Read ngakarimojong Amos 6 Bible Online

Amos 6 - ngakarimojong bible

Amos 6

¹“Ekaŋ iyes ŋulu iboiyete emam ŋace alo Sion ka iyes ŋulu iboiyete isilito ŋitai alomoru Samaria, iyes ŋarwonita ka akwap, iyes ŋulu eloseneneete Ŋisirael aryamun akiŋarakino!

²Toloto kiŋolikis etaun Kaline, a nen, toloto Amas lotaun ŋolo apolon, ido totiyaaros a nen, toloto Gas lotaun ŋolo a Ŋipilistin. Itamete iyes atemar igogoŋ iyes akilo ŋituŋa a ŋakwapin a ŋun a? Kori elal akwap kus akilo ŋuna kec a?

³Okoe iyes ŋulu iwounito acamun atemar ebunit akoloŋit ŋina ka akinyasuno, nai ŋuna itiyaete iyes itaapuunete akoloŋit ŋin.

⁴Ekaŋ iyes ŋulu iperete alokitaadae a ŋulu isibusitae a ŋikyal a ŋitome! Ekaŋ iyes ŋulu isaanaete alokicoloŋo a ŋuludupuk, tonyamete ŋikaalei ka ŋitak ŋulu anakunak.

⁵Iyes ŋulu ieosi ŋieosyo ŋulucaryo, ido iramete ŋaduŋgui lopite ŋolo etiyaa Daudi,

⁶iyes ŋulu imasete epiini a ŋabakulei, ido kiwosas ŋamyeta ŋuna akukunyok nai nyikinomorito ŋakiro ŋuna ka akinyasuno a ŋina ebunit neni a Ŋisirael.

⁷Aŋun, iyes isyaunete arikoro nakwap ŋinagela, ido edaun ŋasuban ka akisaanan kus.

⁸Adau Ekapolon Akuj alope akikoŋ nu ebe, ‘Nyacamit ayoŋ akituro a Ŋisirael, aŋerit daŋ ŋaduketa kec ŋunajiet, ido ainakini ayoŋ etaun a Ŋisirael ŋolo apolon ka ŋinibore daadaŋ eyai tooma keŋ nakan a ŋimoe kec.’

⁹“Ani kebucun ŋituŋa ŋitomon toŋopa alokai, etwakete.

¹⁰Ani kebu eyenet a ŋituŋa a akai a ŋin ŋolo enukenene ŋikatwak adakar ekatwan alokai, ido kiŋit eyenet ŋol ituŋanan idio ŋini eriŋa eŋopit alotooma akai tema, ‘Eyai ituŋanan ice irukitotor iyoŋ a?’ Eboŋokini ituŋanan ŋin tema, ‘Mam.’ Eboŋokini nai eyenet ŋol ebe, ‘Okoe, nyemaikina ekiro a Ekapolon tonyarae.’

¹¹Ŋina elimunio Ekapolon akirot keŋ, ielielaar ŋakais ŋuna apolok, inyaadiarosi ŋakais ŋuna cicik.

¹²Epedorete mono ŋaŋolei akiker alomukura a? Epedori mono ituŋanan akitare nanam a? Nai ilocokis iyes akitub ŋakiro anakiyookino, ituruwosi ibore ŋini aaran, ituruwosi iyes akiyookino ibore ŋini nyejok,

¹³ilelyanete iyes aŋuna ikamaryata etaun Lodebar, ido ibasi, ‘Erae agogoŋu kosi bon iŋes ekamarere isua etaun Karanim.’

¹⁴Alimu Ekapolon Akuj ŋina Etiron ŋakiro nu ebe, ‘Okoe Ŋisirael, ekesimani ayoŋ iyes ŋituŋa ŋulu ikitijikinete iyes, ikireunete ka ikisicanete ikes iyes ŋinapei alo Lebo-Amas tari nayonae ŋina eyai Araba.’ ”