Read ngakarimojong Amos 8 Bible Online

Amos 8 - ngakarimojong bible

Amos 8

¹Abu Ekapolon ekesileerek ayoŋ ŋakiro nu: Abu ayoŋ eŋolik Ebukit ŋolo aya ŋaraito ŋuna akonok.

²Ekeŋit ayoŋ Ekapolon tema, “Amos, nyo ite iyoŋ?” Oboŋok ayoŋ otema, “Ete ayoŋ ebukit ŋolo eya ŋaraito ŋuna akonok.” Tema nai Ekapolon neni kaŋ, “Adolu apaki ŋina esidyon aŋuna a ŋituŋa kaŋ a Ŋisirael, nyesyoni ayoŋ ikes nabo jik.

³Akoloŋit ŋin, iwololoete ŋituŋa eeosi alo kai a ŋina ilipyata; ilelebun ŋawat a ŋituŋa ŋiwaetin daadaŋ ŋulu ka akwap, imasaryo ŋawat a ŋituŋa kiŋa ekililiŋat.”

⁴Kiirasi ŋakiro nu iyes ŋulu iimakinito ŋulu eyakatar akiitanit, ido icamito akitasalun ŋikulyak anakwap,

⁵ibasi iyes “Ori kareca edaunotor ŋasuban elap lo, ikotere ogyelanasi ŋikinyom? Ori edaunor akoloŋit ŋina a Sabato, ikotere ogyelanasi ŋaganoi? Itiditeunio iwon akipimet, ikotere oryamutu ŋicekelya ŋulu elalak, ido omodyanakisi ŋituŋa a ŋakipimeta a ŋuna nyiyookino,

⁶ikigyelununui iwon ŋikulyak a esilipa ka ŋituŋa ŋulu a ŋican a egyelit a ŋolo a ŋamuk a ŋaarei, egyelanaryo iwon tari ŋikabinin a ŋaganoi.

⁷Ekoŋ Ekapolon ŋolo iturotor Ŋisirael ebe, ‘Kire jik, nyekemuryakini ayoŋ tari epei a ŋiticisyo a ŋulu aronok a ŋulu itiyaete Ŋisirael.

⁸Aŋakiro a ŋun, nyemaranikini mono akwap a? Nyikalounete mono ŋituŋa ŋulu iboiyete a nen a? Emini akuryanu lotuŋa a akwap, irimokinete ŋituŋa iwarito neni eiunotor.’

⁹“Alimu Ekapolon ŋakiro nu ebe, ‘Akoloŋit ŋin etoŋopiyari ayoŋ akoloŋ kidiŋ apaaran, ido iryonuni akwap naparan.

¹⁰Eturuwori ayoŋ ŋasuban kus ŋuna igworore ka ŋieosyo kus daadaŋ eruworosi ŋulu ka akiwolol. Eketanapi ayoŋ iyes daadaŋ ŋiguniyae anacirin, eketabanyari ayoŋ iyes ŋitim anakyes kus; ekesigwori ayoŋ iyes lopite ŋolo igworore ikoku ŋinikiyae; eruwor akoloŋit ŋin daadaŋ ŋina aronon nooi.’

¹¹“Alimu Ekapolon ŋakiro nu ebe, ‘Kire jik, ebunit apaki ŋina eyakuunia ayoŋ akiitanit nakwap. Meere akiitanit ŋina ka akimuj, kori ŋina a ŋakipi, nai akiitanit ŋina ka akiirar akirot ŋina ke Ekapolon.

¹²Etubonorosi ŋituŋa ananam tari nanam, alo Kuju tari Kide; ekerete ŋituŋa ka toboŋete iwarito akirot ŋina ke Ekapolon nai nyeryamunete jik ikalimokinan.

¹³Akoloŋit ŋin, irakari akure ŋasorok ka ŋisorok.

¹⁴Emunyarosi ka nyeyarete nabo jik ŋituŋa ŋulu ikoŋete enyarito ekiro ŋolo ka Asima a akuj a ŋina a Dan a ŋina eyai Samaria, ido ebasi, kori enyarito ekiro a akuj a ŋina eyai Beeriseba.’ Emunyarosi ŋituŋa ŋul, nyeyarete nabo jik.”