹Eruwor ikes ŋiketiyak nakibois ŋina asegan alo Kai ka Akuj, ŋulu iyokiyete ŋipukei ŋulu ka Akai ka Akuj ka ŋulu itiyaete Kai ka Akuj; epedorete ikes akiar ŋibaren ŋulu eyaunitae nen erae ŋainakineta ŋuna epeyo ka ŋamuronisya a ŋuna a ŋituŋa. Emaikina ikes kitiyata etic aŋuna a ŋituŋa.

¹²Nai aŋuna aponiata ŋilepi kitiyata etic aŋuna a ŋituŋa alokiŋaren ŋakujo kec, torikosi Ŋisirael nasecit, aŋun adau ayoŋ Ekapolon Akuj akikoŋ ekyaarit akan kaŋ atemar emaikina ikes kisicanae aŋuna ka asecit kec.

¹³Nyemaikina ikes toapuut neni kaŋ, kitiyata etic kaŋ ikwapei ŋisacaradotin, kori kidunya ibore kaŋ idio ŋini italeunitoe, kori ŋainakineta ŋuna asegak nooi ŋuna eyaunitae neni kaŋ. Nai emaikina ikes kiruma ŋileec ŋulu ka asiilyo a ŋina adaut ikes akitiya.

¹⁴Ainakini ayoŋ ikes apolokin ŋiticisyo alo Kai ka Akuj ka akitiya ŋiticisyo daadaŋ ŋulu emaikina kitiyae alo Kai ka Akuj.’ ”

¹⁵“Nai ŋisacaradotin ŋulu alokabila a Lepi torae ŋiletok a Sadok, ŋulu apotu anakikinyomit ayoŋ kitiyata ŋiticisyo ŋulu ka akibois a ŋina asegan apaki ŋina a ŋeryoto Ŋisirael akiwuap ayoŋ, ikes emaikina toapuut neni kaŋ kitiyata etic kaŋ alokiŋaren kaŋ. Emaikina ikes towua alokiŋaren kaŋ, okoinakis ayoŋ ŋasepwa ka ŋaokot a ŋainakineta.

¹⁶Ikes bon emaikina tolomasi nakibois kaŋ ŋina asegan; ikes bon emaikina toapiyasi namuroet kaŋ akitiya etic a nen alokiŋaren kaŋ akisilip alo Kai ka Akuj.

¹⁷Ani elomarete ikes nalapatu ŋina alotooma Akai ka Akuj, emaikina ikes tonapa ŋilowi ŋulu amilimilak, nyemaikina ikes tonapa ŋilowi ŋulu itiyaunitae anajul a ŋamesekin apaki ŋina itiyaata etic alopukei a ŋulu ka alapatu a ŋina alotooma, kori apaki ŋina itiyaata etic alotooma Akai ka Akuj.

¹⁸Emaikina ikes tonapa anakyes ŋakopiyae ŋuna amilimilak ka anacirin ŋisiriwali ŋulu amilimilak ŋulu erapuwarit elou ŋoloce. Nyemaikina ikes tonapa ibore idio ŋini isinyiriri ikes.

¹⁹Ani elomarete ikes nalapatu ŋina alokiŋa Akai ka Akuj, nalapatu ŋina ayakaunun ŋituŋa ŋuluce, amaikina ikes tolacasi ŋilowi ŋulu sek etiyata alotooma, tolacakis nagulei ŋuna etaleunitoe, ido tonapa ŋilowi ŋice, ikotere ikes nyeya akitaleuno alolowi kec neni a ŋituŋa.

²⁰Nyemaikina ikes tobanya ŋitim kec, kori kimyekis ŋitim kec tooyata nooi, nai emaikina ikes totubete ŋitim kec.

²¹Mam esacaradoti emaikina tomat epiini apaki ŋina elomarya nalapatu ŋina alotooma Akai ka Akuj.

²²Nyemaikina ŋisacaradoti kiita aberu ŋina erae apuserut, kori ŋina aŋerosi ka ekile keŋ, nai emaikina ikes kiita aberu ŋina sek nyiryamakina ka ekile, ŋina erae ŋina alotuŋa a Isirael, kori apuserut ŋina sek arae lokile keŋ esacaradoti.

²³Emaikina ikes kitatama ŋituŋa kaŋ toyenut ibore ŋini eseg ka ŋini nyeseg ka emaikina ikes kitoodikis ŋituŋa kaŋ ibore ŋini nyecamakinitae akinyam, kori akitap ka ŋini ecamakinitae.

²⁴Ani keyakaun ebura edio, ŋisacaradotin ikes emaikina totubo ŋakiro a ebura a ŋol, emaikina ikes totubo ŋakiro iwuapito ŋuna adau ayoŋ atubun. Emaikina ikes kirica ŋikisila kaŋ ka ŋakiro ŋuna atubu ayoŋ kitiyata ikes anasuban a daadaŋ a ŋuna ainak ayoŋ ikes akitiyaenen. Emaikina ikes torubakis etamunito akituruworit akoloŋit kaŋ ŋina a Sabato ŋina asegan.

²⁵Nyemaikina ikes tomunaasi ŋawat kec analosit neni eyai ituŋanan ŋini etwanit, nai ani kerae ituŋanan ŋini etwanit iyenet a esacaradoti ikwapei papa, kori toto, lokoku, kori nakoku, lokaato, kori nakaato ŋina nyiitara, epedori esacaradoti amunaar akuwan keŋ.

²⁶Tosodi ekaku, italeunio iŋes, nai emaikina kiboi pa itiyae ŋirwa ŋikanikaarei.

²⁷Ani akoloŋit ŋina elosyo iŋes nakibois ŋina asegan analapatu a ŋina alotooma Akai ka Akuj anakibois a ŋina asegan, emaikina ya nen ainakinet keŋ aŋuna ka asecit.

²⁸“Alotooma ŋalup ŋuna akoranak ayoŋ Ŋisirael toruwor ŋuna kec, mam ŋuna emaikina toruwor ŋuna a ŋisacaradotin. Mam ibore emaikina toruwor ŋini a ŋisacaradotin, ayoŋ Ekapolon emaikina oruwor ŋolo a ŋisacaradotin.

²⁹Emaikina ikes tonyama ŋainakineta ŋuna eaunete ŋituŋa ikwapei ainakinet ŋina a ŋikinyom, ainakinet aŋuna ka asecit, ainakinet aŋuna ka akiilit anasecit ka ibore daadaŋ alo Isirael ŋini italeunitoe, eruwor ŋini a ŋisacaradotin.

³⁰Ŋaraito daadaŋ ŋuna ajokak ŋuna esyaunak ka ŋainakineta daadaŋ ŋuna a ŋolokabila eyaunete Ŋisirael, eruwor ŋuna a ŋisacaradotin. Emaikina daŋ iyes inakis ŋisacaradotin ŋamugati kus ŋuna isyaunete akokore ipoo, ikotere torubak arereŋu eyai lokalya kus.

³¹Emaikina ŋisacaradotin nyenyam ibore idio kerae ikeny, kori ibarasit, kori etyaŋ, ibore ca daadaŋ ŋini ketwani bon, kori ŋini kepotu ŋityaŋ ŋulu ka ariet toara.”