Read ngakarimojong Dan. 12 Bible Online

Dan. 12 - ngakarimojong bible

Dan. 12

¹“Apaki ŋin, ebuni Mikael, ekarikon ŋolo apolon ŋolo erae ekedaran a ŋituŋa kon. Eyakaun apaki ŋina ka aryeba apaki ŋina nyeyakauna ŋinapei koloŋ kisyakiniata ŋapukasinei. Nai apaki ŋin, elakunio ŋituŋa kon, elakunio ŋituŋa daadaŋ ŋulu igiritae ŋirorwa kec lokitaabo.

²Eyarunete ŋituŋa ŋulu alalak ŋulu alomasi kwap, ŋice eryamunete alakara ŋina ka akiyar a ŋina nyedaun, ŋice eryamunete ŋileec ka ajamuwaro ŋina nyedaun.

³Ecaunete ŋikaosok lopite ŋolo ecaya akoloŋ alokidiama, ido ecaunete ŋikaru ka ŋikaru ŋulu erikunete ŋulu alalak nakiyookino lopite ŋolo ecayata ŋikacer.

⁴Nai, iyoŋ Daniel, kimunon ŋakiro ka kimyek ekitaabo egolokino jik tari akoloŋit ŋina esalunia akwap. Irimokinete ŋikalalak iwarito ayenun ŋakiro ka iyatakin akitiya ŋuna aronok.”

⁵Abu nai ayoŋ Daniel, oŋoleŋolek, eŋolik ŋikilyok ŋiarei ewuasi, awoi epei alokipetot a ŋolo alaalo aŋolol ka awoi ŋoloce alokipetot a ŋolo ayaye aŋolol.

⁶Abu epei kec tolimok ekile ŋolo anapit elou ŋolo amilimilan, ŋolo awoi alokidiama ŋakipi tema, “Apaki ŋina etya ai eayete ŋaumonokineta nu nyedauna? ”

⁷Abu nai ekile ŋolo anapit ŋilowi ŋulu amilimilak, ŋolo awoi alokidiama ŋakipi kikyaa ŋakan keŋ kidiama, ido abu ayoŋ eira iŋes ikoŋi alokiro a Akuj a ŋina eyari ŋikaru ka ŋikaru ebala, “Erae ŋakiro nu ŋuna a ŋikaru a ŋiuni ka atutubet. Ani edaun apedor a ŋituŋa a Akuj, itiyakinio ŋakiro nu daadaŋ.”

⁸Abu ayoŋ eira, nai abu nyayenu apolou a ŋakiro a ŋun, aŋun abu ayoŋ eŋit otema, “Ekapolon kaŋ, anukiro epote ekaku a ŋakiro a nu?”

⁹Abu iŋes tema, “Tolot a ne Daniel, anerae emaikina ŋakiro nu kidoŋo erae ŋuna imunono ka togolitetei jik tari akoloŋit ŋina esalunia akwap.

¹⁰Italeunio, itesegunio ka itojokunio ŋulu alalak, nai erubakinete ŋulu aronok itiyaete aronis. Mam ipei daŋ aneni a ŋulu aronok ŋini eyenuni ŋakiro, nai eyenunete ŋulu aosok.

¹¹Ameun anakoloŋit a ŋina ajoŋoere ayaunun ŋainakineta ŋuna epeyo, akoloŋit ŋina etiyaere asiilyo ŋina abu yau ekasile, eyakaun ŋirwa aliput ka ŋamiae ŋaarei ka ŋatomoniomwon.

¹²Erereŋ ŋulu idaŋidaŋete tari ŋina elunyarotor ŋirwa aliput ka ŋamiae ŋauni ka ŋatomoniuni ka ŋikan.

¹³Nai iyoŋ Daniel, torubak irae ŋolo ikinyoma tari nasalunet, tari kitwana daŋ, iyaruni iyoŋ ikotere iryamuni eropit kon akoloŋit ŋina esidyon.”