Read ngakarimojong Esek. 46 Bible Online

Esek. 46 - ngakarimojong bible

Esek. 46

¹Alimu Ekapolon Akuj nu ebe, “Alotooma ŋirwa ŋikanikapei ŋulu itiyaere, emaikina egolitoe epuke ŋolo elomunere nalapatu ŋina alotooma alowae a ŋolo alo Kide, nai ani edoli akoloŋit ŋina a Sabato, emaikina toŋaarae ka akoloŋit ŋina elomunia elap ŋolokitete, emaikina toŋaarae.

²Emaikina ekepukan tolomu nalapatu ŋina a epuke a ŋolo alo Kide, towo alodiyete ŋakito ŋuna a epuke a ŋol. Emaikina nai ŋisacaradotin inakis Ekapolon ŋainakineta a ekepukan ŋuna epeyo ka ŋuna a ekisil, ido emaikina nai ekepukan toryedik kilip alopuke. Ani kedau akilip, toloma kiŋa, nai nyemaikina togoloi epuke akitodol eboŋ.

³Emaikina ŋituŋa ka akwap a Isirael toryediko kilipa alokiŋaren Ekapolon alopuke a ŋol ŋirwa ŋulu a Sabato ka ŋirwa ŋulu elomunia elap ŋolokitete.

⁴Ŋainakineta ŋuna epeyo ŋuna emaikina ekepukan tolemu aŋuna ke Ekapolon akoloŋit ŋina a Sabato ikes nu: Ŋikaalei ŋulumesekin ŋikanikapei ŋulu nyeŋwalito, emesek ŋolo nyeŋwalit,

⁵ŋikinyom ŋulu imorikinio ka emesek ŋakiloi ŋatomoniarei ka ŋaarei, ŋikinyom ŋulu imorikinio ka ŋikaalei ŋulumesekin etyae daadaŋ ŋolo ecamit iŋes, emaikina eyai akimyet ŋilitae ŋiomwon a ŋinakilo a ŋikinyom.

⁶Ani edoli akoloŋit ŋina elomunia elap ŋolokitete, emaikina ekepukan ya neni ke Ekapolon emoŋ ŋolosorokit ŋolo nyeŋwalit ka ŋikaalei ŋikanikapei ŋulumesekin ta emesek, emaikina ŋul daadaŋ erae ŋulu nyeŋwalito.

⁷Emaikina iŋes tolemu ainakinet ŋina a ŋikinyom apeikilo aŋuna ke emoŋ a epei, apeikilo aŋuna a emesek a epei ka ŋakiloi daadaŋ ŋuna ecamit iŋes aŋuna a ŋikaalei a ŋulumesekin, emaikina eyai akimyet ŋilitae ŋiomwon a ŋinakilo a ŋikinyom.

⁸Ani elomuni ekepukan nalapatu ŋina alotooma, emaikina iŋes kitoru nagule ŋina a epuke ka ani eboŋori kiŋa, emaikina kitor nenipei.

⁹“Ani epote Ŋisirael kiŋaren Ekapolon anapakio aŋuna a ŋasuban a ŋuna emaikina kitiyaetei, emaikina ituŋanan daadaŋ ŋini elomuni akilip nalapatu ŋina alotooma alopuke a ŋolo alo Kuju kitor lopuke ŋolo alo Kwap eboŋori ka ŋini elomuni akilip nalapatu ŋin alopuke a ŋolo alo Kwap kitor lopuke ŋolo alo Kuju. Nyemaikina ŋituŋa kitoro lopukei ŋulu sek alomuniata ikes tooma nalapatu, nai emaikina tocorota kiropo alopuke a ŋoloce.

¹⁰Emaikina ani elomunete ikes tooma, tolomu ekepukan daŋ tooma kaapei ka ikes ka ani elomarete ikes kiŋa, toloma ekepukan daŋ kiŋa.

¹¹“Anasuban a ŋuna ikicikakinitae akitiya anapakio a ŋuna eseunitae, emaikina ainakinet ŋina a ŋikinyom ŋina erae akilo, tolemunae aŋuna a emoŋ a epei, akilo apei aŋuna a emesek a epei ka ŋakiloi daadaŋ ŋuna ecamit ituŋanan aŋuna a ŋikaalei a ŋulumesekin, emaikina eyai akimyet ŋilitae ŋiomwon a ŋinakilo a ŋikinyom.

¹²Ani elemuni ekepukan ainakinet ŋina ka acamit keŋ, kerae ŋina epeyo, kori ŋainakineta ŋuna a ekisil ikwapei ŋuna elemuni iŋes neni ke Ekapolon erae ŋainakineta ŋuna ka acamit keŋ, emaikina toŋaarae epuke ŋolo alo Kide aŋuna a ekepukan, tosodi nai ekepukan inak Ekapolon ainakinet keŋ ŋina epeyo, kori ŋainakineta ŋuna a ekisil lopite ŋolo sek itiyaa iŋes akoloŋit ŋina a Sabato. Ekaku, emaikina iŋes toloma kiŋa, ani keloma iŋes kiŋa, emaikina togoloi epuke ŋol.

¹³“Emaikina iŋes tolemu ikale ŋinimesek ŋini erae ekaru epei ŋini nyeŋwalit, ŋini erae ainakinet ŋina epeyo aŋuna ke Ekapolon a ŋinakoloŋit. Emaikina tolemununu ŋin a ŋinataparacu.

¹⁴Emaikina iŋes tolemununu a ŋinataparacu ikwapei ainakinet ŋina a ŋikinyom ŋakirya ŋuna erae ŋakiloi ŋaarei kaapei alita apei ŋina ka akimyet aŋuna ka akiguryo ŋakirya. Emaikina ŋun kitiyae neni a Ekapolon ŋikaru ka ŋikaru.

¹⁵Aŋun, emaikina ainakinet ŋina a ikale, ŋina a ŋikinyom ka ŋina ka akimyet erae ŋuna elemununuyo a ŋinataparacu ikwapei ŋainakineta ŋuna epeyo a ŋinakoloŋit.

¹⁶“Alimu Ekapolon Akuj atemar, ani kelemu ekepukan ibore keŋ idio erae ainakinet a ŋuna alokoku keŋ a edio, eruwor ainakinet ŋin ŋina a ŋidwe keŋ a ŋulusapa, anerae erae ainakinet ŋin apei aloboro a ŋulu ke ekal.

¹⁷Nai ani kelemu iŋes ainakinet ŋin aŋuna a epito keŋ, eruwor ainakinet ŋin ŋina a epito a ŋol akitodol ekaru ŋolo elakarere epito ŋol, kinyakakinae nai ekepukan ainakinet ŋin, erae ainakinet ŋin eborosit a ŋidwe a ekepukan a ŋulusapa, emaikina inakinae ikes.

¹⁸Nyemaikina ekepukan todemana ŋituŋa ibore ŋini erae ŋini kec, emaikina iŋes inak ŋidwe keŋ ŋulusapa ibore ŋini eruwor ŋini kec aloboro keŋ a elope, ikotere nai nyedemar idio alotuŋa kaŋ ibore ŋini erae ŋini kec.”

¹⁹Abu nai ekile ŋol eketorunio ayoŋ lopuke ŋolo ayai diyete ŋagulei ŋuna asegak ŋuna aya lowae ŋolo alo Kuju, atyakaritae ŋagulei ŋun aŋuna a ŋisacaradotin, abu ayoŋ eŋolik a nen akibois ŋina ewasi jik alowae a ŋolo alo To.

²⁰Tema ekile ŋol neni kaŋ, “Erae akibois ŋin neni ipooto ŋisacaradotin akiriŋ a ŋainakineta a ŋuna ka akiilit anasecit ka ŋuna ka asecit ta neni ipooto ikes ŋainakineta aŋuna a ŋikinyom ikotere ikes nyelomuniata ŋainakineta ŋun nalapatu ŋina alokiŋa, yaasi asegis neni a ŋituŋa.”

²¹Abu nai ekile ŋol okoyau ayoŋ kiŋa, nalapatu ŋina alokiŋa, okoriko ayoŋ, eketoryo lokoonae ŋuluomwon ŋulu ka alapatu a ŋina alokiŋa, a ŋolokoona analapatu a ŋin, ayai neni alapat.

²²Alotooma ŋikoonae ŋuluomwon ŋul ŋulu ka alapatu a ŋina alokiŋa, ayai alapatu a ŋolokoona, arae aoyau alosepyon ŋimitae ŋatomoniarei ka arae aoyau anakou ka neni iteotor ŋimitae ŋitomon ka ŋikan. Eriyan ŋalapatui ŋunaomwon ŋun daadaŋ.

²³Arekinitae arwatata ŋina a ŋamoru nawaetin a ŋinalapatu a ŋunaomwon a ŋun, anaŋakinitae ecoto alokwap ŋamoru kiryam arwatata daadaŋ.

²⁴Tema nai ekile ŋol neni kaŋ, “Erae ŋul ŋikenoi ŋulu ipooto ŋulu itiyaete Kai ka Akuj ŋamuronisya ŋuna eyaununeete ŋituŋa.”