Read ngakarimojong Osea 10 Bible Online

Osea 10 - ngakarimojong bible

Osea 10

¹Ikwaan ŋituŋa a Isirael ka ekitoe a epiini ŋolo elyaarito ŋaten neni alwanan, ŋolo eraunene ŋaraito ŋuna alalak nooi, ani elalakunete ŋiletok kec, tolalata ŋamuroeta ŋuna edukete ikes. Ani elalauni abaru anakwap kec, kitalalata ikes ŋipirin ŋulu erae ŋakujo kec.

²Aŋun, ileleba alyokonu lotai kec, aŋun emaikina tokona ikes kidaŋidaŋa ekaile ŋolo ka asecit kec. Ebwaŋabwaŋaari Ekapolon ŋamuroeta kec tomunaa ŋipirin kec.

³Etemarete nai ikes, “Emam isua erwosit, anerae nyikitopoloorit isua Ekapolon. Ani mono kerae toyakare isua erwosit, kepedo mono iŋes akitiyakin nyo aŋuna kosi?”

⁴Irworosi ikes ŋakiro ŋuna nyitiyakinite, ikoŋete ikes alyokonu, ido tocamunos. Aŋun, alalaar akisitanakin a ŋakiro a ŋunacaryo, lopite ŋolo epetakinor edowan neni itatae.

⁵Ebuli ŋituŋa ŋulu iboiyete alo Samaria aŋuna a etorube a itaok, a etorube a ŋolo eyai Bes-Apen. Igworete ŋituŋa a Samaria aŋuna a etorube a ŋol igworete ikes kaapei ka ŋisacaradotin ŋulu ilipete ka itopoloorito etorube ŋol, elemaryo iŋes aneni kec yaarae nakwap ace.

⁶Eaaryo etorube ŋol Asiriya, ikwapei ocur neni ke erwosit a ŋolo apolon. Isirumio ŋituŋa a Epuraim ŋileec ka irumete ŋituŋa a Isirael ŋileec aŋuna a etorube a ŋolo ka akuj kec.

⁷Eŋopiyari erwosit ŋolo a Samaria, lopite ŋolo eŋopiyarya inyilet a akitoe anakipi.

⁸Emunaaryo ŋakiboisyo ŋuna aoyak ŋuna eya Apen, ŋakiboisyo ŋuna aponeta Ŋisirael toseceta. Erupunete ŋinya ka ŋikukwa anamuroeta kec. Etemarete ikes neni a ŋimoru, “Kiwuae isua” ka etemarete ikes neni a ŋikamukumukui, “Toritaunosi neni kosi.”

⁹Okoe Isirael, ŋinapei alorwa a ŋulu iyakatar iyes Gibea, irubakis iyes iseceneneete. Nyikirukauni mono iyes ejie, iyes ŋulu itiyaete aronis alo Gibea a?

¹⁰Abuni ayoŋ akisican ikes apaki ŋina acamitor, ecunakinosi ŋituŋa a ŋakwapin akitijikin ikes, eenete ŋimoe kec ikes aŋuna a ŋasecisya kec a ŋunaarei. [3]

¹¹Ikwaan ŋituŋa a Epuraim ka ibarasit ŋini aponi kitatamae tominak akiram ŋikinyom, abu ayoŋ emyek emosiriŋ keŋ emam ibore eposit. Nai aenikini ayoŋ ayokot neni a ŋituŋa a Epuraim kitiyata etic ŋolo agogoŋon nooi, nai emaikina ŋituŋa a Yudaya kitata, emaikina ŋituŋa a Isirael kikwara ŋalup.

¹²Kitiyata aŋuna kus ŋiticisyo ŋulu ka akiyookino, toyakaunotor amina ŋina nyiryaŋiryaŋa. Kikukorikisi ŋimanikorin kus ŋulu idaut iyes akitare, anerae adol apaki ŋina emaikina iyes kiwaryata Ekapolon, ikotere iŋes ebuni ainakin iyes ŋarereŋisyo ŋuna ka akiyookino.

¹³Ipotu iyes kiwuakis lotai kus aronis, ido ipotu iyes toryamut ŋuna nyiyookino, idaut iyes aryamun akisicanet aŋuna ka alyokonu kus. Aŋuna iponiata iyes kikinyoma agogoŋu kus a ŋikulepek ka neni a ŋasigarya kus a ŋuna alalak,

¹⁴ebuni ejie neni a ŋituŋa kus ka emunaaryo ŋaduketa kus ŋunajiet daadaŋ, lopite ŋolo amunaarya Saliman etaun ŋolo enyaritae Bes-Aribel akoloŋit ŋina ke ejie, apaki ŋina amunyarere ŋaberu kaapei ka ŋidwe kec.

¹⁵Okoe Besel, itiyakinio ŋun neni kon daŋ, anerae epol nooi aronis kon. Elemaryo erwosit a Isirael akoloŋit ŋin iwalari akwap.