Read ngakarimojong Dan. 3 Bible Online

Dan. 3 - ngakarimojong bible

Dan. 3

¹Abu erwosit Nebukadinesar kitiyau etorube a egolid. Arae aoyau keŋ alokwap tari kidiama ŋimitae ŋatomoniarei ka ŋikanikaarei ka arae alowae ke epei tari ŋoloce ŋimitae ŋiuni. Abu iŋes tosipok etorube ŋol nadipo a Dura a akibois a ŋina ayai nakwap a Babilon.

²Abu nai erwosit Nebukadinesar kiyakiya ŋituŋa anyarare: Ŋikepukak a ŋakiboisyo, ŋikapolok a ŋikawoikinitok a ŋakwapin, ŋikawoikinitok a ŋakwapin, ŋikeŋarenikinitok, ŋikeŋadak ŋisiliŋa, ŋikatubok ŋakiro ka ŋikatubok ŋakiro ŋulu apolok ta daadaŋ ŋulu apolokinito ŋakiboisyo, aŋuna ka acunakin akitaleun etorube ŋolo abu erwosit Nebukadinesar tosipok.

³Aŋun, apotu ŋikepukak a ŋakwapin, ŋikapolok a ŋikawoikinitok a ŋakwapin, ŋikawoikinitok a ŋakwapin, ŋikeŋarenikinitok, ŋikeŋadak a ŋisiliŋa, ŋikatubok ŋakiro ka ŋikatubok ŋakiro ŋulu apolok ta daadaŋ ŋulu apolokinito ŋakiboisyo potu tocunakinos aŋuna ka akitaleun etorube ŋolo abu erwosit Nebukadinesar tosipok. Ani ewuasi ikes alokiŋaren etorube ŋolo kebu Nebukadinesar tosipok,

⁴abu ekeseran ŋolo a erwosit kiserau ikeunit tema, “Okoe ŋituŋa, ŋakwapin ka iyes ŋulu irworosi ŋaŋajepa ŋuna egelegelya ikilimokin atemar,

⁵ani iirarete iyes eruye a amomwara a emesek, a apilu, a agita, a aujiwij, a aduŋgu, a ebur ka ŋolo a ŋiboro a daadaŋ a ŋulu eore, emaikina iyes toryediko ka kilipa etorube a egolid ŋolo adau erwosit Nebukadinesar asipokin.

⁶Ituŋanan daadaŋ ŋini nyeryediki kilip, imasakinio atipei nakim ŋina a ekitet ŋina erirae.”

⁷Aŋun, ani iirarete ŋituŋa daadaŋ eruye amomwara a emesek, a apilu, a agita, a aujiwij, a aduŋgu, a ebur ka ŋolo a ŋiboro a daadaŋ a ŋulu eore, apotu ŋituŋa daadaŋ ka ŋakwapin daadaŋ ta ŋulu irworosi ŋaŋajepa ŋuna egelegelya toryediko ka kilipa neni a etorube a egolid a ŋolo kebu erwosit Nebukadinesar tosipok.

⁸Apaki ŋin, apotu Ŋibabiloniyae ŋice potu kiŋaren, kisitakis Ŋiyudayan.

⁹Temasi neni a erwosit Nebukadinesar, “Okoe erwosit, kiboi ŋikaru ka ŋikaru!

¹⁰Okoe erwosit, idau iyoŋ atubun atemar emaikina ŋituŋa daadaŋ toryediko ka kilipa neni a etorube a ŋolo itiyaunitae a egolid, apaki ŋina iiraryata ikes eruye a amomwara a emesek, a apilu, a agita, a aujiwij, a aduŋgu, a ebur ka ŋolo a ŋiboro a daadaŋ a ŋulu eore,

¹¹ido ituŋanan daadaŋ ŋini nyeryediki kilip, imasakinio nakim ŋina a ekitet ŋina erirae.

¹²“Eyakasi ne Ŋiyudayan ŋice ŋulu ibu iyoŋ toseu apolokin ŋakiro anakwap a Babilon, Ŋiyudayan ŋul ikes lu: Sadirak, Mesak ka Abedinego. Nyikikerito iyoŋ ŋikilyok ŋul, okoe erwosit, nyitiyanakinete ikes ŋakujo kon ka nyilipete ikes neni a etorube a egolid a ŋolo idau iyoŋ asipokin.”

¹³Abu nai erwosit Nebukadinesar tolili nooi, ido tolimu atemar yaunae Sadirak, Mesak ka Abedinego tooma neni ayai iŋes. Aŋun, aponi yaunae ŋikilyok ŋul kiŋaren erwosit.

¹⁴Tolimok Nebukadinesar ikes tema, “Erae kire atemar, iyes Sadirak, Mesak ka Abedinego nyitiyanakinete ŋakujo kaŋ, kori nyilipete neni a etorube a egolid a ŋolo asipok ayoŋ a?

¹⁵Tokona, ani kitenito iyes aryedik ka akilip neni a etorube a ŋolo etiyaunit ayoŋ, emaikina kitiyata ŋun apaki ŋina eruunio amomwara a emesek, apilu, aujiwij, aduŋgu, ebur ka ŋolo a ŋiboro a daadaŋ a ŋulu eore, ejokyata ŋun, nai ani pa kilipa iyes neni a etorube a ŋol, ikimasakinio iyes atipei nakim ŋina a ekitet ŋina erirae, anikuj epedori aiun iyes anapedor kaŋ?”

¹⁶Toboŋokis Sadirak, Mesak ka Abedinego erwosit temasi, “Okoe erwosit Nebukadinesar nyemaikina isua toiunetei anakitepeg iyoŋ anakiro a nu.

¹⁷Ani kepedori Akuj kosi ŋina ikitiyanakini isua aiun isua anakim a ŋina a ekitet a ŋina erirae ka alakun isua anapedor kon, okoe erwosit, ikilipi ikilaku iŋes isua.

¹⁸Ani kemam, toyenu nu okoe erwosit atemar nyikitiyanakini isua ŋakujo kon ka nyikilipi neni a etorube a ŋolo a egolid a ŋolo idau iyoŋ asipokin.”

¹⁹Abu nai erwosit Nebukadinesar tolili nooi tonyoridid ereet keŋ aŋuna a Sadirak, Mesak ka Abedinego. Tolimok erwosit ŋituŋa atemar kinokakinae akim a ekitet tomwanu nooi ŋarwa ŋakanikaarei akilo neni sek.

²⁰Tolimok ŋikilyok ŋice alosigarya keŋ ŋulu agogoŋok nooi toena Sadirak, Mesak ka Abedinego, ido tocakakis ikes narira a ekitet.

²¹Aŋun, aponi ŋikilyok ŋul toenae enapito ŋisatyo kec, ŋitorosyo kec, ŋakopiyae kec ka ŋilowi kec ŋice, aponi tocakakinae ikes narira a ekitet.

²²Aŋuna araakar alimunet a erwosit ŋina ka atipei ka aŋuna amwania ekitet nooi, abu arira a akim toar ŋikilyok ŋulu aete Sadirak, Mesak ka Abedinego narira a ekitet.

²³Nai apotu ŋikilyok ŋuluuni lu: Sadirak, Mesak ka Abedinego tocakakinos eenen tooma nakim ŋina arirae ŋina ke ekitet.

²⁴Abu nai tobul erwosit Nebukadinesar, tosodi tonyou atipei, ikirikira, kiŋit ŋikeŋarakinitok keŋ tema, “Pa mono arae ŋikilyok ŋiuni aponi iwon kimasakinae eenen narira a?” Toboŋokis ikes erwosit temasi, “Iyookino ŋun okoe erwosit.”

²⁵Tolimu nabo erwosit tema, “Nai ete ayoŋ ŋikilyok ŋiomwon elosete alokidiŋ arira pa eenen, ido mam neni ewanan anawat kec ka etakakini ekile ŋolo a ŋiomwon esibit emalaika.”

²⁶Toapiya nai Nebukadinesar lopuke ŋolo a ekitet a ŋolo arira akim, kirworik tema, “Sadirak, Mesak ka Abedinego iyes ŋiketiyak ŋulu ka Akuj a ŋina alokidiama nooi, tolomutu kiŋa!”

²⁷Apotu nai ŋikepukak a ŋakwapin, ŋikapolok a ŋikawoikinitok a ŋakwapin, ŋikawoikinitok a ŋakwapin, ŋikeŋarakinitok a erwosit tocunakinos iwapei, kiŋolikis atemar kebu akim nyenom ŋawat a ŋikilyok a ŋuluuni a ŋul; pa anomit akim ŋitim kec, pa anomit ŋisatyo kec ka amam eure a apuru aneni kec.

²⁸Tolimu nai Nebukadinesar tema, “Kipuroe Akuj a Sadirak, Mesak ka Abedinego, ŋina abu kiyaku emalaika keŋ alakun ŋiketiyak keŋ ŋulu apotu kikinyoma iŋes. Apotu ikes nyiwuapa ŋuna alimunit erwosit ka apotu tojala ŋawat kec, nyecamut akitiyanakin ka akilip neni ka akuj ka ace mati Akuj kec.

²⁹Aŋun, alimu ayoŋ ŋakiro nu: Ituŋanan daadaŋ, kori ŋakwapin, kori ituŋanan a aŋajep adio, ŋulu iyanyete Akuj a Sadirak, Mesak ka Abedinego, etubutubooryo ŋakejen ka ŋakan ka ituworyo akai keŋ ŋamoru ŋuna etukosi koŋin, anerae emam akuj ace ŋina epedori alakun lopite lo.”

³⁰Abu nai erwosit kitopoloo Sadirak, Mesak ka Abedinego anakwap a ŋina a Babilon.