Read ngakarimojong Ekim. 17 Bible Online

Ekim. 17 - ngakarimojong bible

Ekim. 17

¹Kirwor Ekapolon neni a Moses tema,

²“Kirwor neni a Ŋisirael, kijau ikes ŋibelae ŋitomon ka ŋiarei, epeibela aŋuna a ŋolokabila, kijau ŋibelae ŋul aneni a ŋikarikok a daadaŋ a ŋulu a ŋikabilae kec. Kigir ekiro a ŋolokarikon lobela keŋ,

³ido ikigir ekiro ka Aron lobela ŋolo a ekabila a Lepi. Emaikina toyai ebela epei aŋuna a ŋolokabila.

⁴Kiwuak ŋibelae ŋul tooma eema diyete Asaduku ŋina ka Acamunet ke Ekapolon, neni ikiryamununor ayoŋ ka iyes.

⁵Ebela ŋolo a ekile a ŋolo aseuni ayoŋ iminiaunete ŋakwii, ido etojoŋoe ayoŋ Ŋisirael akiŋuruŋura ŋina erubakinitotor ikes iŋuruŋurasi neni kus.”

⁶Kirwor Moses neni a Ŋisirael ka apotu ŋikarikok kec daadaŋ inakis iŋes ŋibelae, epeibela aŋuna a ŋolokarikon a ŋolokabila, yaunae ŋibelae ŋitomon ka ŋiarei, ekimar ŋolo a ŋikabilae kec, ido ayai ebela ka Aron daŋ lobelae ŋul.

⁷Abu nai Moses kiwuak ŋibelae ŋul kiŋaren Ekapolon tooma eema nakibois ŋina ayai Asaduku ŋina ka Acamunet.

⁸Ani taparacu keŋ elosi Moses loeema ŋolo ayai Asaduku ŋina ka Acamunet, toryamu atemar kiminiaut ŋakwii alobela a ŋolo ka Aron a ŋolo arae ŋuna a ekabila a Lepi; toryamu kiminiaut ŋakwii, keturout ŋatur ka kerau ŋaraito ŋuna ka Alimond ŋuna akokito.

⁹Abu nai Moses yau ŋibelae daadaŋ kiŋa alokiŋaren Ekapolon neni a Ŋisirael a daadaŋ; kiŋolikis ikes, ido abu ŋinituŋanan tolema ebela keŋ.

¹⁰Tolimok Ekapolon Moses tema, “Kinyakak ebela ŋolo ka Aron diyete Asaduku ŋina ka Acamunet, kiŋadakinae nen erae akitaanyikinet neni a ŋikaŋerok, ikotere itojoŋoito ikes akiŋuruŋura neni kaŋ, ani kitiyata ikes ŋun etwakete.”

¹¹Kitiya Moses ŋun lopite ŋolo ecikitor Ekapolon iŋes.

¹²Tolimokis Ŋisirael Moses temasi, “Adaunoi isua, acakaroi isua, aoliyor isua daadaŋ!

¹³Ituŋanan daadaŋ ŋini eapiyari Nasaduku ŋina ka Acamunet ke Ekapolon etwani. Etwakyo mono isua daadaŋ a?”