Read ngakarimojong Dan. 7 Bible Online

Dan. 7 - ngakarimojong bible

Dan. 7

¹Alokaru a ŋolo esyaunan ipukat Belisasar Babilon, abu Daniel kiruja ka abu kiŋolik ŋakisileerekineta apaki ŋina aperyo iŋes alokitaada. Abu nai iŋes kigir ŋakiro ŋuna erujae iŋes tema,

²“Anakisileerekinet a ŋina abu ayoŋ eŋolik nakwaare, abu ayoŋ eŋolik ekuwuam ŋolo akutunit alowaetin a ŋuluomwon a daadaŋ, ŋolo akutunit ananam a ŋina apolon nooi.

³Apotu ŋityaŋ ŋiomwon ŋulu apolok nooi tolomut ananam, agelegelaka ŋityaŋ ŋul daadaŋ.

⁴Ekwaan ŋolo esyaunan ka eŋatuny nai ayakar ŋabebenuk ŋuna ekwaan ka ŋuna a egole, ani eriŋa ayoŋ etee iŋes, eŋolik ŋabebenuk keŋ edotoryo anakuwan keŋ, kitonyounoe etyaŋ alokwap ido kimyekinae towo a ŋakejen a ŋaarei esibit ituŋanan ka aponi inakinae iŋes ŋatameta ŋuna a ituŋanan.

⁵Totakanu nabo etyaŋ ece ŋolo a ŋiarei ŋolo ekwaan ka etyaŋ ŋolo adedeŋan, aponi etyaŋ kitonyounoe ke epeiwae, ayakar etyaŋ ŋol ŋikyal ŋiuni ŋulu apolok nakituk keŋ ŋina aya ŋikyal ŋuluce ka aponi tolimokinae ebe, ‘Tonyou tonyam ŋawat ŋuna alalak.’

⁶Ekaku a ŋol eriŋa ayoŋ ete iŋes, abu ece totakanu ŋolo ekwaan ka eris, ayakar etyaŋ ŋol kaku keŋ ŋabebenuk ŋuna ikwaan ka ŋuna a ikyeny ka eyakar etyaŋ ŋol ŋakyes ŋaomwon, aponi inakinae iŋes apedor ŋinakipukaet.

⁷Kedaun ŋun, abu nabo eŋolik anakisileerekinet a ŋina abu ayoŋ eŋolik nakwaare etyaŋ ŋolo a ŋiomwon, arae etyaŋ ŋol ŋolo ikiteryaŋakini ŋolo ikitubuli ka arae ŋolo agogoŋon nooi, ayakar etyaŋ ŋol ŋikyal ŋulu aburok ŋulu arae ŋasuwa, anyami iŋes ibore apaki ŋin ka anyilinyili icakit ŋanyile. Agelaana etyaŋ ŋol alotooma ŋityaŋ daadaŋ ŋulu a ekiŋaren ka ayakar ŋamomwar ŋatomon.

⁸Ani eriŋa ayoŋ ete ŋamomwar a etyaŋ a ŋol, abu ayoŋ eŋolik amomwara ace ŋina adit alokidiŋ ŋamomwar ŋunatomon. Abu amomwara ŋin kilunyokin neni a ŋamomwar a ŋauni a ŋuna aponi toditarae anakou a etyaŋ. Aya daŋ namomwara ŋin ŋakonyen ŋuna ekwaan ka ŋuna a ituŋanan, ayakar daŋ etyaŋ ŋol akituk ŋina erworo ŋakiro ŋuna ka akituro.”

⁹“Ani eriŋa ayoŋ ete, aponi kiwuakinae nen ŋikicoloŋo ŋulukipukaet, ido abu ŋolo iboit ŋikaru ka ŋikaru kiboikin lokicoloŋ keŋ, akwaŋak ŋilowi keŋ ekwaan ka ŋalepan, akwaŋak ŋitim a akou keŋ ekwaan ka ŋajul a ŋamesekin a ŋuna ekwaŋak kya. Acai ekicoloŋ keŋ ekwaan ka arira a akim ka acai neni irimi anakejen a ekicoloŋ keŋ ekwaan ka akim ŋina enepi.

¹⁰Abunit ayonae ŋina alelyaa akim alokicoloŋ keŋ aleleunit akim ŋin aneni ayai ŋolo iboit ŋikaru ka ŋikaru. Etiyanakinete iŋes ŋiketiyak ŋulu arae ŋalipyo ka ŋalipyo, awuasi ŋiketiyak keŋ ŋamilionio amiat alokiŋaren keŋ. Togeunae nai eikiiko ŋolo etubere ŋakiro, toŋaarae ŋikitaaboi.

¹¹Abu ayoŋ orubak ete ŋun, anerae apupi ayoŋ ŋakiro ŋuna ka akituro ŋuna erworo amomwara. Ani ete ayoŋ ŋun, aponi toarae etyaŋ ŋol ka aponi kinyasunae akuwan keŋ, ido tocakakinae nakim ŋina arirae.

¹²Nai ŋityaŋ ŋuluce ŋuluuni, aponi tolemarae apolou kec, nai aponi kiyatakinae ŋirwa a akiyar kec apaki ŋina euruwuana.

¹³Ani ete ayoŋ ŋakisileerekineta ŋun nakwaare, abu ayoŋ eŋolik ibore ŋini ekwaan ka ituŋanan ebunit eyai kidiŋ ŋidouwon. Abu iŋes tolot neni a ŋolo iboi ŋikaru ka ŋikaru ka aponi yaarae iŋes neni ayai ŋolo iboi ŋikaru ka ŋikaru.

¹⁴Aponi inakinae iŋes apukan ka apolou ta arwosiyo, ikotere itiyanakineta iŋes ŋituŋa daadaŋ, ŋakwapin ka ŋituŋa ŋulu irworosi ŋaŋajepa ŋuna egelegelya. Erae apukan keŋ ŋina a ŋikaru ka ŋikaru, ŋina nyedaun ka nyemunaaryo apukan keŋ.”

¹⁵Tolimu Daniel tema, “Ani eruwor ayoŋ, eryaŋakina etau kaŋ, eketubulito ayoŋ ŋakiro ŋuna abu ayoŋ eŋolik anakiruja.

¹⁶Abu ayoŋ olot neni a epei a ŋolo awoi a nen ka eŋit iŋes apolou a ŋakiro a ŋun a daadaŋ. Aŋun, abu iŋes okolimok ayoŋ atemar eketeyenikini apolou a ŋakiro a ŋun, ido abu tema,

¹⁷‘Itoodiunito ŋityaŋ ŋuluomwon ŋul, ŋirwosi ŋiomwon ŋulu moi eruwor ŋikepukak anakwap.

¹⁸Nai ijaarete ŋituŋa ŋulu ka Akuj a ŋina alokidiama nooi apukan kituruwosi ŋina kec ŋikaru ka ŋikaru, kire jik eruwor apukan ŋina kec ŋikaru ka ŋikaru.’

¹⁹“Abu ayoŋ eitan ayenun ŋuna a kire ŋuna a etyaŋ a ŋolo a ŋiomwon, a ŋolo agelaana aneni a ŋityaŋ a ŋuluce a daadaŋ, arae etyaŋ ŋol ŋolo ikitubuli nooi ite, ayakar etyaŋ ŋol ŋikyal ŋulu arae ŋasuwa ka ŋimeeger ŋulu arae eburonis ŋulu anyamya iŋes ibore enyilinyili icakit ŋanyile;

²⁰abu daŋ ayoŋ eitan ŋuna a ayenun a ŋamomwar a ŋunatomon a ŋuna aya nakou keŋ ka amomwara ŋinace ŋina arupuni ekaku, ido toditarae ŋamomwar ŋunauni, amomwara ŋina ayakar ŋakonyen ka akituk ŋina erworo ŋakiro ŋuna ka akituro, ŋina asibit iŋes apol akilo ŋunace.

²¹Ani eriŋa ayoŋ ete, abu eŋolik amomwara ŋin itijikini ŋituŋa ŋulu ka Akuj, tosodi eloununui ikes,

²²apotu ŋun kitiyas akitodol ŋina abunio ŋolo iboi ŋikaru ka ŋikaru, ŋolo abu totub ŋakiro eikinit ŋituŋa ŋulu ka Akuj a ŋina alokidiama nooi, tosodi abu todol apaki ŋina aponiata ŋituŋa ŋulu ka Akuj toruworos ŋikepukak.”

²³Apolou a ŋakiro a ŋuna abu iŋes okolimok ayoŋ iŋes na, “Itoodiunit etyaŋ ŋolo a ŋiomwon atemar, eyakaun nakwap apukan ŋina a ŋaomwon, apukan ŋina egelaana anapukasinei a daadaŋ, emunyari iŋes akwap daadaŋ, ipudaari akwap daadaŋ ka ielielaari a ŋapeipei.

²⁴Itoodiunito ŋamomwar ŋunatomon atemar, anapukan a ŋin, eyakaunosi ŋirwosi ŋitomon, ido ebuni nabo ece ekaku a ŋulutomon a ŋul. Egelaaniar ŋol aneni a ŋuluŋorok, ido ilouni iŋes ŋirwosi ŋiuni.

²⁵Irwori iŋes eremokino Akuj ŋina alokidiama nooi, enipori iŋes ŋituŋa ŋulu ka Akuj a ŋina alokidiama nooi, ikatakini iŋes akilocokin ŋapakio ŋuna a ŋasuban ka ŋikisila. Einakinio ŋituŋa ŋulu ka Akuj napedor keŋ ekaru epei, ŋikaru ŋiarei, atutubet a ekaru.

²⁶Nai eyakaun eikiiko ŋolo etubere ŋakiro, tosodi elemaryo apukan aneni keŋ ka emunaaryo apukan keŋ jik.

²⁷Einakinio nakan a ŋituŋa a ŋulu ka Akuj a ŋina alokidiama nooi arwosiyo ka apukan ta apolou nooi a ŋakwapin a daadaŋ anakwap. Eruwor apukan kec ŋina a ŋikaru ka ŋikaru, tosodi itiyanakinete ka iwuapete ŋituŋa a ŋapukasinei a daadaŋ ŋakiro kec.”

²⁸Ŋakiro daadaŋ ikes ŋun ŋuna aponi okolimokin ayoŋ apolou kec. Ani eruwor ayoŋ Daniel, apotu ŋatameta kaŋ eketubulo ayoŋ nooi, ido abu ereet kaŋ kilocokin, nai abu ayoŋ eric ŋakiro daadaŋ alotau kaŋ.