Read ngakarimojong Osea 7 Bible Online

Osea 7 - ngakarimojong bible

Osea 7

¹Apaki daadaŋ ŋina etaŋaleunio ayoŋ ŋituŋa a Isirael, ileereununui aronis a Epuraim ka ileereununete ŋiticisyo ŋulu aronok ŋulu itiyaete ŋituŋa a Samaria, anerae itiyaete ikes ŋuna ka amodiyo, ebwaŋabwaŋaete ŋikokolak ŋakais, edemanarete ŋikademak ŋituŋa ŋiboro alorotin.

²Nai nyeyenete ikes atemar atamunit ayoŋ aronis kec daadaŋ. Irikaunito ŋasecisya kec ikes, ido ileerete ikes aneni kaŋ, anerae eyakasi ikes kiŋaren kaŋ.

³Italakanarete ikes erwosit a ŋakiro aŋuna aronok aŋuna itiyaete ikes ka italakanarete ikes ŋikapolok kec a amodiyo kec.

⁴Erae ikes daadaŋ ŋulu emalaaka, ikwaan ikes ka ekeno ŋolo amwanan nooi, ŋolo nyemisit ekepon ŋamugati akikunyakin akim, ameun anapaki a ŋina emunaunia iŋes ŋakirya akitodol ŋina ebuunioto ŋakirya.

⁵Akoloŋit ŋina enumunumere ŋasuban ŋuna a erwosit, apotu ŋikapolok tomata epiini tomerakinos nooi erwosit daŋ tomerakin nooi, tobaŋaaniyasi kaapei ka ŋulu akyenatar iŋes.

⁶Emwaka ŋitai kec nooi anakituk akitiya ŋuna aronok, akuwar daadaŋ eduŋet aŋoit kec, nai ani iwalari akwap, tonoku ikwa akim.

⁷Emwaka ikes daadaŋ lopite ŋolo emwania ekeno, amunyasi ikes ŋikepukak kec. Aari ŋirwosi kec daadaŋ, nai mam ituŋanan ebuni akilip neni kaŋ aŋuna ka akiŋarakino.

⁸Enyalakin ŋituŋa a Epuraim ka ŋituŋa a ŋakwapin ekwaanikin Epuraim ka amugati ŋina nyekonit ewae epei,

⁹ademasi ŋigelae ikes agogoŋu kec, nai nyeyenete ikes, amojoŋa ikes apusyaketa ŋakyes kec nai nyeyenete ikes.

¹⁰Elimorit akituro a ŋituŋa a Isirael ŋuna etubokinere ikes, nai nyemisito ikes aboŋun neni ke Ekapolon Akuj kec, kori daŋ nyiwarito ikes Ekapolon aŋuna a ŋakiro a ŋun a daadaŋ.

¹¹Eporoporot Epuraim ikwa temeleudi ŋina imatimataarit. Eloseneneete ikes anyarare ŋituŋa a Ijipit akiŋarakin ikes, ido toloto nabo anyarare ŋituŋa ka Asiriya.

¹²Apaki daadaŋ ŋina elosyoto ikes nakwap adio, alokakini ayoŋ atibait kaŋ, ekamu ikes daadaŋ lopite ŋolo ikamunere ŋikeny. Esicani ayoŋ ikes apaki ŋina eirarya atemar acunakin ikes.

¹³Aca kec, anerae aoliyosi ikes aneni kaŋ! Ŋuna kec amunyaro, anerae akaŋero ikes ayoŋ! Kapedorit ayoŋ alakun ikes, nai irworosi ikes alyokonu eketoroniyarito ayoŋ.

¹⁴Nyekegworokinete ikes ayoŋ a ŋitai kec, nai iwololoete alokitaadae kec, ecunakin ikes iitanito ŋikinyom ka epiini, akaŋero ikes ayoŋ.

¹⁵Arae ayoŋ etatami ikes eturuwo ŋulu egogoŋ, nai eyeete ikes akitiya ŋuna aronok neni kaŋ.

¹⁶Ewuapakis ikes ŋakujo ŋuna nyepedorete akiŋarakin ikes ekwaanikin ikes ka ekaleŋeleŋet ŋolo ipelesiyar nariet, earyo ŋikapolok kec a ekileŋ a ŋuna a ŋakiro a ŋuna aronok a ŋuna irworosi ikes. Epote Ŋijipitian akyenar ikes alo Ijipit.