Read ngakarimojong Bel. Ep. 1 Bible Online

Bel. Ep. 1 - ngakarimojong bible

Bel. Ep. 1

¹Apaki ŋina atwania erwosit Asitayages ikwapei atapapaa keŋ, abu Kirus ŋolo a Perisia kilunyokin lokicoloŋ keŋ kipuka.

²Arae Daniel erukitos a erwosit ka arae ituŋanan ŋini etopolooritae akilo ŋikonei a erwosit daadaŋ.

³Ayakatar apaki ŋin, Ŋibabiloniyae etorube a akuj a ŋina anyaritae Bel, ido a ŋinakoloŋit alemununeete ikes aŋuna a Bel ŋiguniyae ŋulu a ŋakirya a ŋuna ajokak ŋitomon ka ŋiarei ka ŋamesekin ŋatomoniomwon ta ŋilitae amiat ka ŋatomoniarei ŋulu a epiini.

⁴Etopoloorit erwosit Bel ka alosenene a ŋinakoloŋit akilip neni keŋ. Nai elipi Daniel neni a Akuj keŋ. Aŋun, abu erwosit kiŋit Daniel tema, “Kaanukiro nyilipenenea iyoŋ neni a Bel?”

⁵Toboŋok Daniel tema, “Nyetopoloorit ayoŋ ŋakujo ŋuna erae ŋituŋa itiyaunito, nai Akuj ŋina eyari, ŋina asubuni nakuj ka akwap ka iŋes asubuni ŋisubuna ŋulu eyarete daadaŋ.”

⁶Kiŋit erwosit Daniel tema, “Nyitami iyoŋ atemar erae Bel akuj ŋina eyari a? Nyite iyoŋ neni etya akimuj ŋina imuji iŋes ka neni etya ibore ŋini emasi iŋes a ŋinakoloŋit a?”

⁷Tokyeni Daniel, tema, “Toceite nyikimodikin, okoe erwosit, anerae erae ibore en ŋalup bon alotooma ka eburonis alokiŋa, ido nyimuja ka nyemata iŋes idiobore.”

⁸Abu nai erwosit toŋo, ido tonyara ŋisacaradotin a Bel, tolimok ikes tema, “Ani pa kikilimokis iyes ayoŋ ituŋanan ŋini imuji akimuj daadaŋ ŋina elemununuyo aŋuna a Bel, itwakete iyes.

⁹Nai ani kitogogoŋ iyes atemar Bel iŋes enyamenene ŋamuja ŋun, etwani Daniel, anerae eyeny iŋes Bel.” Tolimok Daniel erwosit tema, “Kimyek kitiyae lopite ŋolo ilimunio iyoŋ.”

¹⁰Ayakasi nen ŋisacaradotin a Bel ŋatomonikanikaarei pa imaritae ŋaberu kec ka ŋidwe kec. Aŋun apotu erwosit torukosi ka Daniel kai a Bel.

¹¹Tolimut ŋisacaradotin a Bel temasi, “Kiŋolikisi, elosio tokona isua kiŋa. Okoe erwosit, kitemok iyoŋ elope akimuj ka epiini, ido togolok epuke, kipucak emacar a ekaboboot kon nen.

¹²Ani iboŋuni iyoŋ moi taparacu ŋisaae ŋulu ka apaaran, ido ani pa kiryamu iyoŋ atemar kirika Bel akimuj ŋin daadaŋ, etwakyo isua, nai etwani Daniel ŋolo irworo alyokonu aŋuna kosi.”

¹³Pa amisito ikes, anerae ewuakinito ikes epuke ŋolo pa atakani kwap emesa neni etoreneneete ikes a ŋinapaki alomarya tooma kai a Bel akirikar akimuj ŋina alemununuyo aŋuna a Bel.

¹⁴Kedaut ikes alomar kiŋa, abu erwosit kiwuak nen akimuj aŋuna a Bel. Tolimok nai Daniel ŋiketiyak keŋ alemun ekuron kipurupurakis kai a Bel daadaŋ apaki ŋina araakar erwosit bon arukito ka ikes. Tolomasi nai ikes daŋ kiŋa, togolokis epuke kipucakis emacar ŋolo a ekaboboot a erwosit nen, toloto nai.

¹⁵Ani nakwaare, apotu ŋisacaradotin ikwaŋinapei sek aponeneata, potu kaapei ka ŋaberu kec ka ŋidwe kec, kirikasi ka toŋobasi ibore daadaŋ!

¹⁶Ani taparacu tonyou erwosit bu torukut ka Daniel.

¹⁷Kiŋit erwosit Daniel tema, “Daniel, nyetakanara ba ŋakipuceta?” Toboŋok Daniel tema, “Okoe erwosit, nyetakanara!”

¹⁸Aŋaar ŋipukei bon, kiŋoliya erwosit lomesa, ido kiworou nooi tema, “Okoe Bel, ipol iyoŋ nooi ka emam amodiyo aneni kon jik!”

¹⁹Nai tokyeni Daniel, tolimok erwosit nyeloma tooma kai. Tema, “Kiŋolik kwap a akai, ido toyenu atemar ŋulu ataŋae ŋikukus a ŋakejen lu?”

²⁰Tema erwosit, “Ete ayoŋ ŋikukus a ŋakejen a ŋikilyok, a ŋaberu ka a ŋidwe.”

²¹Toŋo nai erwosit toresiyar, toroc ŋisacaradotin daadaŋ kaapei ka ŋaberu kec ta ŋidwe kec. Apotu nai ikes kitoodikis erwosit ŋipukei ŋulu emunonitae ŋulu etoreneneete ikes elomarete kai akirikar ibore daadaŋ ŋini ewuanakinio lomesa.

²²Aŋun, abu erwosit toar ikes, ido kipotok Bel neni a Daniel a ŋolo abu tobwaŋabwaŋaya etorube ŋol ka kinyasu akai a Bel daŋ.

²³Ayai nakibois ŋin Epiu ŋolo abur nooi, ŋolo etopoloorito Ŋiburaniyae.

²⁴Tolimok erwosit Daniel tema, “Nyipedori iyoŋ atemar nyerae na akuj ŋina eyari, aŋun, kilip neni keŋ.”

²⁵Tema Daniel, “Elipi ayoŋ neni a Ekapolon Akuj kaŋ, anerae erae iŋes Akuj ŋina eyari.

²⁶Nai tocamakinae ayoŋ, okoe erwosit, ido oar ayoŋ Epiu emam ekileŋ, kori abiro.” Tema erwosit, “Akacamak ayoŋ iyoŋ.”

²⁷Tolemu nai Daniel akimyet, asepwae ka ŋitim, ido kidorok ikes daadaŋ kitiyaunia ŋimugati ŋulu abobok ŋulu abu iŋes inak Epiu kimuj. Abu Epiu kimuj ŋimugati ŋul, ido toduwok akook keŋ toŋaar. Tema nai Daniel neni a erwosit “Kiŋolik ibore ŋin sek ilipi iyoŋ neni keŋ!”

²⁸Ani iirarete Ŋibabiloniyae ŋakiro ŋun, apotu toŋoa nooi, ido totukut akiar erwosit, ebasi, “Aruwor erwosit Eyudayat, amunaiya erwosit Bel, aar Epiu ka aŋol ŋisacaradotin.”

²⁹Ani elosete ikes neni a erwosit, temasi neni keŋ “Inakinae isua Daniel, ani kemam, ikiaryo isua iyoŋ ka ŋituŋa a ekal kon daadaŋ.”

³⁰Abu erwosit toanyu atemar iimunito ŋituŋa neni keŋ ka agogoŋu, ido alotooma akitiŋakinit iŋes ainakin ikes Daniel, abu kipotok Daniel neni kec.

³¹Apotu Ŋibabiloniyae kimasakis Daniel nadui a ŋiŋatunyo, kiriya Daniel a nen ŋirwa ŋikanikapei.

³²Ayakasi ŋiŋatunyo ŋikanikaarei nadui ŋin, ido a ŋinakoloŋit ainanakinio ikes ŋituŋa ŋiarei ka ŋamesekin ŋaarei, nai apaki ŋina emasakinere Daniel nen, mam ibore sek ainakinitae ikes akinyam, ikotere eryetarete ikes Daniel.

³³Apaki ŋin, ayai ekadwaran Abakuk Yudaya, kebu iŋes kipou ŋapoko, ido tonyilinyilak amugati nabakuli, acamit iŋes alosit lomanikor ainar akimuj ŋin neni a ŋulu alemete ŋikinyom.

³⁴Nai abu emalaika a Ekapolon tolimok Abakuk tema, “Ya akimuj ŋina iyakar iyoŋ ŋin Babilon neni a Daniel a ŋolo eyai nadui a ŋiŋatunyo.”

³⁵Tema Abakuk, “Ekapolon, ŋinapei nyiŋolikina ayoŋ Babilon ka nyayeni ayoŋ ŋuna a adui a ŋiŋatunyo.”

³⁶Abu nai emalaika a Ekapolon totiŋ Abakuk anakou todaka iŋes etiŋit ŋitim ekeri esibit ekuwuam, kiwuak iŋes Babilon, kidiama adui a ŋiŋatunyo.

³⁷Kiworou nai Abakuk tema, “Daniel, Daniel, kijaa akimuj ŋina ikiyakik iyoŋ Akuj.”

³⁸Tema Daniel, “Okoe Akuj, ikitamu iyoŋ ayoŋ ka nyimyekina iyoŋ ŋulu ikiminasi iyoŋ.”

³⁹Aŋun tonyou Daniel, ido kimuj, ŋinapei paki kinyaka emalaika a Akuj Abakuk nakibois ŋina sek ayaunia.

⁴⁰Ani edolete ŋirwa ŋikanikaarei, bu erwosit akigwor aŋuna a Daniel. Ani edoluni iŋes nadui a ŋiŋatunyo, toripiya tooma, kiŋolik Daniel iboi.

⁴¹Kiworou erwosit nooi tema, “Okoe Ekapolon, Akuj a Daniel, ipol iyoŋ nooi ka emam Akuj ace eyai mati iyoŋ.”

⁴²Abu nai erwosit kiriu Daniel kiŋa, kimasak nadui a ŋiŋatunyo ŋulu sek acamito akiar Daniel, ido apotu ŋiŋatunyo kirikasi ikes ite erwosit.