Read ngakarimojong Amos 5 Bible Online

Amos 5 - ngakarimojong bible

Amos 5

¹Tema Amos, “Okoe Ŋisirael, kiirasi ŋakiro nu ŋuna egworor ayoŋ aŋuna kus,

²amunaar akwap a Isirael, nyejokuni nabo jik, atwanikis ŋituŋa a Isirael nakwap kec pei, mam ituŋanan emitakinit.

³“Alimu Ekapolon Akuj ŋakiro nu ebe, ‘Etaun a Isirael ŋolo eŋaari ajore a ŋikilyok a aliput, eboŋunete ŋikilyok amiat make, ka ŋolo eŋaari ajore a ŋikilyok a amiat, eboŋunete ŋitomon bon.’

⁴Alimu daŋ Ekapolon ebe, ‘Toboŋutu neni kaŋ ikotere toyara,

⁵nai nyiloto Besel akilip, nyilomasi Gilgal, kori nyituborosi Beeriseba, anerae kire jik, erikoryo ŋituŋa a Gilgal nakwap ŋinagela ka emunaaryo Besel toŋopiya jik.’

⁶Toboŋutu neni ke Ekapolon ikotere toyara, ani pa kiboŋut iyes neni keŋ, ebuni iŋes neni a ŋiletok a Yosepu erirae aŋoit ikwa akim, emunaari iŋes Besel, mam ituŋanan ŋini iretakini aŋoit keŋ.

⁷Ekaŋ iyes ŋulu ilocete akiyookino toruwor ibore ŋini nyejok, iyes ŋulu itojokito aronis, iyes ŋulu imyekinito akitiya ŋuna iyookino!

⁸Ekapolon Akuj iŋes asubuni ŋikacer ŋuluuni ka ŋulu enyaritae ŋiremotom, iŋes ilocokini akuwar toruwor apaaran ka akuwar toruwor apaaran, iŋes iteleleiyari ŋakipi ananam neni eonit,

⁹iŋes inyasuni ŋituŋa ŋulu agogoŋok kinyasu tari ŋaduketa ŋunajiet.

¹⁰Iyes ŋulu itidiŋito ituŋanan ŋini isitakini ekasecan, iyes ŋulu iŋerito ituŋanan ŋini irworo ŋakiro ŋuna a kire,

¹¹aŋuna isicaniata iyes ŋikulyak, ido ilemanerete aneni kec ŋikinyom ka agogoŋu, tari kidukito iyes ŋakais kus a ŋamoru a ŋuna icietae ejok, nyiboikinosi iyes nakais ŋun; tari kidupito iyes epiini namanat ŋuna ajokak a ŋalup, nyimasete iyes epiini a ŋikito a ŋul.

¹²Kire, ayeni ayoŋ alalau a ŋasecisya kus ka epite ŋolo iseceneneata iyes a ŋinapaki; isicanete iyes ŋituŋa ŋulu iyookino, ijaanarete ŋakaluŋuluŋui, nyetubonokinio iyes ŋikulyak anakiyookino aloikiikoi kus.

¹³Ŋakiro ŋun iŋes ililiŋiata ŋituŋa ŋulu aosok, ŋulu itidiŋito iyes, anerae erae apaki na ŋina ka aronis.

¹⁴Kiwara ajokis meere aronis, ikotere iyarete, eyakaun Ekapolon ka iyes, lopite ŋolopei sek iyeniata iyes atemar irukito ka iŋes.

¹⁵Toŋero aronis, tominakisi ajokis, torubakisi itubonokinete anakiyookino ŋituŋa aloikiikoi kus. Acepaki isyoni Ekapolon ŋolo Etiron ŋituŋa ŋulu ka akwap a na ŋulu idoŋito eyarete.

¹⁶Aŋun, alimu Ekapolon Akuj ŋina a ŋajoresyo, Ekapolon ŋakiro nu ebe, ‘Iwololoete ŋituŋa analapatui a daadaŋ a ŋuna ke etaun ka alorotin a daadaŋ a ŋulu ke etaun ebasi, oitakoi, oitakoi! Enyaraunete ŋituŋa ŋul ŋiketak kigworo ka ikes, enyaraunete daŋ ŋulu eyenete akiwolol, potu kiwololoto.

¹⁷Eyakaun akiwolol lomanikorin ŋulu ke epiini daadaŋ, anerae abuni ayoŋ akisican iyes.’ ”

¹⁸“Ekaŋ iyes ŋulu iitanito akoloŋit ŋina ka Akuj! Anijokis iryamunete iyes akoloŋit ŋina ke Ekapolon? Eruwor akoloŋit ŋin ŋina ka akiryonut meere ŋina ka akica.

¹⁹Ikwaanikin akoloŋit ŋin ka ŋina ani keem ituŋanan kilany eŋatuny, kiryamunos ka etyaŋ ŋolo adedeŋan akilo, kori ani ieŋuni alokai keŋ erwaarit akan keŋ narwatata, tokony emun nakan.

²⁰Kire, erae akoloŋit ŋina ke Ekapolon ŋina ka akiryonut, meere ŋina ka akica, erae akoloŋit ŋina ka akiryonut ŋina emam akica.

²¹Aŋerit ka ajamuwarit ayoŋ ŋasuban kus, nyalakara ayoŋ apaki ŋina icunanakinotor iyes akinumunum ŋasuban kus.

²²Tari kiyaut iyes neni kaŋ ŋainakineta kus ŋuna epeyo ka ŋuna a ŋikinyom, nyacamuni ayoŋ ikes, tari ŋainakineta kus ŋuna ke ekisil nyeketalakarete ayoŋ.

²³Tojoŋoto aeore ŋieosyo kus ŋulu ieosi iyes icelasi anakilip kus, nyapupokini ayoŋ eruye a ŋaduŋgui kus.

²⁴Nai, torubakisi itiyaete ŋuna ajokak jwi jwi ka ŋuna iyookino jwi jwi.

²⁵“Okoe Ŋisirael, ani mono ŋikaru ŋatomoniomwon ŋulu iwuosyata iyes analoŋisat, ipotu mono iyes yaut neni kaŋ ŋamuronisya ka ŋainakineta a?

²⁶Mam! Nai tokona, iwokete iyes Sukus ŋolo ituruwosi iyes erwosit kus ka Kaiwan ekacerit ŋolo ituruwosi iyes akuj kus ka iwokete iyes ŋitorubei ŋulu ipotu iyes kiceut erae ŋakujo kus,

²⁷ekaku a ŋun, eketirikori ayoŋ iyes ŋituŋa, ikiya iyes nakwap ŋina eyai yaye Damasko.” Alimu Ekapolon ŋolo erae ekiro keŋ Akuj ŋina a ŋajoresyo ŋakiro ŋun.