Read ngakarimojong Yona 3 Bible Online

Yona 3 - ngakarimojong bible

Yona 3

¹Kirworik Ekapolon neni a Yona akirworikinet ŋina a ŋaarei tema,

²“Tonyou, tolot Ninepe, lotaun ŋol ŋolo apolon nooi, kisera neni a ŋituŋa keŋ ŋakiro ŋuna akalimok ayoŋ iyoŋ.”

³Tonyou Yona tolot Ninepe ikwapei alimokinitor Ekapolon iŋes. Arae Ninepe etaun ŋolo apol nooi, ŋolo ilosi ŋirwa ŋiuni akirimokin, alomar alowae ke epei tari ŋoloce.

⁴Kisyaki Yona alosit keŋ, toloma lotaun, todau apaaran apei elosi. Kiserau tema, “Ŋirwa ŋatomoniomwon bon idoŋito kikamarae Ninepe!”

⁵Tonupa ŋituŋa a Ninepe Akuj, ido totubut atemar emaikina kiredakis daadaŋ akiron ka tonapa ŋiguniyae, anyoun aneni a ŋulu itopolooritae ka ŋulu nyitopolooritae.

⁶Ani iirari erwosit a Ninepe ŋakiro ŋun, tonyou alokicoloŋ keŋ a ŋolo ka apukan, tolaca ekaaso, tonap ŋiguniyae, kiboikin lokuron.

⁷Kiyakiya akirot lotuŋa a Ninepe ebe, “Anatubunet ke erwosit ka ŋulu ipukatotor iŋes, nyecamakinitae ituŋanan, etyaŋ, ŋaatuk kori ŋakinei iirete idio ibore; nyecamakinitae kimuja, todaka, kori tomata.

⁸Itemokino ŋituŋa tonapa ŋiguniyae ka toenikis ŋityaŋ daŋ, ido kimukekis akilip Akuj. Itemokino ŋinituŋanan toki aronis keŋ ka aryenyeo keŋ.

⁹Ŋae eyeni! Acepaki isili Akuj, ikisyon iwon kimyek anyunyura keŋ, ikotere iwon nyikitwaka.”

¹⁰Ani iŋolikini Akuj ŋuna apotu ikes kitiyata, epite ŋolo aponiata ikes tokiwa aronis kec, kisyoni Akuj ikes kimyek aronis ŋina sek aris ketema esicania ŋituŋa a Ninepe; ido abu nyisican ikes.