Read ngakarimojong Esek. 47 Bible Online

Esek. 47 - ngakarimojong bible

Esek. 47

¹Abu ekile ŋol ekenyaku ayoŋ lopuke ŋolo ka Akai ka Akuj, abu ayoŋ eŋolik a nen ŋakipi ŋuna aleleete alokwap epuke ŋolo ka Akai ka Akuj; aleleete ŋakipi ŋun lowae ŋolo alo Kide (anerae eŋoliyarit Akai ka Akuj lowae ŋolo alo Kide); aleleete ŋakipi ŋun alokwap epuke ŋolo ka Akai ka Akuj alowae a ŋolo alo Kwap, etorito diyete namuroet alowae a ŋolo alo Kwap.

²Abu nai ekile ŋol okolomunia ayoŋ kiŋa, kitoroi lopuke ŋolo alo Kuju, ekesirimo ayoŋ akibois ŋin alokiŋa tari lopuke ŋolo alo Kide alapatu, abu ayoŋ eŋolik a nen ŋakipi eleleunito alowae a ŋolo alo Kwap.

³Abu ekile ŋol torotok a nen etiŋit akipimet, tolot lowae ŋolo alo Kide, kipimu ŋimitae ŋamiae ŋakan aneni aya ŋakipi, ido okoriko ayoŋ eketoryo nakipi, adolito ŋakipi ŋun lotobolae kaŋ.

⁴Abu nabo iŋes kipimu ŋimitae ŋice ŋamiae ŋakan aneni aya ŋakipi, ido okoriko ayoŋ eketoryo nakipi, adolito ŋakipi ŋun nakuŋin kaŋ. Abu nabo ekile ŋol kipimu ŋimitae ŋice ŋamiae ŋakan aneni aya ŋakipi, ido okoriko ayoŋ eketoryo nakipi, adolito ŋakipi ŋun nacir kaŋ.

⁵Abu nabo kipimu ŋimitae ŋice ŋamiae ŋakan, abu nen toruwor aŋolol ŋina pa apedorit ayoŋ adokar ekekwaye, anerae apotu ŋakipi kikeun kidiama, arae ituŋanan ŋini eyeni akilum bon iŋes apedorit adokar ekekwaye.

⁶Abu ekile ŋol ekeŋit ayoŋ tema, “Lokoku a ituŋanan, ite iyoŋ aŋolol na a?” Abu nai iŋes okoyau ayoŋ lokipetot a aŋolol.

⁷Ani adoli ayoŋ lokipetot, abu eŋolik ŋikito ŋulu alalak nooi eyakasi ŋolokipetot ka a ŋolol.

⁸Tema ekile ŋol neni kaŋ, “Eleleete ŋakipi nu nakwap ŋina eyai lowae ŋolo alo Kide, ido totiyaaros Araba. Ani elomarete nanam ŋina ewuatar ŋakipi, toruwor ŋakipi ŋuna ajokak.

⁹Neni daadaŋ eleleyari aŋolol ŋin, eyarete ŋisubuna daadaŋ ŋulu a ŋakipi, eyakaun nakipi ŋun ŋikolya ŋulu alalak nooi, anerae neni daadaŋ elomarete ŋakipi ŋun ananam, eruwor ŋakipi a nen ŋuna ajokak; eyari ibore daadaŋ aneni eleleiyari aŋolol.

¹⁰Erubakinete ŋituŋa ewuaasi a nen ikamete ŋikolya alodiyete anam ageun alocowa a ŋolo a Gedi tari locowa ŋolo a Egilaim. Eruwor nen akibois ŋina epetanakinio ŋatibae tooko, eyakaun nen ŋikolya ŋulu alalak ŋulu egelegelya ŋikabilae, ikwaanikin ŋikolya a nen ka ŋulu anam Mediteranian.

¹¹Nai ŋakipi ŋuna eyakasi lojiomya ŋulu eyakasi diyete anam ŋin ka nataparin ŋuna eyakasi diyete anam ŋin, imyekinio ŋakipi kec erae acumbi.

¹²Elomunete alokipetotyo a ŋuluarei, a ŋulu ka a ŋolol ŋikito ŋulu a ŋikabilae a daadaŋ ŋulu enyamyo ŋaraito kec. Nyeiniyarete ŋakwii a ŋikito a ŋul, kori nyeraraun kwap ŋaraito kec, nai erayete ikes ŋaraito ŋuna ajokak a ŋololap, anerae eleleunito ŋakipi neni kec anakibois a ŋina asegan. Eruwor ŋaraito kec akimuj ka eruwor ŋakwii kec ekitoe ŋolo ikitaŋaleuni.”

¹³Alimu Ekapolon Akuj atemar, erae lu ŋikukorin ŋulu ityakatyakaata iyes akwap ŋina eruwor ŋina a ŋikabilae a Isirael a ŋulutomon ka ŋiarei. Emaikina ekabila a Yosepu toryamu ŋakiboisyo ŋaarei.

¹⁴Emaikina iyes totyakatyakata akwap eriyan, abu ayoŋ ekoŋ ainakin akwap na neni atapapaa kus, eruwor akwap na ŋina kus.

¹⁵Eruwor lo ekukoru a akwap kus: Alowae a ŋolo alo Kuju, isyakini ananam Mediteranian, kitor Esilon, tomyaa Leboamas kiropo Sedad,

¹⁶Berosa, Sibiraim (akwap ŋina eyai kidiŋ akwap a Damasko ka akwap ŋina ka Amas), tomyaa tari Aseratikon, lotaun ŋolo eyai lokukoru ŋolo ka Auran.

¹⁷Aŋun, isyakini ekukoru ŋolo alo Kuju ananam Mediteranian, tomyaa lowae ŋolo alo Kide lotaun Asarenon ŋolo eyai Kuju ekukoru a Damasko, toyai Amas Kuju ekukoru kus.

¹⁸Alowae a ŋolo alo Kide, isyakini ekukoru kus alokidiŋ Auran ka Damasko, tomek aŋolol Yorodan, kitor kidiŋ Gilead ka akwap a Isirael tomyaa nanam ŋina Atwan kisalak Tamar.

¹⁹Alowae a ŋolo alo Kwap, isyakini ekukoru kus alo Tamar, tomyaa tari locowae ŋulu a Meribas-Kades, tomek a nen ayonae ŋina a Ijipit, toloma nanam Mediteranian.

²⁰Alowae a ŋolo alo To, eruwor anam Mediteranian iŋes eruwor ekukoru, tomyaa Kuju nakibois ŋina ka Leboamas.

²¹Aŋun, ikorakinete iyes akwap na neni kus a ŋikabilae a Isirael.

²²Iryamunete iyes iŋes erae ŋina aruwor ŋina kus jik. Emaikina ŋituŋa ŋulugelae ŋulu iboiyete ka iyes, ŋulu adaut auruun ŋidwe a ne toryamut neni eruwor neni kec apaki ŋina ikoryata iyes akwap. Emaikina ikes yae erae ŋituŋa ŋulu ka akwap a Isirael. Emaikina ikes kilamilama kaapei ka iyes apaki ŋina ekorere akwap neni a ŋikabilae a Isirael.

²³Igelaanot daadaŋ ŋini iboiyete ka iyes, eryamuni akibois keŋ kaapei ka ŋituŋa a ekabila a ŋolo iboiyoto iŋes. Ayoŋ Ekapolon Akuj alimu ŋun.