Read ngakarimojong Osea 13 Bible Online

Osea 13 - ngakarimojong bible

Osea 13

¹Ani paaran sek irworikinete ŋituŋa a Epuraim, abulenene Ŋisirael ŋuluce ka etopoloorito Ŋisirael daadaŋ ikes, nai apotu ŋituŋa a Epuraim toseca aŋuna elipyata neni a Baal, aŋun, etwakete ikes.

²Arubakis tokona ikes eseceneneete, itiyaununeete ŋiboorei a ŋasuwa, ido kilipa neni kec, itiyaununeete ŋitorubei a ŋakujo a esilipa lopite ŋolo eyeniata ikes, erae ŋituŋa ŋulu eyenete akitiya ŋiboro ejok ikes itiyaununeete ŋakujo ŋun, ido ebasi ŋituŋa a Epuraim, “Oinakisi ŋamuronisya neni a ŋakujo a ŋun!” Enuyete ŋituŋa ŋul ŋitorubei a ŋitak.

³Aŋun, ikwaanikinosi ikes ka ekuno ŋolo ka ataparacu, kori ŋakopi ŋuna eŋopiyarete atipei eriŋa ataparacu, ikwaanikinosi ikes ka ŋamilo ŋuna ekutari ekuwuam analos, kori apuru ŋina ipwororit alodirisa.

⁴Nai arubakinit ayoŋ arae Ekapolon Akuj kec, ageun ŋinapei anakwap a Ijipit, mam ŋakujo ŋace eyenete ikes mati ayoŋ bon, emam ekaiunan ece mati ayoŋ bon.

⁵Arae ayoŋ etani ikes analoŋisat, anakibois a ŋina aonon.

⁶Ŋina esimuja ayoŋ ikes, apotu ikes kimwoko, nai apotu ikes kiturokinos, tosodi tojoŋoto atamunit ayoŋ.

⁷Aŋun, alosi ayoŋ etijik ikes a adedeŋu ikwa eŋatuny, adapuni ayoŋ ikes alorot ikwa eris.

⁸Agirakin ayoŋ ikes lopite ŋolo egirakinor etyaŋ ŋolo adedeŋan ituŋanan, kori etyaŋ ece ŋolo ecamit ademar iŋes ŋitak keŋ ka apunori ayoŋ ŋakookyes kec, erikari ayoŋ ikes lopite ŋolo irikarya eŋatuny etyaŋ ŋolo eari, kori lopite ŋolo enyilinyiliyarya etyaŋ ŋolo adedeŋan ityaŋ ŋini earit.

⁹Okoe ŋituŋa a Isirael, akamunyari ayoŋ iyes, ŋae nai ikiuni iyes?

¹⁰Ai bo tokona eyai erwosit kus ikotere ikiuni iyes? Ai eya ŋikapolok alotaunio kus a daadaŋ, ŋulu sek ibasi iyes ayoŋ, “Inakinae isua erwosit ka ŋikepukak.”

¹¹Abu ayoŋ okoinak iyes erwosit anaŋoit kaŋ, ido abu olema iŋes ananyunyura kaŋ.

¹²Idyasitae aronis a ŋituŋa a Epuraim, igiritae ŋasecisya kec lokitaabo.

¹³Ikwaan ŋituŋa a Isirael ka ikoku ŋini eryeba toto keŋ aŋuna ka akidoun, nai ikwaan ikes ka ikoku ŋini eriŋa eyai nakook a toto keŋ, ŋini nyeos, ido tari kedol apaki ŋina idounere iŋes, towounite alomun kiŋa anakook a toto keŋ.

¹⁴Alakuni ayoŋ ikes anapedor a ŋina ka akibois a ŋikatwak nyalakuni ayoŋ ikes anatwanare. Okoe atwanare ai eya ŋakicanicaneta kon? Okoe akibois a ŋikatwak, ai eyai akinyasun kon? Nyesyonikini ayoŋ ŋituŋa lu jik!

¹⁵Tari kelalata ŋituŋa a Isirael aneni a ŋikaitotoi kec, eyakuuni ayoŋ ekuwuam bu alo Kide, ebuni ekuwuam ŋolo ke Ekapolon analoŋisat itooni ekuwuam ŋol ŋiitan kec ka ŋakare kec, epyaari ekuwuam ŋol ibore ŋini ajokan daadaŋ anakwap kec.

¹⁶Isicanio ŋituŋa a Samaria aŋuna ka asecit kec anerae aŋero ikes Akuj kec, earyo ikes a ekileŋ, enyilinyiliyaryo ŋawat a ŋidwe kec ka epunonoryo ŋakookyes a ŋaberu kec a ŋuna epotiyete.