Read ngakarimojong Ekim. 2 Bible Online

Ekim. 2 - ngakarimojong bible

Ekim. 2

¹Kirwor Ekapolon neni a Moses ka Aron tema,

²“Emaikina Ŋisirael todukokis ŋiemae kec, ŋinituŋanan kaapei ka ŋituŋa a ekabila keŋ diyete abendera a ekal keŋ. Emaikina ikes todukokis ŋiemae kec iteorito ŋikekya loeema ŋolokilipet.

³Emaikina ŋituŋa a Yuda toloma lowae ŋolo alo Kide, lowae ŋolo elomununia akoloŋ, Nason lokoku ka Aminadab iŋes erae ekarikon a ŋituŋa a ekabila a Yuda

⁴Erae ekimar a ŋikilyok a ŋulu epedorito ejie a ŋulu aponi kigirae ŋalipyo ŋatomonikanikaarei ka ŋaomwon ka ŋamiae ŋakanikapei.

⁵Diyete ekabila a Yuda emaikina toloma ŋituŋa a ekabila a Isakar, ekarikon kec iŋes Nasaniel lokoku a Suar.

⁶Erae ekimar a ŋikilyok a ŋulu apedorito ejie, a ŋulu aponi kigirae ŋalipyo ŋatomonikan ka ŋaomwon ka ŋamiae ŋaomwon.

⁷Diyete a ekabila a Isakar emaikina toloma ŋituŋa a ekabila a Sebulon; ekarikon kec iŋes Eliab ŋolo arae lokoku a Elon.

⁸Erae ekimar a ŋikilyok a ŋulu apedorito ejie, a ŋulu aponi kigirae ŋalipyo ŋatomonikan ka ŋakanikaarei ka ŋamiae ŋaomwon.

⁹Erae ekimar a ŋikilyok analomar a Yuda anatuketa kec kaapei ŋalipyo amiat ka ŋatomonikanikauni ka ŋikanikapei ka ŋamiae ŋaomwon. Ikes emaikina iŋarenete ewuotokinete Ŋisirael anakibois a ŋina sek alomito.

¹⁰“Alowae a ŋolo alo Kwap, emaikina toloma ŋituŋa a ekabila a Ruben a ŋatuketa kec. Elisur ŋolo erae lokoku a Sedeur iŋes erae ekarikon a ekabila a Ruben,

¹¹erae ekimar a ŋikilyok a ŋulu apedorete ejie a ŋulu aponi kigirae ŋalipyo ŋatomoniomwon ka ŋakanikapei ka ŋamiae ŋakan.

¹²Diyete ekabila a Ruben emaikina toloma ŋituŋa a ekabila a Simeon, ekarikon kec iŋes Selumiel lokoku ka Surisadai,

¹³erae ekimar a ŋikilyok a ŋulu apedorito ejie a ŋulu aponi kigirae ŋalipyo ŋatomonikan ka ŋakanikaomwon ka ŋamiae ŋauni.

¹⁴Totupak ekabila a Gad; erae ekarikon a ŋituŋa a ekabila a Gad Eliasap ŋolo arae lokoku ka Reuel,

¹⁵erae ekimar a ŋikilyok a ŋulu apedorito ejie, a ŋulu aponi kigirae ŋalipyo ŋatomoniomwon ka ŋakan ka ŋamiae ŋakanikapei ka ŋatomonikan.

¹⁶Erae ekimar a ŋikilyok analomar a Ruben ŋalipyo amiat ka ŋatomonikan ka apei ka ŋamiae ŋaomwon ka ŋatomonikan anatuketa kec, ikes emaikina totupakis ŋituŋa alomar a Yuda ewotokinete Ŋisirael anakibois a ŋina sek alomito,

¹⁷“Emaikina kiwuakinae eema ŋolokilipet ka alomar a ŋilepi kidiŋ ŋalomarisinei ŋuna a ŋikabilae a ŋuluce. Ani edoli apaki ŋina ewotokinere, emaikina ŋituŋa kiwuapas lopite ŋolo sek ayakatar ikes eriŋa nyewotokina aneni alomito, tolosete a ŋatuketa, a ŋikabilae kec ka ŋinatukot kiwuapite abendera keŋ.

¹⁸“Alowae a ŋolo alo To, emaikina toloma ŋituŋa a ekabila a Epuraim a ŋatuketa kec. Elisama lokoku ka Amiud iŋes eruwor ekarikon a ekabila a Epuraim,

¹⁹Erae ekimar a ŋikilyok a ŋulu apedorito ejie a ŋulu aponi kigirae ŋalipyo ŋatomoniomwon ka ŋamiae ŋakan.

²⁰Diyete ekabila a Epuraim, emaikina toloma ŋituŋa a ekabila a Manase. Ekarikon kec iŋes, Gamaliel lokoku a Pedasur.

²¹Erae ekimar a ŋikilyok a ŋulu apedorito ejie a ŋulu aponi kigirae ŋalipyo ŋatomoniuni ka ŋaarei ka ŋamiae ŋaarei.

²²Totupak ekabila a Benjamin, erae ekarikon a ŋituŋa a ekabila a Benjamin Abidan lokoku a Gideoni.

²³Erae ekimar a ŋikilyok a ŋulu apedorito ejie a ŋulu aponi kigirae ŋalipyo ŋatomoniuni ka ŋakan ka ŋamiae ŋaomwon.

²⁴Ekimar a ŋikilyok analomar a Epuraim a ŋatuketa kec arae ŋalipyo amiat ka ŋakanikauni ka amiat, ikes emaikina totupakis ŋituŋa alomar a Ruben ewotokinete Ŋisirael anakibois a ŋina sek alomito.

²⁵“Alowae a ŋolo alo Kuju emaikina toloma ŋituŋa a ekabila a Dan a ŋatuketa kec, ekarikon kec iŋes Aieser lokoku ka Abisadai.

²⁶Erae ekimar a ŋikilyok a ŋulu apedorito ejie a ŋulu aponi kigirae ŋalipyo ŋatomonikanikapei ka ŋaarei ka ŋamiae ŋakanikaarei.

²⁷Diyete ekabila a Dan emaikina toloma ŋituŋa a ekabila ka Aser, ekarikon kec iŋes Pagiel lokoku ka Okiran.

²⁸Erae ekimar a ŋikilyok a ŋulu apedorito ejie a ŋulu aponi kigirae ŋalipyo ŋatomoniomwon ka apei ka ŋamiae ŋakan.

²⁹Totupak ekabila a Naputali, ekarikon kec iŋes Aira lokoku a Enan.

³⁰Erae ekimar a ŋikilyok a ŋulu apedorito ejie a ŋulu aponi kigirae ŋalipyo ŋatomonikan ka ŋauni ka ŋamiae ŋaomwon.

³¹Ekimar a ŋikilyok a daadaŋ analomar a Dan a ŋatuketa kec, erae ŋalipyo amiat ka ŋatomonikan ka ŋakanikaarei ka ŋamiae ŋakanikapei. Ikes erotokinete ekaku ŋikabilae ŋuluce daadaŋ apaki ŋina ewotokiniata Ŋisirael anakibois a ŋina sek alomito.”

³²Ekimar a Ŋisirael a daadaŋ a ŋulu aponi kimarunae a ŋikalya atapapaa kec a ŋatuketa analomarisinei kec, arae ŋalipyo ŋamiae ŋakanikapei ka ŋauni ka ŋamiae ŋakan ka ŋatomonikan.

³³Ikwapei ecikitor Ekapolon Moses, pa emarakinitae ŋilepi lokimar a Ŋisirael a ŋuluce.

³⁴Apotu Ŋisirael kitiyata lopite ŋolo ecikitor Ekapolon Moses, toloma nakiboisyo a ŋalomarisinei, towotonokis a ŋikabilae, ŋinituŋanan erukito ka ŋituŋa ateker keŋ ka ŋulu a ekal a papa keŋ.