Read ngakarimojong Amos 7 Bible Online

Amos 7 - ngakarimojong bible

Amos 7

¹Erae nu ŋakiro ŋuna abu Ekapolon Akuj ekesileerek ayoŋ: Abu ayoŋ eŋolik Ekapolon itemonokini emaase ŋolo alalan, kedaun akilem ŋikinyom ŋulu a erwosit, apaki ŋina elomuniata ŋikinyom ŋice.

²Ŋina adaunia emaase ŋol akirikar ŋakwii a ŋikito ka ŋinya anakwap a ŋin, abu ayoŋ ekalou otema, “Okoe Ekapolon, ekelipit, kisyoni ŋituŋa kon. Alipite eyaryata ŋiletok a Yakob? Epalag ikes.”

³Aŋakiro a ŋun, abu Ekapolon kimyek ŋuna sek acamit akitiya tema, “Nyitiyakin ŋun.”

⁴Abu nabo Ekapolon ekesileerek ayoŋ ŋakiro nu: Abu ayoŋ eŋolik Ekapolon itemonokini akim akisicania Ŋisirael. Abu akim ŋin tonom anam ŋina alotooma akwap ka abu tonom akwap daadaŋ.

⁵Abu nai ayoŋ ekalou otema, “Okoe Ekapolon, ekelipit, tojoŋo kareca! Alipite eyaryata ŋiletok a Yakob?”

⁶Aŋakiro a ŋun, abu Ekapolon kimyek ŋuna sek acamit akitiya tema, “Nyitiyakin ŋun daŋ.”

⁷Abu nabo Ekapolon ekesileerek ayoŋ ŋakiro nu: Abu ayoŋ eŋolik Ekapolon ewoi alodiyete arwatata ŋina kedukio ipimio a akipimet, atiŋit Ekapolon akipimet anakan keŋ.

⁸Tema Ekapolon neni kaŋ, “Amos nyo ite iyoŋ?” Oboŋok ayoŋ otema, “Ete ayoŋ akipimet.” Tema nai Ekapolon neni kaŋ, “Alosi ayoŋ etoodik Ŋisirael atemar nyipimara ejok ŋakiro ŋuna itiyaete ikes, nyesyoni nabo ayoŋ ikes jik.

⁹Emamukaun ŋituŋa anakiboisyo a ŋunamukur a ŋuna ilipyata ŋiletok a Isaka, inyasunio ŋakiboisyo ŋuna ilipyata Ŋisirael, aari ayoŋ ŋiletok a Yeroboam a ekileŋ.”

¹⁰Ekaku a ŋun, kiyakiya Amasia ŋolo arae esacaradoti alo Besel ŋituŋa neni a Yeroboam a erwosit a Isirael tema, “Atuku Amos ŋuna aronok aŋuna kon anepei a ne alokidiŋ Ŋisirael. Nyepedorete ŋituŋa akidaŋidaŋ ŋakiro keŋ daadaŋ,

¹¹anerae alimu iŋes atemar, earyo Yeroboam a ekileŋ, ido erikoryo Ŋisirael nakwap ŋinagela. ”

¹²Tema nai Amasia neni ka Amos, “Ekadwaran, tolot a ne, toboŋo nakwap a Yudaya, ikotere ikiinakin a nen akimuj aŋuna ka akidwar kon.

¹³Nyidwar nabo alo Besel, anerae erae Besel akibois ŋina ilipya erwosit ka daŋ erae neni eyai akai ŋina ilipyata Ŋisirael daadaŋ.”

¹⁴Toboŋok nai Amos ŋakiro ka Amasia tema, “Pa arae ayoŋ ekadwaran, kori lokoku a ekadwaran, nai arae ayoŋ ekeyokon ka ekepitan ŋikiya,

¹⁵ido abu Ekapolon okonyara ayoŋ anakiyok ŋakinei, okolimok ayoŋ tema, ‘Tolot todwar neni a ŋituŋa kaŋ a Ŋisirael.’

¹⁶Aŋun, tokona kiira akirot ke Ekapolon, ibala iyoŋ ebe ‘Nyidwar aŋuna a Ŋisirael ŋakiro ŋuna itoroniarito ikes ka nyilimonok ŋakiro ŋuna itoroniarito ŋituŋa ŋulu ka ekal a Isaka.’

¹⁷Aŋun, alimu Ekapolon ŋakiro nu ebe, ‘Eruwor aberu kon amalaat alotaun, ido earyo ŋidwe kon ŋulusapa ka ŋulupesur, ido tokorakinae akwap kon neni a ŋituŋa a ŋulugelae, itwani iyoŋ anakwap a ŋituŋa a ŋulu nyenupito Akuj, kire erikoryo Ŋisirael nakwap ŋinagela.’ ”