Read ngakarimojong Ekim. 13 Bible Online

Ekim. 13 - ngakarimojong bible

Ekim. 13

¹Kirwor Ekapolon neni a Moses tema,

²“Kiyakiya ŋikilyok torebo akwap a Kanaan, akwap ŋina ainakini ayoŋ neni a Ŋisirael. Emaikina kiyakiya epeikile a ŋolokabila, torae daŋ ikes ŋikarikok alotuŋa kec.”

³Abu nai Moses kiyakiya ŋikarebok analoŋisat a ŋina a Paran, iwuapit ŋuna alimuni Ekapolon, arae ŋikilyok ŋul daadaŋ ŋikarikok alotuŋa a Isirael.

⁴Ŋirorwa kec ikes lu: Alokabila a Ruben kiyakiyarae Samua lokoku a Sacur,

⁵alokabila a Simeon kiyakiyarae Sapat lokoku a Ori,

⁶alokabila a Yuda kiyakiyarae Kaleb lokoku ka Yepune,

⁷alokabila a Isakar kiyakiyarae Igal lokoku a Yosepu,

⁸alokabila a Epuraim kiyakiyarae Osea lokoku a Nun,

⁹alokabila a Benjamin kiyakiyarae Paliti lokoku a Rapu,

¹⁰alokabila a Sebulon kiyakiyarae Gadiel lokoku a Sodi,

¹¹alokabila a Manase ( iŋes ekabila a Yosepu), kiyakiyarae Gadi lokoku a Susi,

¹²alokabila a Dan kiyakiyarae Amiel lokoku a Gemali,

¹³alokabila ka Aser kiyakiyarae Sesur lokoku a Mikael,

¹⁴alokabila a Naputali kiyakiyarae Nabi lokoku a Popisi

¹⁵alokabila a Gad kiyakiyarae Geuel lokoku a Maki.

¹⁶Erae ŋul ŋirorwa a ŋikilyok a ŋulu abu Moses kiyakiya akireb akwap a Kanaan, abu Moses kilocok ekiro ka Osea alokoku a Nun toruwor Yosua.

¹⁷Abu Moses kiyakiya ŋikilyok ŋul akireb akwap a Kanaan, tolimok ikes tema, “Kitipeiyosi ama tooma Negeb, kitipeiyosi nakwap ŋina a ŋikamukumukui,

¹⁸ido toanyut epite ŋolo eyakar akwap ŋin, toanyut kegogoŋ ŋituŋa ŋulu iboiyete a nen, kori kepalag, kelalak, kori kekudyoko

¹⁹ka toanyut erae kejok akwap ŋina iboiyoto ŋin, kori kerono, kewuatae a ŋarwatatain ŋitaunio ŋulu iboiyoto ŋituŋa ŋul, kori kemam

²⁰ka toanyut kejokak ŋalup a akwap a ŋin, kori keroko, keya ŋikito nakwap ŋin, kori kemam. Totitiny iyes, ido yaut ŋaraito ŋadi ŋuna ka akwap a ŋin.” Arae apaki ŋin apaki ŋina akokitotor ŋaraito ŋuna esyaunak ŋuna ke epiini.

²¹Apotu nai ŋikilyok ŋul toloto torebo akwap ŋin ameun analoŋisat a Sin akitodol Reob diyete Leboamas.

²²Aŋun apotu ikes kitipeiyosi Negeb, todolo Eburon, Aiman ka Sesai ta Talimai. Arae Ŋianaki ikes eboiyete a nen. (Kedukyo Eburon ŋikaru ŋikanikaarei eriŋa nyeduko Soan alo Ijipit.)

²³Todolo ŋikilyok, ŋul tari nayonae Esikol, totubut a nen ateni apei ŋina ke ekitoe ke epiini eyai etunene ŋolo a ŋaraito ke epiini, kinenekis nakitoe, ido toryoŋa ŋikilyok ŋiarei, apotu daŋ ŋikilyok ŋul tolemut ŋaraito ŋuna enyaritae Pomegranate ta ŋaboboryo.

²⁴Anyaritae akibois ŋin ayonae Esikol [3] aŋuna a etunene a ŋolo a ŋaraito ke epiini a ŋolo apotu Ŋisirael totubut a nen.

²⁵Kelunyar ŋirwa ŋatomoniomwon, toboŋut ŋikarebok anakireb akwap a Kanaan,

²⁶potu ikes neni a Moses ka Aron ta neni ka atukot a Ŋisirael a ŋulu ayakasi apaki ŋin naloŋisat ŋina a Paran nakibois ŋina anyaritae Kades, yaut ŋikarebok ŋul ŋakiro kec neni a Moses ka Aron ta neni ka atukot a Ŋisirael, kitoodikis daŋ ŋikarebok Ŋisirael ŋuluce ŋaraito ka akwap a Kanaan, ŋuna ayaunete ikes.

²⁷Tolimokis ikes Moses temasi, “Adoli isua nakwap ŋina ikiyakiyarit iyoŋ isua; eleleete ŋakile ka a ao anakwap a ŋin, ŋaraito keŋ ikes nu.

²⁸Nai egogoŋ nooi ŋituŋa ŋulu iboiyete anakwap a ŋin ka ewuatae a ŋarwatatain ŋitaunio kec, nabo nyedisyak ŋitaunio kec ka nabo eŋolikin isua ŋiletok ka Anak aina.

²⁹Ŋiamaleki ikes iboiyete anakwap a ŋina a Negeb; Ŋiitaiti, Ŋiyebusi ka Ŋiamori ikes iboiyete anakwap a ŋina a ŋikamukumukui, ido Ŋikanaani ikes iboiyete alodiyete anam ka alodiyete aŋolol Yorodan.”

³⁰Nai kisililiŋ Kaleb ŋituŋa alokiŋaren Moses tema, “Oloto atipei ekamasi akwap ŋin toruwor ŋina yok, anerae ikipedori iwon akiloun ŋituŋa ŋul.”

³¹Temasi nai ŋikilyok ŋulu alosito ka iŋes akireb akwap ŋin, “Nyikipedori iwon akitijikin ŋituŋa ŋul, anerae egogoŋ ikes akilo iwon.”

³²Aŋun, apotu ikes tolimokis Ŋisirael ŋakiro ŋuna pa ajokak aŋuna ka akwap a ŋina alosito ikes akireb temasi, “Akwap daadaŋ ŋina arebi isua, erae akwap ŋina emunyanarotor ŋituŋa, nabo ŋituŋa ŋulu aponi isua kiŋolikinae anakwap a ŋin eburok nooi, mam ituŋanan isikwaanare anakwap a daadaŋ.

³³Ikiŋolik isua anakwap a ŋin Ŋinepilim (arae Ŋianaki ŋiletok a Ŋinepilim) ani ikisikwaanikin isua ka ikes, tosubunae isua ŋabeerei koŋin, aneni kec daŋ asibitae isua ŋabeerei koŋin.”