Read ngakarimojong Yoel 3 Bible Online

Yoel 3 - ngakarimojong bible

Yoel 3

¹“Alorwa a ŋul ka anapaki a ŋin, ŋina enyakunia ayoŋ ajokis Yudaya ka Yerusalem,

²acunakini ayoŋ ŋakwapin daadaŋ, oyau ikes otiyaunor nakadipaalat ŋina Yeosapat (iŋes atemar erae Ekapolon ekatubon), esyaki atubonokin ikes a nen a ŋakiro a Ŋisirael a ŋituŋa kaŋ ke elope, anerae apotu ŋituŋa a ŋakwapin kielasi ŋituŋa kaŋ nakwapin, ido tokora akwap kaŋ Isirael.

³Apotu ikes kilamilama aŋuna a ŋituŋa kaŋ ayenunia ŋini eyai ŋirikon alojie. Apotu ikes togyelasi ŋidyain atacia ŋamalaae ka togyelasi ŋapesur atacia epiini ŋolo amasete ikes.

⁴“Nyo ikimanitotor iyes ayoŋ okoe Tiro ka Sidon ta ŋakiboisyo ŋuna a Ŋipilistin daadaŋ, inyaŋete iyes ŋadi neni kaŋ itiyaete ŋun a? Ani kinyaŋete ŋadi, eburuburakini ayoŋ akinyakakin iyes atipei pena nakyes kus ŋuna itiyaete iyes.

⁵Etiyae ayoŋ ŋun, anerae iyaasi iyes esilipa kaŋ ka egolid kaŋ, ido iwokosi ebari kaŋ nakais a ŋakujo kus.

⁶Igyelasi iyes ŋituŋa a Yudaya ka ŋulu a Yerusalem neni a Ŋigirik, iteakasi ikes anakwap kec.

⁷Nai tokona, etonyouni ayoŋ ikes kimyekis ŋakiboisyo ŋuna ipotu iyes togyelasi ikes, ido eketoboŋokini ayoŋ pena nakyes kus ŋuna ipotu iyes kitiyata.

⁸Agyelari ayoŋ ŋidwe kus ŋulusapa ka ŋulupesur neni a ŋituŋa a Yudaya, ido togyelasi ŋul ikes neni a Ŋisabean, nakwap ŋina alwanan nooi.” Ekapolon iŋes alimu ŋun.

⁹“Kiserata ŋakiro nu nakwapin: Kitemonokinos aŋuna ke ejie, kisimukekisi ŋikajiok. Tolimokisi ŋasigarya daadaŋ toapuut, tolimokisi kikomaut.

¹⁰Kityekutu ŋileŋia alomelekes kus ka ŋakwaaras aloboro a ŋulu iŋeryata iyes ŋinya; emaikina ŋini a ŋileleny tema, ‘Arae ayoŋ ekajion ŋolo agogoŋon.’

¹¹Kiwonyutu atipei, iyes ŋakwapin ŋuna iyakasi diyete ne daadaŋ, tocunakinos Yeosapat. Okoe Ekapolon, yau ŋikajiok kon nen,

¹²“Emaikina ŋakwapin tonyout ikes ŋakulepek, ido potu nakadipaalat ŋina a Yeosapat; anerae eboikin ayoŋ nen otubonok ŋakwapin daadaŋ ŋuna idunyatar Yudaya.

¹³Aroketa ŋituŋa nooi; Ekapolon, tolema ikes ikwa elemarere ŋimomwa alomanikor ŋirwa ŋulu elemere, kicak ikes lopite ŋolo icakere ŋaraito ke epiini eccuyo toleleya epiini.

¹⁴Kelalata, kelalata, ŋituŋa ŋulu eya nakadipaalat ŋina etubere ŋakiro! Aapuu adolun Akoloŋit ŋina etubio Ekapolon ŋakiro a nakadipaalat a ŋina etubere ŋakiro.

¹⁵Isiryonio akoloŋ ke elap, ido nyecaunete ŋikacer.

¹⁶Ipopolakini Ekapolon alomukura a ŋolo a Sion, egirokini etoil keŋ alo Yerusalem, ido emaranikinete nakuj ka akwap. Nai neni ke Ekapolon iŋes emecete ŋituŋa keŋ, neni keŋ eyakaun Ŋisirael pa iryaŋiryaŋasi.”

¹⁷“Aŋun, iyenunete iyes atemar, eboi ayoŋ Ekapolon Akuj kus alomukura kaŋ a ŋolo asegan. Eruwor Yerusalem akibois ŋina asegan, ido nyilounete nabo ŋituŋa ŋulugelae kidiŋ iŋes jik.

¹⁸“Akoloŋit ŋin, elomuni epiini ŋolo abobon alomukur, eleleunete ŋakile alomukur, ido elelearete ŋakipi alotai a ŋayona a Yudaya a daadaŋ; elomuni elelya alo Kai ke Ekapolon, toleleya nayonae ŋina enyaritae Sitim.

¹⁹“Eruwor Ijipit ereŋorot, eruwor Edom ereŋorot ŋolo erae aloŋisat itiyakin ŋun aŋuna ka aryenyeo kec a ŋina apotu ikes kitiyata lotuŋa a Yudaya, akwap ŋina aponiata ikes toaryata ŋituŋa ŋulu amam aronis itiyato.

²⁰Nai iboikinosi ŋituŋa Yudaya ŋikaru ka ŋikaru, ka iboikinosi ŋituŋa a ŋanyameta ka ŋanyameta Yerusalem.

²¹Ŋaokot ŋun ŋuna apotu ikes tobukosi, nyenyaŋari ayoŋ, esyoni ayoŋ ikes.” Iboikin Ekapolon Sion!