Read ngakarimojong Osea 5 Bible Online

Osea 5 - ngakarimojong bible

Osea 5

¹“Kiirasi ŋakiro nu, iyes ŋisacaradotin! Topupokisi, okoe ŋituŋa a Isirael! Kiirasi, okoe ŋituŋa a erwosit! Ebunit atubokino neni kus; anerae iruworosi iyes aloc alo Misipa ka atibait ŋina elokitae lomoru Tabor

²ta akipany ŋina ebokitae ecukul nooi Sitim; nai esicani ayoŋ ikes daadaŋ.”

³Ayeni ayoŋ Epuraim, nyeŋopit Isirael aneni kaŋ; anerae tokona, okoe Epuraim, itiya iyoŋ ŋuna ka amalao, nyeriŋa Isirael eyakar asegis.

⁴Nyepedorete ŋiticisyo kec akitoboŋor ikes neni ka Akuj kec, anerae ileleba neni kec etau ŋolo ka amalao ka nyeyenete ikes Ekapolon.

⁵Elimorit akituro a ŋituŋa a Isirael ŋuna etubokinere ikes. Emarani Epuraim alokaile a ŋolo ka asecit keŋ, emarani Yuda daŋ kaapei ka Epuraim.

⁶Elosete ikes akiwaarit Ekapolon emeto ŋamesekin ka ŋaatuk, nai nyeryamunete ikes Ekapolon, emyek Ekapolon ikes.

⁷Etiyata ikes neni ke Ekapolon emam akikinyomit, anerae aryamununut ikes ŋidwe ŋulu euriyo pa eyenio atapapa kec, emunyaryo ikes itiyaete ŋasuban ŋuna ke elap a ŋolokitete, ikes kaapei ka ŋimanikorin kec.

⁸Tokutakisi amomwara alo Gibea, tokutakisi arupepe alo Rama, toramakisi eli alo Bes-Apen, iyes ŋikilyok ŋulu a Benjamin, toloto lojie.

⁹Akoloŋit ŋina ka atubokino, eruwor Epuraim ereŋorot. Alimu ayoŋ ŋuna erae kire neni a ŋikabilae a Isirael.

¹⁰Ekwaanikinosi ŋikapolok a Yudaya ka ŋituŋa ŋulu elemanarete ŋamoru ŋuna ipimitere ŋalup a ŋituŋa a ŋuluce, ebwaliyari ayoŋ ikes a anyunyura kaŋ lopite ŋolo ikibwaliyareta ŋakipi.

¹¹Isicanitae Epuraim, amunaar iŋes anatubokino anerae atenikinit iŋes akiwuarit akiŋarakino aneni a ŋakujo aŋuna nyepedorete akiŋarakin.

¹²Aŋun, enyaadiyari ayoŋ ŋituŋa a Epuraim lopite ŋolo inyaadiyareta ŋikur ibore ŋini ebosit, enyasuni ayoŋ ŋituŋa a Yudaya lopite ŋolo inyasunia abosis ibore.

¹³Ani iŋolikini Epuraim atemar edyaka iŋes ka ani iŋolikini Yudaya ŋajemei keŋ, abu Epuraim tolot Asiriya akiŋita akiŋarakino aneni a Yereb a erwosit a ŋolo apolon. Nai abu erwosit ŋol nyepedo akitaŋaleun Epuraim, kori akitiiyor ŋajemei a Yudaya.

¹⁴Aryanyaanikini ayoŋ Epuraim lopite ŋolo eryenyaania eŋatuny ka Yudaya lopite ŋolo eryenyaania itaok a eŋatuny. Ayoŋ elope amunyari ikes, ido emyek a nen, ani kariko ayoŋ ikes, mam ituŋanan epedori aiun ikes.

¹⁵Aboŋori ayoŋ nabo nakibois kaŋ tari ŋina eyenuniata ikes atemar esecito, ido kiwara akiŋarakino aneni kaŋ. Alotooma akiyaloloŋ kec, epote ikes anacamit a ŋina a kire akiwarit ayoŋ.