Read ngakarimojong Amos 9 Bible Online

Amos 9 - ngakarimojong bible

Amos 9

¹Tema Amos, “Abu ayoŋ eŋolik Ekapolon ewoi alodiyete Namuroet.” Okolimok iŋes ayoŋ tema, “Toram nooi ŋakyes a ŋipirin a ŋulu a Akai a ŋina ka Akuj, ikotere tomaranikis ŋalapatui ŋuna a Akai a ŋina ka Akuj; ido ŋulu ebucarosi, aari ayoŋ ke ekileŋ, mam ikes ipei daŋ ŋini eemi, mam ikes ipei daŋ ŋini ebucar.

²Tari daŋ kitiŋaar ikes kiboiyosi nakibois a ŋikatwak, ekamuni ayoŋ ikes ka akan kaŋ eriu ikes a nen, tari daŋ kedokasi ikes kidiama, atiyauni ayoŋ ikes kwap.

³Tari keŋopa ikes alokidiama emoru Karimel, ewaruni ayoŋ ikes aina ekamu, tari keŋopa ikes anakonyen kaŋ, todoiyosi tooma anam, alimokini ayoŋ emun ŋolo ka anam tokony ikes.

⁴Tari kerikosi ŋimoe ikes, eciki ayoŋ ŋimoe kec toarae ikes a ekileŋ, adau ayoŋ atubun akitiya neni kec aronis meere ajokis.

⁵“Ekapolon Akuj ŋina a ŋajoresyo, ŋina ani ketap akwap, emaranikini akwap, ikalounete ŋituŋa daadaŋ ŋulu iboiyete anakwap, iyatanakini ka itiditeununui ebari lopite ŋolo a ŋakipi a Nile.

⁶Eduki iŋes ere keŋ nakuj, kiwuak kidiama toruwor ariwo alokidiama akwap; iŋes einakini ŋakipi a anam toleleiyasi nakwap neni eonit. Erae ekiro keŋ Ekapolon.

⁷“Ebala Ekapolon, ‘Okoe Ŋisirael, nyikwaan mono iyes ka ŋituŋa ka Esiopia a? Meere mono ayoŋ ayauni Ŋisirael alo Ijipit, oyau Ŋipilistin alo Kapitor ka oyau Ŋiarameani alo Kir a?

⁸Ekete ayoŋ iyes ŋituŋa a akwap a Isirael ŋulu itiyaete aronis, akamunyari ayoŋ iyes eketoŋopiya anakwap, nai nyamunyari ayoŋ ŋiletok a Yakob daadaŋ.’

⁹“Ebala Ekapolon, ‘Kire jik, epukae ka eloilookini ayoŋ Ŋisirael kaapei ka ŋituŋa a ŋakwapin a daadaŋ, ekeike ikes lopite ŋolo ikeikea ituŋanan ŋikinyom, otyaka ŋituŋa ŋulu aronok daadaŋ aneni a ŋulu ajokak.

¹⁰Earyo a ekileŋ ŋikasecak daadaŋ alotuŋa kaŋ, earyo ikes daadaŋ ŋulu irworosi atemar, nyecamakini Akuj ŋican epote neni kec.’ ”

¹¹Tema Amos, “Ebala Ekapolon, ‘Ebunit akoloŋit ŋina enyakakinia ayoŋ apukan neni a ŋiletok a Daudi, apukan ŋina abu tomunaar ikwa akai ŋina eritakin kwap. Etowoi ayoŋ nabo ŋarwatatain keŋ, adukokini ayoŋ akai ŋin nabo kikwaanikin ka ŋina koloŋ ayai alorwa a ŋulu a koloŋ,

¹²ikotere ikes ikamarete akwap ke Edom neni idoŋit ka ŋakwapin daadaŋ ŋuna koloŋ arae ŋuna kaŋ.’

¹³“Ebala Ekapolon, ‘Ebunit apaki ŋina erukaununotor akitare ka akilem, ekoni epiini eriŋa ecuyo ŋolo paaran alemunio, eituni epiini alomoru, eleleiyari epiini alokamukumukui.

¹⁴Enyakuni ayoŋ ŋituŋa kaŋ Ŋisirael nakwap kec, edukokinete ikes nabo ŋitaunio kec ŋulu aponi kinyasunae, ido kiboikinos tooma ŋitaunio ŋul, itaete ikes ŋimanikorin kec ŋulu ke epiini, ido tomata epiini kec. itaete ikes ŋimanikorin kec, ido tonyama ŋaraito kec.

¹⁵Iyes Ŋisirael, ekewuakini ayoŋ iyes nakwap kus, mam ituŋanan ikilemari iyes nabo anakwap a ŋina akewuak ayoŋ iyes.’ Ekapolon Akuj iŋes alimu ŋun.”