Read ngakarimojong Esek. 6 Bible Online

Esek. 6 - ngakarimojong bible

Esek. 6

¹Abu Ekapolon kirwor neni kaŋ tema,

²“Lokoku a ituŋanan, kiŋoliya lowae ŋolo a ŋimoru a Isirael, ido todwar ŋakiro nu neni kec itoroniyarit ikes.

³Tolimok ikes ebe, ‘okoe, ŋimoru a Isirael, kiirasi ŋakiro a Ekapolon Akuj, irworo Ekapolon ŋakiro keŋ neni kus ŋimoru ka ŋikamukumukui, neni kus ŋakadipaalae ka ŋayona, irworo iŋes atemar kiirasi, eyakuuni ayoŋ ŋikaarak lotuŋa kus ka alemari ayoŋ ŋaitae kus.

⁴Eukonoryo ŋamuroeta ŋuna edukitoe neni kus, ebwaŋabwaŋaaryo ŋamuroeta ŋuna icunyere ekinyate aneni kus ka aari ayoŋ ŋituŋa kus alokiŋaren ŋakujo kus.

⁵Eperikini ayoŋ ŋalyalin a Ŋisirael kiŋaren ŋakujo kec; ido eelak ŋakoyo kus kirimokis ŋamuroeta kidiŋ.

⁶Eruwor ŋitaunio daadaŋ ŋulu iboiyoto iyes ŋireŋoroto ka ebwaŋabwaŋaaryo ŋaitae a ŋimoru kus, ikotere ŋamuroeta ŋuna edukitoe naitae ŋun, eruwor ŋacaryo ka ŋuna emunaara ka eruwor ŋakujo kus ŋuna ebwaŋabwaŋatae ka emunaaritae, ebwaŋabwaŋakinio kwap ŋamuroeta ŋuna icunyere ekinyate, ido eŋopiyari etic ŋolo idaut iyes akitiya.

⁷Earakinio ŋituŋa kus kidiŋ kus; ŋun nai ikiteyenunete iyes atemar arae ayoŋ Ekapolon.

⁸“‘Nai apiyanuni ayoŋ ŋituŋa kus ŋidi. Ebucarosi ŋidi kus anatwanare a ŋina ikiaryata ŋakwapin iyes, ido ielaryo ŋul nakwapin.

⁹Ikes ŋulu ebucarosi akatamunete ayoŋ anakwapin a ŋuna erikoryo erae ŋirikon. Etamunete ikes epite ŋolo abunio ayoŋ oŋoya aŋuna aponiata ikes tomalaaketa alotai kec toŋero anupit ayoŋ ka ŋuna aponiata ikes okoŋero ayoŋ toloto neni a ŋakujo kec. Nyepedorete nabo ikes acamun akitiya ŋuna aronok ŋuna etiyata ka ŋuna ka asiilyo daadaŋ ŋuna adaut ikes akitiya.

¹⁰Eyenunete nai ikes anakiro aŋun atemar arae ayoŋ Ekapolon ka ŋakiro ŋuna abala ayoŋ ikes nyitiyata, pa arae ca ŋuna kitukuryanet ikes.’

¹¹“Ŋakiro ŋuna irworo Ekapolon Akuj ikes nu, ‘Kibapibapakisi ŋakan kus, topeto akwap a ŋakejen, kikaloutu iyaloloŋete aŋuna ka aronis a daadaŋ ka asiilyo ŋina etiyata Ŋisirael, anerae emunyari ikes ekileŋ ka akoro ta edeke.

¹²Eari edeke ikes ŋulu iboiyete aneni alwanan ka emunyaryo a ekileŋ ikes ŋulu iboiyete anepei a ne, ido ŋulu idoŋete ŋulu imyekinio nyear ekileŋ, kori edeke, eari akoro. Epite ŋol iŋes iŋolikiniata ikes anyunyura kaŋ aŋuna kec.

¹³Eyenunete nai ikes atemar arae ayoŋ Ekapolon apaki ŋin ŋina iŋolikiniata ikes ŋalyalin a ŋituŋa kec eperete alokidiŋ ŋakujo kec, alodiyete ŋamuroeta kec, alokidiama ŋikamukumukui ŋulu aoyak daadaŋ, alokidiama ŋimoru daadaŋ, alokwap ŋikito ŋulu alibak daadaŋ ka alokwap ŋolokuyon eya ŋakuii daadaŋ, nakiboisyo ca daadaŋ ŋuna apeyoto ikes neni a ŋakujo ŋainakineta ŋuna ebob eure icunyo neni a ŋakujo kec.

¹⁴Arami ayoŋ ikes a akan kaŋ, eturuwo akwap kec ereŋorot ka akoŋinait alotooma ŋakiboisyo kec daadaŋ, ameun analoŋisat tari lotaun ŋolo enyaritae Ribila. Eyenunete nai ikes atemar arae ayoŋ Ekapolon?’ ”