Read ngakarimojong Osea 6 Bible Online

Osea 6 - ngakarimojong bible

Osea 6

¹Apotu ŋituŋa temasi, “Potu, oboŋosi neni ke Ekapolon, anerae iŋes ŋolo abu ikiwan iwon, iŋes pei epedori akitaŋaleun iwon. Ikida iŋes iwon, ido iŋes pei epedori akimad ŋajemei yok.

²Kelunyar ŋirwa ŋiarei, ikitojokukini iŋes iwon nabo, kelunyar ŋirwa ŋiuni ikiteyaruni iŋes iwon ikotere ikiyari alokiŋaren keŋ.

³Oyenutu, omunikisi jik ayenun Ekapolon, kire jik, etakanuni iŋes, lopite ŋolo iwalanarya akwap, ebuni iŋes neni yok, lopite ŋolo eponiata ŋakipi alokidiama, ebuni iŋes neni yok, lopite ŋolo ilimia akiru iceere kitapalal akwap.”

⁴Abu Ekapolon tema, “Anukiro etiyakini ayoŋ neni kon, okoe Epuraim? Anukiro etiyakini ayoŋ neni kon, okoe Yudaya? Ikwaan amina kus ayoŋ ka ekuno ŋolo ka ataparacu, ikwaan amina kus ayoŋ ka ŋakopi ŋuna edaun eriŋa ataparacu.”

⁵Aŋun, abu ayoŋ ekeyakik iyes ŋikadwarak kaŋ alimokin iyes ŋakiro kaŋ ŋuna ka atubokino ka akinyasuno, aar ayoŋ ikes a ŋakiro a ŋuna adau ayoŋ alimun, ileere atubokino ŋina ayauni ayoŋ neni kus, ikwaan ka akica,

⁶anerae acamit ayoŋ aneni kus amina ŋina nyiryaŋiryaŋa, meere amuronot; acamit ayoŋ iyes itoyenut Akuj akilo ayaunun neni keŋ ŋainakineta ŋuna epeyo.

⁷Nai apotu ikes toŋero Acamunet kaŋ alo Adam, apotu ikes kitiyata neni kaŋ a nen emam akikinyoma.

⁸Erae Gilead etaun ŋolo a ŋituŋa a ŋulu itiyaete aronis, erae etaun ŋolo a ŋikaarak.

⁹Etukonoro ŋisacaradotin edapito ŋituŋa ikwa ŋikokolak ŋulu edapito ituŋanan idio. Earete ikes ŋituŋa a lorot a ŋolo elosere Sekem, itiyaete ikes ŋuna aronok nooi.

¹⁰Eŋolik ayoŋ ŋakiro ŋuna aronok alotuŋa a Isirael, eyai amalao Epuraim, adau Isirael amunaar.

¹¹Ani eruwor iyes ŋituŋa a Yudaya, etemok ayoŋ apaki ŋinakisicanet iyes daŋ aŋuna ka aronis a ŋina itiyaete iyes. Apaki daadaŋ ŋina enyakakinia ayoŋ ŋuna ajokak neni a ŋituŋa kaŋ,