Read ngakarimojong Esek. 8 Bible Online

Esek. 8 - ngakarimojong bible

Esek. 8

¹Ani edoli ekaru ŋolo a ŋikanikapei, elap ŋolo a ŋikanikapei, ŋirwa ke elap ŋikan, apaki ŋina eboiyo ayoŋ alokai kaŋ, kiboiyete ŋikasikou ŋulu a Yudaya alokiŋaren kaŋ, abu apedor ŋina ke Ekapolon Akuj bu neni kaŋ a nen.

²Abu ayoŋ eŋoliya kidiama, eŋolik etorube ŋolo ekwaan ka ituŋanan. Atakani iŋes anacir tari nakejen ikwaan ka akim ka ameun anacir tari nakou anwakinwaki ekoni asuwat ŋina epwasitae.

³Abu iŋes torwaa ibore ŋini ekwaan ka akan keŋ, kikamu ŋitim anakou kaŋ okoya ayoŋ. Abu etorube ŋolo a etau ka Akuj ŋol okoya ayoŋ kidiŋ nakuj ka akwap, ekaku abu okoya ayoŋ Yerusalem alotorubei a ŋulu ka Akuj. Ekewuak iŋes ayoŋ lopuke ŋolo iwasi alotooma alopuke a ŋolo alo Kuju elomaryo nalapatu ŋina ka Kai ka Akuj. Ayai nen etorube ŋolo ka akuj a ŋina etiyaunitae, etorube ŋolo etiilit Akuj nooi.

⁴Ayai nen kiŋaren kaŋ akica ŋina ka Akuj a Ŋisirael, ŋina ekwaan ka ŋina a etorube a ŋolo eŋolikinit sek ayoŋ anakadipaalat.

⁵Tema nai Akuj neni kaŋ, “Lokoku a ituŋanan kiŋoliu kidiama lowae ŋolo alo Kuju lo.” Aŋun, abu ayoŋ eŋoliya inaa, eŋolik etorube ŋolo etiilit Akuj nooi eyai Kuju epuke ŋolo elomarere namuroet.

⁶Tema nai Akuj neni kaŋ, “Lokoku a ituŋanan iŋolik iyoŋ ibore ŋini itiyaete ikes a? Iŋolik iyoŋ ŋakiro ŋuna ka asiilyo ŋuna itiyaete Ŋisirael a ne aŋuna ka akiritar ayoŋ anakibois kaŋ a ŋina asegan a? Iŋolikini daŋ iyoŋ ŋace ŋuna ka asiilyo a ŋina apolon nooi.”

⁷Abu nai Akuj okoyau ayoŋ lopuke ŋolo ka alapatu, oŋoleŋolek ayoŋ a nen, eŋolik eole anarwatata.

⁸Tema Akuj neni kaŋ, “Lokoku a ituŋanan, tobok arwatata topuyoiyo;” ani abokari ayoŋ arwatata, abu eŋolik epuke eyai nen.

⁹Tema Akuj neni kaŋ, “Toloma tooma kiŋolik aronis ka asiilyo ŋina itiyaete ikes a ne.”

¹⁰Abu ayoŋ oloma tooma, oŋoleŋolek; eŋolik eyakasi arwatata daadaŋ ŋitorubei ŋulu a ŋiboorei a ŋulu alyatok ka ŋulu a ŋityaŋ a ŋulu itoronitae ta ŋulu a ŋakujo a daadaŋ a ŋuna a Ŋisirael.

¹¹Awuasi alokiŋaren ŋitorubei ŋul ŋikasikou a Ŋisirael ŋatomonikanikaarei kaapei ka Yasania lokoku a Sapan. Ayakar nakan keŋ ŋinituŋanan isipirya ŋini icunyere ekinyate, topuruye apuru a ekinyate a ŋolo adakito ikes.

¹²Tema Akuj neni kaŋ, “Lokoku a ituŋanan, iŋolik iyoŋ ŋuna itiyaete ŋikasikou a Ŋisirael anakimunono a? Iŋolik iyoŋ ŋuna itiyae ŋinituŋanan alokai keŋ a ŋina eyakasi ŋitorubei a? Ebasi ikes ebe, ‘Mam nyikite iwon Ekapolon, nyeriŋa Ekapolon etamunit akwap yok.’ ”

¹³Abu daŋ Akuj tema ayoŋ, “Iŋolikini iyoŋ ŋace ŋuna ka asiilyo a ŋina apolon nooi a ŋina itiyaete ikes.”

¹⁴Abu nai Akuj okoyau ayoŋ lopuke ŋolo ayai lowae ŋolo alo Kuju Akai ka Akuj, eboiyete a nen ŋaberu ŋuna egworosi aŋuna a Tamus.

¹⁵Tema Akuj neni kaŋ, “Lokoku a ituŋanan, iŋolik iyoŋ ŋakiro nu a? Iŋolikini iyoŋ ŋace ŋuna ka asiilyo a ŋina apolon nooi akilo ŋun.”

¹⁶Abu nai Akuj okoyau ayoŋ nalapatu ŋina alotooma Akai ka Akuj, ayakasi diyete epuke ŋolo ka Akai ka Akuj, kidiŋ ebarasan ka namuroet ŋikilyok ŋulu aapiyarit ekimar kec ŋatomoniarei ka ŋikan. Amulenito ikes Akai ka Akuj, eŋoliyarito lowae ŋolo alo Kide, ejuuruyete ikes iŋoliyarito Kide, ilipete neni ka akoloŋ.

¹⁷Tema nai Akuj neni kaŋ, “Lokoku a ituŋanan, iŋolik iyoŋ ŋakiro nu a? Nyerae mono ibore ŋini aronon nooi akiŋolikin asiilyo ŋina itiyaete ŋituŋa a Yudaya a ne a? Emaikina mono ikes kilelebikis tari aryenyeo nakwap ka torubakis eketoŋoito ayoŋ a? Kiŋolik iyoŋ epite ŋolo iasyata ikes akitoŋo ayoŋ nooi alopite a daadaŋ a ŋolo ecamito ikes!

¹⁸Aŋun, anyunyurikin ayoŋ ikes, nyacamuni ayoŋ akiŋolikin ikes, mam tari nyesyoni ayoŋ ikes; tari kigworo ikes neni kaŋ opupi ayoŋ ikes iworoete nooi, nyapupokini ayoŋ ŋakiro kec.”