Read ngakarimojong Ekim. 3 Bible Online

Ekim. 3 - ngakarimojong bible

Ekim. 3

¹Erae lu ŋiletok ka Aron ka Moses apaki ŋina erworotor Ekapolon ka Moses alomoru Sinai.

²Ŋirorwa a ŋidwe ka Aron ikes lu: Nadab iŋes ŋolokiyae, totupak Abiu, Eleasar ka Isamar,

³erae ŋul ŋidwe ka Aron, ŋisacaradotin ŋulu aponi inakinae etic ŋolo ka asacaradotonu.

⁴Apotu Nadab ka Abiu totwaka alokiŋaren Ekapolon apaki ŋina ainakiniata ikes akim ŋina pa etaleuno neni ke Ekapolon analoŋisat a Sinai ka amamukatar ikes ŋidwe. Apotu Eleasar ka Isamar kitiyata ikwapei ŋisacaradotin alorwa a ŋulu ayarya papa kec Aron.

⁵Abu nai Ekapolon kirwor neni a Moses tema,

⁶“Toseu ŋituŋa a ekabila a Lepi, inak ikes neni ka Aron esacaradoti, ikotere kiŋarakis ikes iŋes.

⁷Itiyaete ikes ŋiticisyo aŋuna ka Aron ka aŋuna ka atukot a ŋituŋa a daadaŋ alokiŋaren eema ŋolokilipet,

⁸emaikina ikes kiyoko ŋiboro daadaŋ ŋulu eya loeema ŋolokilipet ka akitiya ŋiticisyo daadaŋ aŋuna a Ŋisirael apaki ŋina itiyata ikes loeema ŋolokilipet.

⁹Emaikina iyoŋ inak ŋilepi neni ka Aron ka ŋiletok keŋ, erae ikes ŋulu etyakunitae aneni a Ŋisirael aŋuna keŋ.

¹⁰Nai Aron bon ka ŋiletok keŋ ikes iinakini iyoŋ akitiya loeema ŋolokilipet ikwapei ŋisacaradotin. Ituŋanan daadaŋ ŋini elomari neni itiyaete ikes, emaikina toarae.”

¹¹Kirwor nai Ekapolon neni a Moses tema,

¹²“Adau ayoŋ aseun aŋuna kaŋ ŋilepi aneni a Ŋisirael daadaŋ kilunyokin neni a ŋidwe a ŋulukiyae a ŋulu a Ŋisirael. Eruworosi ŋilepi ŋulu kaŋ,

¹³anerae erae ŋidwe ŋulu ŋikiyae daadaŋ ŋulu kaŋ; apaki ŋina aarya ayoŋ ŋidwe ŋulu ŋikiyae daadaŋ anakwap a Ijipit, abu ayoŋ eturuwo ŋidwe ŋulukiyae a Ŋisirael daadaŋ, ŋulu a ŋityaŋ ka ŋulu a ŋituŋa ŋulu kaŋ, eruworosi ikes daadaŋ ŋulu kaŋ. Arae ayoŋ Ekapolon!”

¹⁴Abu nai Ekapolon kirwor neni a Moses analoŋisat a ŋina a Sinai tema,

¹⁵“Kigir ŋilepi a ŋikalya atapapaa kec ka a ŋatekerin, kigir ŋidwe ŋulusapa ŋulu erae apolou kec elap epei ka adepar.”

¹⁶Aŋun, abu Moses kigir ŋidwe ŋul lopite ŋolo alimunitor Ekapolon, ikwapei ecikitere iŋes.

¹⁷Ŋirorwa a ŋidwe a Lepi a ŋulusapa ikes lu: Gerison, Koas ka Merari.

¹⁸Ŋiletok a Gerison a ŋatekerin kec ikes lu: Libini ka Simei.

¹⁹Ŋiletok a Koas a ŋatekerin kec ikes lu: Amiram, Isar, Eburon ka Usiel.

²⁰Ŋiletok a Merari a ŋatekerin kec ikes lu: Mali ka Musi. Erae ŋun ŋatekerin a Lepi a ŋikalya atapapaa kec.

²¹Ŋatekerin a Gerison ikes nu: Ŋilibini ka Ŋisimet.

²²Arae ekimar a ŋidwe a daadaŋ a ŋulusapa a ŋulu arae apolou kec elap epei ka adepar ŋalipyo ŋakanikaarei ka ŋamiae ŋakan.

²³Amaikina ŋatekerin a Ŋigerisoni toloma kaku eema ŋolokilipet,

²⁴arae ekarikon a ŋatekerin a Ŋigerisoni Eliasap lokoku a Lael.

²⁵Ainakinitae ŋisapa a ateker a Gerison etic ŋolo ka akibois a ŋina asegan ka eema ŋolokilipet, ŋarapeta ŋuna alokidiama, anaŋga ŋina ayai neni elomarere loeema ŋolokilipet,

²⁶ŋanaŋgae ŋuna enenetoi nalapatu, anaŋga ŋina eneno neni elomarere nalapatu ŋina erimokinit akibois ŋina asegan ka namuroet ka akiricit ŋaunoi ŋuna ke eema. Ainakinitae ikes ŋiticisyo daadaŋ ŋulu esitiyaere ŋiboro ŋul.

²⁷Ŋatekerin a Koas ikes nu: Ateker a Ŋiamirami, ateker a Ŋisaris, ateker a Ŋieburoni ka ateker a Ŋiuseili.

²⁸Arae ekimar a ŋidwe a ŋulusapa a daadaŋ a ŋulu arae apolou kec elap epei ka adepar ŋalipyo ŋakanikauni ka ŋamiae ŋakanikapei. Amaikina ikes itiyaete ŋiticisyo anakibois a ŋina asegan.

²⁹Amaikina ŋatekerin a Ŋikoasi toloma lowae ŋolo alo Kwap eema ŋolokilipet.

³⁰Arae ekarikon a ŋatekerin a Ŋikoasi Elisapan lokoku a Usiel.

³¹Ainakinitae Ŋikoasi ŋiticisyo lu: Ŋolo ka Asaduku a ŋina ka Acamunet, ŋolo a emesa a ŋolo a awoet a ŋina ke etaa, ŋolo a ŋamuroeta ka ŋolo a ŋikopoi ka ŋabakulei ŋuna isitiyaete ŋisacaradotin anakibois a ŋina asegan ta ŋolo ka anaŋga. Ainakinitae ikes ŋiticisyo daadaŋ ŋulu eitana aŋuna a ŋiboro a ŋul.

³²Eleasar lokoku ka Aron a ŋolo erae esacaradoti iŋes epolokini ŋikarikok a ŋilepi ka epolokinit ŋulu ainakinitae akitiya ŋiticisyo anakibois a ŋina asegan.

³³Ŋatekerin a Ŋimerari ikes nu: Ateker a Ŋimalit, ateker a Ŋimusit.

³⁴Arae ekimar a ŋidwe a ŋulusapa daadaŋ a ŋulu arae apolou kec elap epei ka adepar ŋalipyo ŋakanikapei ka ŋamiae ŋaarei,

³⁵arae ekarikon a ŋatekerin a Ŋimerari Suriel lokoku ka Abiail. Amaikina ikes toloma lowae ŋolo alo Kuju eema ŋolokilipet.

³⁶Ainakinitae Ŋimerari ŋiticisyo lu: Ŋolo a ŋakito a ŋuna adukunitere akibois ŋina asegan, ŋolo a ŋakito a ŋuna eriwonokinitae loeema, a ŋipirin, a ŋakito a ŋuna ewuar eema ka ŋiboro kec daadaŋ ŋulu esitiyao a nen. Ainakinitae ikes ŋiticisyo daadaŋ ŋulu etiyao a nen,

³⁷Ainakinitae ikes etic ŋolo a ŋipirin a daadaŋ a ŋulu ka alapatu a daadaŋ ka ŋolo a ŋakito a ŋuna apetanakinio kwap eema ka ŋases ta ŋaunoi.

³⁸Emaikina Moses ka Aron ta ŋidwe ka Aron ŋulusapa toloma kiŋaŋaren eema ŋolokilipet, lowae ŋolo alo Kide, ŋolo elomununia akoloŋ, etic kec akitiya ŋitalyo alotooma akibois ŋina asegan aŋuna a Ŋisirael. Ituŋanan daadaŋ ŋini aapiyari nen, amaikina toarae.

³⁹Ekimar a ŋilepi a ŋulu apotu Moses ka Aron kigira a ŋatekerin kec lopite ŋolo ecikitor Ekapolon Moses arae ŋalipyo ŋatomoniarei ka ŋaarei, arae ŋul daadaŋ ŋidwe ŋulusapa ŋulu arae apolou kec elap epei ka adepar.

⁴⁰Kirwor Ekapolon neni a Moses tema, “Kigir ŋidwe daadaŋ ŋulusapa ŋulu erae ŋikiyae aneni a Ŋisirael, ŋidwe ŋulu erae apolou kec elap epei ka adepar, kimar ikes.

⁴¹Nai emaikina iyoŋ kimyek ŋilepi aŋuna kaŋ. Arae ayoŋ Ekapolon! Ilunyokin ŋul neni a ŋidwe a daadaŋ a ŋulusapa a ŋulukiyae aneni a Ŋisirael ka ikwaŋinapei ilunyokin ŋibaren daadaŋ ŋulu a ŋilepi neni a ŋikiyae a ŋibaren a Ŋisirael.

⁴²Aŋun, abu Moses kigir ŋidwe daadaŋ ŋulusapa ŋulukiyae ŋulu a Ŋisirael, lopite ŋolo ecikitor Ekapolon.

⁴³Arae ekimar a ŋidwe a daadaŋ a ŋulusapa a ŋulukiyae a ŋulu arae apolou kec elap epei ka adepar imaritae a ŋirorwa kec ŋalipyo ŋatomoniarei ka ŋaarei ka ŋamiae ŋaarei ka ŋatomonikanikaarei ka ŋauni.”

⁴⁴Kirwor nabo Ekapolon neni a Moses tema,

⁴⁵“Totyaka ŋilepi kilunyokinos neni a ŋidwe a ŋulusapa a ŋulukiyae a ŋulu a Ŋisirael ka ŋibaren a ŋilepi kilunyokin neni a ŋikiyae a ŋibaren a Ŋisirael, eruworosi ŋilepi ŋulu kaŋ. Arae ayoŋ Ekapolon!

⁴⁶Ikwapei elalaketa ŋidwe a Ŋisirael ŋulusapa ŋulu erae ŋikiyae akilo ŋilepi, edeparit ekimar a ŋidwe a Ŋisirael ŋolo a ŋidwe a ŋilepi a ŋidwe ŋamiae ŋaarei ka ŋatomonikanikaarei ka ŋiuni,

⁴⁷emaikina iyoŋ kijau aŋuna a ŋinikoku ŋicekelya ŋikan, ipimitae alotyae a ŋicekelya a ŋulu ecamunito ŋituŋa daadaŋ isitiyao anakibois a ŋina asegan.

⁴⁸Emaikina iyoŋ iinak Aron ka ŋidwe keŋ ŋulusapa ŋisiliŋa ŋul ŋulu elakunitere ŋidwe a Ŋisirael ŋulusapa ŋulu adeparito ekimar kec ŋolo a ŋidwe”

⁴⁹Abu nai Moses kijau ŋisiliŋa ŋulu alakunere ŋidwe a Ŋisirael ŋulukiyae ŋulu adeparit ekimar kec ŋolo a ŋilepi,

⁵⁰Kirirau Moses ŋisiliŋa ŋulu arae apotis kec ŋicekelya aliput ka ŋamiae ŋauni ka ŋatomonikanikapei ka ŋakan ipimunitae alotyae aŋicekelya a ŋulu ecamunito ŋituŋa daadaŋ isitiyao anakibois a ŋina asegan,

⁵¹ido abu inak ŋisiliŋa ŋul neni ka Aron ka ŋidwe keŋ ŋulusapa, lopite ŋolo alimunitor Ekapolon, ikwapei ecikitor Ekapolon Moses.