Read ngakarimojong Osea 12 Bible Online

Osea 12 - ngakarimojong bible

Osea 12

¹Erae ŋakiro daadaŋ ŋuna itiyaete ikes ŋakoŋinae, iwuapito ikes ŋipitesyo ŋulu ka abaŋao apaaran jwii. ido iasete alyokonu ka aryenyeo neni kec, acamunosi ikes ka ŋituŋa ŋulu ka Asiriya, ido iwokonorete akimyet Ijipit.

²Isitakinit Ekapolon ŋituŋa a Yudaya ka isicani ŋituŋa a Isirael aŋuna a ŋakiro a ŋuna iwuapito ikes, isicani Akuj ikes aŋuna a ŋakiro a ŋuna itiyaete ikes.

³Ani eriŋa Yakob eyai nakook a toto keŋ, abu kikamu atotinyo alokaato keŋ ka ani eruwor iŋes ekile, abu kisilek Akuj.

⁴Abu Yakob kisilek emalaika tari ŋina elounia, abu kigwor, kiŋit emalaika akiterereŋ iŋes. Abu Yakob kiryamunos ka Akuj ka kirworo ka iŋes alo Besel.

⁵Arae ŋin Akuj Ekapolon ŋolo etiron, erae ekiro keŋ Ekapolon.

⁶Nai ani eruwor iyes, toboŋosi neni ka Akuj kus, kitiyata jik ŋuna iyookino ka ŋuna ka amina, ka torubakisi idarito Akuj kus.

⁷Ikwaan ŋituŋa a Isirael ka ikecurutan ŋini isitiyaete ŋakipimeta ŋuna nyiyookino, emina iŋes akiimakinit ŋuluce.

⁸Alimu Epuraim ebe, “Aa! Abar ayoŋ, aryamu ayoŋ abaru aŋuna kaŋ a elope, aloboro a daadaŋ a ŋulu aryamu ayoŋ, mam aronis adio erukaun aneni kaŋ ŋina asecitor ayoŋ.”

⁹Arae ayoŋ Ekapolon Akuj kus ŋina abu okoyau iyes anakwap a Ijipit; ekemyekini ayoŋ iyes kiboiyoto nabo aloeemae, lopite ŋolo itiyaeneneeta iyes apaki ŋina a ŋasuban a ŋuna emaikina kitiyaneneete.

¹⁰Abu ayoŋ erwor aneni a ŋikadwarak, abu etoodyanak ikes ŋakiro ŋuna alalak anakirujaeta, abu ayoŋ olimok ŋituŋa ŋakiro kaŋ aneni a ŋikadwarak.

¹¹Eyai asecit lotuŋa a Gilead, kire jik, emunyaryo ikes. Eareneneo ŋimoŋin erae ŋamuronisya alo Gilgal, aŋun, ikwaanikinosi ŋamuroeta kec ka ŋatukon a ŋamoru ŋuna etukitoe lomanikorin.

¹²Abu Yakob tosi nakwap ŋina ka Aram, abu kitiya a nen aŋuna ka aryamunia aberu, abu kiyok ŋamesekin aŋuna ka aryamunia aberu.

¹³Abu Ekapolon kisitiya ekadwaran ayaun Ŋisirael alo Ijipit ka abu Akuj kisitiya ekadwaran akiyokuunio ikes.

¹⁴Etiyata ŋituŋa a Epuraim aronis ŋina ailiilon nooi, aŋun, ebuni Ekapolon kec akisican ikes aŋuna a ŋituŋa a ŋulu apotu ikes toara, isicani Ekapolon ikes aŋuna a ŋiyany kec.