Read ngakarimojong Esek. 7 Bible Online

Esek. 7 - ngakarimojong bible

Esek. 7

¹Abu Ekapolon kirwor neni kaŋ tema,

²“Iyoŋ, lokoku a ituŋanan, ŋakiro ŋuna irworo Ekapolon Akuj aŋuna ka akwap a Ŋisirael ikes nu, ‘Adaun apaki! Adolu apaki ŋina ikisicanere iyes alowaetin a ŋuluomwon a akwap kus a daadaŋ.

³Imunyarosi tokona iyes, emyekini tokona ayoŋ aŋoit kaŋ bu neni kus; akatubokini ayoŋ iyes alopite a ŋolo itiyatotor iyes, ekesicani ayoŋ iyes aŋuna ka asiilyo a daadaŋ a ŋina itiyata iyes.

⁴Nyekemyekini ayoŋ iyes ekeŋolikini, nyekesyoni ayoŋ iyes. Ekesicani ayoŋ iyes a ŋakiro a ŋuna itiyata iyes ka aŋuna ka asiilyo a ŋina itiyaete iyes alokidiŋ kus. Ŋun nai iyenuniata iyes atemar arae ayoŋ Ekapolon.’

⁵“Ŋakiro ŋuna irworo Ekapolon ikes nu, ‘Ŋican ka ŋican bon ianyunete epote neni kus.

⁶Adolu neni kus adaun, adolu neni kus adaun, ikinyoik iyes ikitoŋoiya, kiirasi abu!

⁷Adolu amunyaro kus neni kus, iyes ŋituŋa ŋulu iboiyete anakwap a Isirael. Adolu esaa, aapuu akoloŋit ŋina ke ekaile meere ŋina ebolyare itiyao ŋasuban alomoru.

⁸Aapuu ayoŋ ayaun anyunyura kaŋ neni kus; iŋolikinete tokona iyes aŋoit kaŋ eyakaun neni kus. Akatubokini ayoŋ iyes lopite ŋolo itiyatotor iyes, ekesicani iyes aŋuna ka asiilyo kus a daadaŋ.

⁹Nyekemyekini ayoŋ iyes ekeŋolikini; nyekesyoni ayoŋ iyes. Ekesicani ayoŋ iyes lopite ŋolo itiyatotor iyes, ekesicani ayoŋ iyes aŋuna ka asiilyo a ŋina itiyaete iyes alokidiŋ kus. Ŋun nai iyenuniata iyes atemar erae ayoŋ Ekapolon ekesicanit iyes.

¹⁰Kiirasi aapuu akoloŋit! Abu! Eelun amunyaro kus, alalaar aryenyeo, alalaar akituro,

¹¹alomu aronis ŋina alalan nooi anaryenyeo. Mam Ŋisirael ŋini idoŋi, mam tari aloboro kec a ŋulu alalak, ŋini idoŋi mam tari ebari kec nyidoŋi; nyidoŋi tari ibore idio ŋini epol egyelit.

¹²Adolu esaa, aapuu akoloŋit; nyemaikina ŋini egyeli ibore tolelyan, kori ŋini egyelanari ibore kiitono ibore ŋin; anerae ebunit anyunyura kaŋ neni a ŋinituŋanan.

¹³Mam nyeboŋori ekagyelaran nibore ŋini sek adaun iŋes agyelar, tari daŋ keriŋa iŋes eyai lotuŋa ŋulu iboiyete a nen; anerae eyakaun aŋoit ŋina ka Akuj neni a ŋituŋa a daadaŋ. Emam ikaronon imyekinio eyari aŋuna ka asecit keŋ.

¹⁴Adaut ŋituŋa akutakin amomwara, adaut ŋituŋa akitemokin ŋiboro daadaŋ aŋuna ke ejie; nai mam ŋini alot lojie, anerae eyai anyunyura kaŋ neni a ŋinituŋanan.

¹⁵Eriŋa ŋikaarak ŋulu isitiyaete ekileŋ eyakasi kiŋa, nai adaut akoro ka edeke alomun tooma, ikiaryo iyes ŋulu iyakasi kiŋa a ekileŋ; ikiaryo iyes ŋulu iyakasi tooma etaun a akoro ka edeke.

¹⁶Ani keyakaun ŋulu ebucarosi tosiwa, eryamunio ikes alokidiama ŋimoru ikwa ŋakuryo ŋuna a ŋakadipaalae, eryamunio ŋinituŋanan igworo aŋuna a ŋasecisya keŋ.

¹⁷Epalagagunete ŋakan a ŋinituŋanan, elemaryo agogoŋu anakuŋin a ŋinituŋanan lopite ŋolo ebukorere ŋakipi.

¹⁸Enapete ikes ŋiguniyae, ilopiyari ekabule ikes. Ilelebun ŋileec neni a ŋinituŋanan, ebanyaryo ŋitim anakou a ŋinituŋanan.

¹⁹Imasakinete ikes esilipa kec lorotin ŋulu a ŋitaunio kec, itoroniyarete ikes egolid kec. Itiyaete ikes ŋun, anerae nyepedori esilipa kori egolid kec aiun ikes akoloŋit ŋina ebunio anyunyura a Ekapolon neni kec. Nyepedorete ikes alemar akoro aneni kec, kori akisimwon ŋakookyes kec a esilipa, kori a egolid, anerae apotu esilipa ka egolid kiŋalaasi ikes nasecit.

²⁰Alonapito kec a ŋulu ebusak, a ŋulu aponiata ikes kiturokinotor, apotu ikes kitiyaut ŋitorubei ŋulu ka asiilyo ka ŋakujo kec ŋuna pa acamit ayoŋ. Aŋun, eturuwori ayoŋ ikes ŋulu itoroniarito ŋiboro ŋulu ebaritotor ikes.

²¹Ainakini ayoŋ ŋigelaanotin toŋatasi ŋiboro ŋul, ainakini ayoŋ ŋituŋa ŋulu aronok anakwap tolemasi ŋiboro ŋul, emunaarete ŋituŋa ŋiboro ŋul.

²²Nyacamuni ayoŋ akiŋolikin ikes, ikotere ikes itoroniyarete akibois kaŋ ŋina amina ayoŋ; elomarete ŋiryenyaanotin tooma keŋ, emunaarete ikes iŋes.

²³Kitemonokisi ŋiriko! Anerae elelebun atwanare ŋina ka atubonokin nakwap kus, elelebun aryenyeo lotaun kus.

²⁴Ayauni ayoŋ ŋituŋa a ŋakwapin ŋulu aronok nooi itodemasi iyes ŋakais kus. Etasaluni ayoŋ akituro a ŋikagogoŋok kus, emunaaryo ŋakiboisyo kus ŋuna ilipyata iyes.

²⁵Apaki ŋina edolunio ekabule neni kus, iwarete iyes aryamun ekisil, nai nyiryamunete tari idio daŋ.

²⁶Ikiropikinete iyes ŋican, ikiropikinete iyes ŋirworisya ŋulu ka alyokonu; iitanete iyes ayenun alokadwaran ŋakiro ŋuna eponito; edaun esacaradoti ŋakiro ŋuna ikitatami iyes, edaun ŋikasikou ŋakiro ŋuna ikisirworiuniata iyes.

²⁷Ikalouni erwosit kus, edaun akigeno aneni alokoku a erwosit, emaranikinete aŋuna ka akuryanu a ŋituŋa a akwap kus. Ekesicani ayoŋ iyes lopite ŋolo itiyatotor iyes; akatubokini ayoŋ iyes lopite ŋolo itubonokiniata iyes ŋuluce. Ŋun nai iyenuniata iyes atemar arae ayoŋ Ekapolon.’ ”